1 Samuwel 23 - NABUWWA KEE MALIKWA

DAWUD KAQIILÂ MAGAALAH MARA WADE

¹ Dawud Filistiin mari Kaqiilâ-magaalat qeebi abaanaah, qusbih orbisen daro buubeenih 'yaanam yoobbe waqdi,

² YALLA essereeh, «YALLAW, gexeh a marat qeebi maay aboo?» iyye. YALLI, «Gexay qeebi keenit abaay, Kaqiilâ-magaalah mara wad» kaak iyye.

³ Dawud mari, «A elle nan Yuudâ rasul elle abnah nan meysi nee xiqtak, taway kaadu Filistiin qaskar elle tan baaxo maca nee beyta? Wonni mankeh nee baahu waah yan?» iyyen.

⁴ Too waqdi Dawud kaadu qagseh YALLAL fayu essere. YALLI kaadu qagseh, «Gexay Kaqiilâ-mara wad; Filistiin marak anu koo aysiiseyyok» kaak iyye.

⁵ Tonnalaa, Dawud kee kay mara Kaqiila fan gexxeeh, Filistiin marat qeebi aben. Filistiinik mango mara qideeniih saq kaadu keenik buubeenih, Kaqiilal yan magaalah mara tonnal waden.

⁶ Acimalék-Abiyataar kudeh Dawuduy Kaqiilal yanihiyya fan yemeete saaku, Yallih seeka xagarat hayta saroy rikeek tanihiyya gabat baaheh suge.

⁷ Saawul, Dawud Kaqiilal yanim yoobbe waqdi iyyeemih, «Dawud Kaqiilâ-magaalay gaso maroh edde taniih megdebwa afal akak tanihiyyah addal yenek, wohoysa oflot isih is heeh mayana! Yalli yi gabat kaa haam faxah yan» iyye.

⁸ Tohuk lakal Saawul isi qaskarah seeco abeeh, «Carbih ugutaay Kaqiilâ-magaala fan gexxa inteenih Dawud kee kay marat maro hayisa» iyye.

⁹ Dawud, Saawul kaa yabbixe'gidih malsam yoobbe waqdi, Sek-Abiyataarak, «Ama Yallih seeka haysitta saroy rikeek tanihiyya annah yol baahey» iyye.

¹⁰ Sarrak iyyeemih, «YALLAW, Israayil ummatta doore Dageltaw, yooy ku naqasuh yanihiyyah sabbatah, Saawul Kaqiilâ-magaala bayisam faxa 'yaanam oobbek,

¹¹ Kaqiilâ-mari Saawul gabal yoo maay heele? Saawul nummah, akah iyyen innah, maay amaatele? YALLAW, Israayil doore Dageltaw, aham yoh warissa'gidih, koo kallacah an» iyye. YALLI too waqdi, «Saawul amaatele» kaak iyye.

¹² Dawud kaadu qagseh YALLA essereeh, «Hay Kaqiilâ-magaalah mari Saawul gabal yoo kee yi mara maay heele?» iyye. YALLI, «Yeey, sin heelon» kaak iyye.

¹³ Too waqdi Dawud kee kay maray mangah lica boolih num akkuk sugtehiyya foorteh. Elle gexen ikkel inki aracal maadayinnoonuy aracak arac gexen. Saawul, Dawud Kaqiilak kudeh gexe, 'yaanam yoobbe waqdi kaa makataatinna.

DAWUD QALEELAH TAN BAAXOL SUGE SAAKU

¹⁴ Dawud Diif deqsitta baaxoy sinam elle dagohiyyak qaleela le kabut yombooqoreeh tokkel elle yeede. Saawul kulli way kaa gorrisak yene'mmay, Yalli kay gabal kaa mahanna.

¹⁵ Dawud uqrat edde yan aracay Cores deqsitahiyyaak, Saawul kaa qida'gidih goranat kaak yanim yoobbeh. Dawud too aracal yan waqdi,

¹⁶ Yonaatan kaal yemeeteeh, «Aytikum! Edde tanim, Yallih dacayrik!

¹⁷ Yi abba tu kol mabaahak, mameysitin. Yi abba Israayil-malik takku waytam koo kinnim yeexegeeh, anu reedah ku gubal gacu waam yismiteh yanik» kaak iyye.

¹⁸ Ken nammay too waqdi YALLIH migaaqal kataysis akkeloonumuh xagana tittah culen. Sarrak Yonaatan isi buxah yuduureeh, Dawud Cores rasul elle raaqe.

¹⁹ Diif deqsita aracak tu'baxa yakke mari, Saawuluy Gibqâ-rasul yanihiyya fan yemeeteeniih iyyeenimihii, «Dawud ni rasuk Cores deqsita aracay amô-reebu ley Cakiilâ-qaleh amol yanihiyyat uqurat yan. Tohum Yasimon deqsita aracak gabbi-qaxat raqta baaxo.

²⁰ Ni malikow, atu isih faxinnaan saaku amaay, kaa ku gabal haanam nel cab» kaak iyyen.

²¹ Saawul keenik iyyeemih, «Yoh abteenimih YALLI barkat siinit haay!

²² Away qagitay gexaay elle yan arac kee, kaa yuble mara digga haa. Makreena kinnim kaak oobbeh aniih,

²³ tonna-leemik hununuh edde yambooqore arooca ismitta kaak hay yol ama. Sarrak anu innih sin lih gexeyyooh; uxih rakaakayal yan kaa tekkek, inkih tan Yuudâ kedoh addak riket kaa macaba» iyye.

²⁴ Sarrak too mari Saawuluk naharat Diif fan gexe. Too saaku Dawud kee kay mara Maqon deqsita bacariy Yasimon deqsita aracak gabbi-qaxat raaqahiyyal yenen.

²⁵ Saawul kee kay mara Dawud goranah gexxeeh, Dawud toh yoobbeh. Too waqdi xaluuqa le qaley Maqon deqsita bacaril geytimtahiyya fan gexeeh, tokkel elle yeede. Saawul toh yoobbe waqdi lakat kaak gexe.

²⁶ Dawud kee Dawud mari, Saawul kee kay mari ken edde gorrisa qalek gersi kabut yeneenih, keenik kudak yenen. Saawul kee Saawul mari ken yabbixe'gidih gita keenik uxuyya haam faxak suge waqdi,

²⁷ farmô-num yemeeteeh, Saawuluk iyyeemih, «Filistiin-mari baaxo buubehik, xayuk am» kaak iyye.

²⁸ Toh yoobbe waqdi Saawul, Dawud qeebi hinna'mmay, Filistiin marih qeebih gexe. Too aracak too saakuk wadir migaaqah, «Kalkaala-Kooma» iyyen.

²⁹ Dawud tohuk lakal Qengeedi deqsita rasu fan gexeeh, tokkel amô-reebu le aroocal uqurat suge.