1 Samuwel 22 - NABUWWA KEE MALIKWA

SEEKA ELLE QIDEN INNA

¹ Dawud Gat magaalak gexeeh Qadullum deqsitta gablat yombooqore. Kay tooboko kee kay buxah mari a xaagu gee waqdi, kaa fan yemeeten.

² Gibdaabini elle suge mara kee, mago edde sugte mara kee, ruffa alle wannaan mari inkih kaa fan yemeete. Too mari tittat affara boolih num yekkeeniih, Dawud abbah keenik gace.

³ Dawud tokkek Mixfa deqsitta magaalay Mooyab rasul tanihiyya fanah gexe. Tokkel Mooyab malikik iyyeemih, «Ku maganah anu innih Yalli yoh loowam geyam fanah, yi ina kee yi abba ko'lih sugtay 'xic» iyye.

⁴ Dawud amô-reebu le aracat aqurat sugga 'yam fanah, kay xaleena too Mooyab malikih buxal sugte.

⁵ Ayrok teena Nabi Gaad Dawudul yemeeteeh kaak iyyeemih, «A aracay amô-reebu lel mambooroqinay, Yuudâ rasu fan gex» kaak iyye. Too waqdi Dawud Ceret deqsitta garbo fanah gexe.

⁶ Ayrok teena Saawul, Gibqâ-magaalal tan koomal tan saagantoh gubal, macaxu gabat leeh daffeyaah, kay qaskarih abbobti kaadu kay xaqul daffeyak elle sugte ikkel, Dawud kee kay qaskar geytinteh, 'yaanamih xaaguh yoobbe.

⁷ Too waqdi qaskar abbobtik iyyeemih, «Isin, Benyam maraw! Dawud takkeenimik inkih baqurê-baaxo kee, qinab elle taysubuken baaxo siinih aceelem maay takkalen? Hinnay kaadu isi qaskarak abbobti sin abelem maay takkalen?

⁸ Titta yol akah geyteenim, tohih akkal maay kinni? Sammok xale baxi, Yiisâ-baxih qaxa yok gacam tubleenih, num siinik yoh mawarsinna. Yiisâ-baxay yi marak numuk teenah yanihiyya a saaku yi qidimih raarisiyyat yoh yanim abalihiiy, sammok xale baxi yi amot kaa heem abalih, tahat maqal haysite num siinit mayanaay yoh warse num siinit mayan» iyye.

⁹ Doweg too waqdi Saawul qaskar lih soolak sugeeh iyyeemih, «Anu Yiisâ-baxi, Noob magaalal Aciitúb-Acimalek fan gexah ubleh.

¹⁰ Sek-Acimalek kaah fayu YALLAL essereeh sarrak maaqo kee Golyaad-seef kaah acayih inni intih uble» iyye.

¹¹ Toh yoobbe waqdi Saawul, Sek-Acimalek kee kaah ramad elle hayta seekay Noob deqsita aracal sugga 'teh inkih farmo ruube. Too waqdi too mari inkih kaal yemeete.

¹² Sarrak Saawul Acimalekik iyyeemih, «Acimalekow, taabbeh inna?» iyye. Acimalek, «Aabbeh, yi amoytaw!»

¹³ «Hay toobbek, koo kee Yiisâ-baxi yi umaanel akah malisseenim maca? Kaah maaqo kee seef akah teceem macaa? Yallal fayu kaah akah essertem macaa? Usuk a saaku naqboyta yok yekkeeh, yi qidimih raarot yoh yanik» iyye.

¹⁴ Acimalek kaak iyyemii, «Lito qaskar abbobtih addat Dawud gide diggak le num mayana. Toh lih kaadu balluh kok yaniih, ku dacayrit tan qaskarak inkih abbah tanim kaa. Tohuk kalah kaadu ku buxah addal kulli num kaa yassakaxxe.

¹⁵ Anu Yallal fayu kaah akah esserem dibuk too saaku hinna. Yok abtu waytaamal malissah akak inte qaadah tu gactek, yi malikow, yoo kee yi mara tohuk naaxigem mannuk, toh nel mahaysin» kaak iyye.

¹⁶ Malik too waqdi kaak iyyeemih, «Acimalekow, koo kee koh ramad elli haa maral inkih rabi yamaateh yan» iyye.

¹⁷ Sarrak kaat dacayrih tan qaskaray soltahiyyak, «YALLIH seeka Dawud lih gacca 'teh yok aboonu waanamal malisseeh, Dawud kudam abalih yoh mawarsinnoonuy tibba iyyeenimih ken qida» iyye. Takkay immay kay qaskarak num YALLIH seekal qidimih gaba ruube cineh.

¹⁸ Toh yuble waqdi Saawul Dowegik, «Atu ken qid» iyye. Too waqdi Doweg too seeka inkih qide. Too ayroh addat Doweg bacra-taban kee koona sek qide.

¹⁹ Tohuk lakal Saawul, «Noob-magaalay seeka dabaaqah elle sugtehiyyal sugte labha kee agabuuy salaadaay qunxa urruuy laay illi kee danoonak tu macabinay inkih qida» iyyeh amri yecee. Tohim inkih qiden.

²⁰ Takkay immay Sek-Acimalek baxay migaaqah Abiyataar deqsitak yenehiyya kudeh Dawud fan yemeete.

²¹ Saawul YALLIH seeka qidem kaah warse.

²² Toh yoobbe waqdi Dawud kaak iyyemii, «Anu woo ayro Doweg wokkel uble waqdiik Saawuluh warselem eexegeh. Tonna'mmay ku maray rabba 'yehiyya abe rabih sabab tekkem yoo'mmay,

²³ ahak wadir mameysitinaay yo'lih idiy. Ahaysa yoo qidam faxa num koo qidam faxa. Yo'lih amaanah xiinetto» kaak iyye.