1 Samuwel 21 - NABUWWA KEE MALIKWA

DAWUD SAAWULUK KUDE

¹ Dawud Acimalek deqsita seekiy dabqah Noob deqsita aracal yenehiyya fan gexe. Acimalek kaa yuble waqdi kaah garaya'gidih meysih axaxitak afah yewqe. Too waqdi kaak iyyemii, «Wakali maleh dibuk macah temeete?» iyye.

² Dawud iyyeemih, «Malik caagidih emeete'mmay, anu akah emeete taama kee abam faxam malik, ‹Numuh mawarisin› yok iyyeh yan. Yi marah tu gactek keenit elle angaarawu waa arac keenih heeh anik,

³ maaqoh xagaanamah tu maay tan? Koona gaqamboyta tellek, yoh acuyaay; alle waytek, allinnaanim bah» iyye.

⁴ «Anu taahirroysen-gaqamboyta akke waytek, kulli num yakme gaqambo mayyu. Taahirroysen-gaqamboyta ku mari a dabaanah agabut fido faxeenih ane weeniih taahirih yanin ken tekkek, koh aceeyyo» kaak iyye.

⁵ Too waqdi Dawud kaal gacseemih, «Yi mari taturteh tan dago ayroorak xabba haanam taahirik yan. A saaku a gid yakke caagidih ugunne hinnaay, yi mari dago taamah gexa saaku kinni way taahirik gacan» iyye.

⁶ Too waqdi woo sek miizil naharak sugte gaqamboyta kalla heeh, laqin gaqamboytay woo waqdi alayseenihiyya heeh suge. Woo miizik kaleh suge gaqamboyta kaah yecee. Sek too gaqamboytay taahirik tanik sah gaqambo luk masuginna.

⁷ Too saaku Saawul saqih dacayrit yen marak abbah yen numuy migaaqah Doweg deqsitahiyya, diini gital tanim duudusa'gidih, wokke yemeeteh suge.

⁸ Too waqdi Dawud Acimalekik iyyeemih, «Malik amrih sissikuk ugteeh, silaacak tu gabat mabaahinniyooy, seef kinni way cabeh emeeteh ani'mmay, silaacak macaxu takku seef takku tabbixem baahey» kaak iyye.

⁹ Acimalek kaak iyyeemih, «Silaacak Golyaaday duma atu Eelâ-golol qiddehiyyak raaqe seef yo'lih yan. Too silac rikeek tan saroy sek haysitahiyyak darrek sarat cibuh yanik, faxxek beetit. Kaak sah akkel silac mabbixak» kaak iyye. Dawud iyyeemih, «Wohoysa woo silac annah yoh bah; kaak yayse silac rikel mayanak» iyye.

DAWUD GAT-MAGAALA FAN KUDE

¹⁰ Dawud Malik-Saawuluk too saaku tonnal kudeeh, sarrak Gat-magaalal reede malikiy migaaqah Aakis deqsitahiyya fan gexe.

¹¹ Too malikih gubal taamitak yen mari malikik iyyeemih, «Ah Dawuduy isi baaxol malikih yenehiyya hinnaa? Agbi, ‹Saawul mango alfi yakke mara qide'mmay Dawud mango tabanih alfih num qide› akah iyyeeh gad akah abe num hinnaa?» iyyen.

¹² Ta mari yaabe yab Dawudut kaxxa bagi way qideeh, malik Aakisik kaxxam cunxite.

¹³ Tonna leemik oson kay dariifal yaniinim yuble waqdi, cissit ane waa num ceelak yeneeh, cabboote numih innah gacak yen. Ken gabat yen way, qarik afal fiirisak yeneeh, isi afak laguuda debenil isik caxak yen.

¹⁴ Aakis toh yuble waqdi, «A num cabboote num kinnim maay able waytan?

¹⁵ Yi buxal cabu leela isih kibuk tan way, taway ta num akah bahteenim macaa? Ossotinah gersi cabuliy buxal amaan yoo waysiisu waah foocal yok ceele waytam abu waahiyya yoh bahteenii?» keenik iyye.