1 Samuwel 20 - NABUWWA KEE MALIKWA

YONAATAN DAWUD WADE

¹ Tohuk lakal Dawud Nayot deqsita aracay Raamal geytimahiyya cabeh, megloh Yonaatan fan yemeete. Yonaatanak iyyeemih, «Baahem macaay? Sugay! Baahem mannah yan biilu? Ku abba yoo akah qidam faxam macaay? Maca kaal baaheeh?» iyye.

² Yonaatan kaak iyyeemih, «Aleey! Koo qiddam matan. Yi abba qunxa caagid takku, kaxxa caagid takku, yok yaaqurem mali. Koo qidam faxaamal yok aaqaruk mananna. Koo akah qidam mali» kaak iyye.

³ Too waqdi Dawud kaak iyyemii, «Ku abba atu yoo kicintom yaaxigeeh, yok abu waam koh mawarisa. Macaay intek, yoo qidam faxam koh warsek, kaxxam yoh qaadettom kok yaaxigeh. Tonna'mmay ku abba xayi wakti yoo qideleemih, YALLAY waarahiyyah migaaqal xiibita» iyye.

⁴ Yonaatan kaak iyyeemih, «Hay tonnal, anu, atu faxxa hannaanim koh abeyyo» iyye.

⁵ Too waqdi Dawud kaak iyyeemih, «Beeri alsak biloy qiidih edde asaanahiyya kinnuk, malik lih maaqo edde akme ayro. Tonna'mmay kot bictek, beecih-carra fan tokke maamaataay buqreh addat sasot sugeyyo.

⁶ Ku abba maaqo elle yakmen aracal yoo wayu waa waqdi, ‹Dawud manke gexe?› iyyek, ‹Buxâ-mara lih qiidih asam faxaah; kulli sanatal buxâ-mara lih sadgat edde abna ayrooy, gexam faxak ruksat yoh ucuy›, iyyeeh, ‹Ruksat anu kaah ecee› yoh inxic.

⁷ Toh inta waqdi, ‹Meqeh hay› kok iyyek, yoo maxagam elle aaxigenno. Hinna'mmay yanqibem tublek, tonnal umam yol baaham faxam elle aaxigetto.

⁸ Ku maganah yi taagah tamaham ugdubba haay, yoh culte Yalla-kee-xagana mamakin. Qellat yot tublek, ku abba fan yoo mabenay, isih yoo qiddisit» kaak iyye.

⁹ Yonaatan kaal gacseemih, «Annah tanim inkinnah macsubin. Yi abba umam kol baaham faxam aaxaginniyoy, koh warisak en» kaak iyye.

¹⁰ Dawud iyyeemih, «Hay meqek, ku abbah atu ah warissa waqdi yinqibe kaa tekkek, iyyi yoh warsele?» iyye.

¹¹ Too waqdi Yonaatan, «Woo buqreh adda nee bey» kaak iyye. Tokke titta lih gexen.

¹² Sarrak Yonaatan Dawuduk iyyeemih, «YALLAY Israayil doore Dagelta kinni ni sumaq yakkay. Beera hununuh ta uddur kee beeca kaadu yi abba lih yaabeyyo. Ku giddinaamak meqem koh yacsubem ublek, farmo koh ruubeyyo.

¹³ Umam kol baahu waam faxam ublek, kaadu koo aysixxigeyyo. Koo aysixxige weeh, amaanah akah tasillime innah abe week, YALLI uma rabah yoo qiday. Toh too tiya. Taway kok axcemii, YALLI duma yi abba lih akah suge innah, ko'lih yanay, ku qaxa yakkay.

^14-16 Gersi tiyak kaadu kok axcemii, addunyal anim fanah yoo mahawweeninay, YALLI sinaamah akah muquk suge'nnah, atu kaadu meqem yoh ab. Rabe yoo tekkek, yi buxah mara mahawweeninay, meqem keenih ab. YALLI ku naqboytit baysa saaku, ni fanal yan Yalla-kee-xagani baye waama. Too Yalla-kee-xagana maktek, YALLIH digaala kol obtay» iyye.

¹⁷ Yonaatan Dawuduh isi nabsih kacanuh yassalle inna assalluk yen. Tohuk gexxaamah Dawud isil make waa'gidih, fiiruk geerah xibsiise.

¹⁸ Tohuk lakal kaak iyyeemih, «Beeri alsih biloh qiid kinnuk, maaqo elle yakmen aracal geytime waytek, ku raqti maqellitta.

¹⁹ Beeca raqtek, wonnal inkinnah raqtem meqe'nnah aaxigelon. Tonna-kinnuk woo duma edde tombooqore arac gexay, tokkel xaluuqah addat ombooqor» iyye.

^20-21 Sarrak kaadu iyyemii, «Awka inni lih baaheyyooh, too awka atu edde tombooqore ikke fan ruubeyyo. Qalaama aba numih innah, sidiica adda gaysê-baxa atu edde tani ikkeh ruubam celsiisak, kok xaqut xaqut qideyyo. Too waqdi awkak, ‹Gaysê-baxi ku xaqut radek, bah› axcih yoo toobbek, tonnal, YALLAY waarahiyyah migaaqal koo xiibita'mmay, nagayna tanim elle aaxigettooh, edde tombooqore ikkek awqetto.

²² Tonna hinna'mmay awkak, ‹Gaysê-baxi edde radem kok xer ikke› 'yaanam exce yoo tekkek, tonnal nagayna matanam elle aaxigettooh, YALLI tasillimem kok faxam elle aaxigetto» kaak iyye.

²³ «Koo kee yoo tittah culle Yalla-kee-xaganah tu gactek, tet way make waa mara YALLI nee abay» iyye.

²⁴ Yonaatan toh iyyek lakal, Dawud gexeh woo aracat yombooqore. Saawuluu, alsi edde bila qiidih edde asan ayro, maaqo elle bicsan arac yemeete.

²⁵ Sarrak gidaarat xayi aracay dumaak elle daffeyak yenehiyyal daffee. Yonaatan abbak foocal daffee; Abner kay xaquuk daffa 'ye. Dawud elle daffeyak yen arac foyyah raaqe.

²⁶ Too waqdi Saawul, Dawud akah amaate weem, taahirik ane wee kee tuk teena kaat tekke teeti 'yaanamah too saaku tu maxacco.

²⁷ Takkay immay too qiidih edde asan nammeyhaytoh ayro, Dawud elle daffeyak yen arac kaadu foyyah yanim yuble waqdi, Yonaatanak, «Yiisâ-baxi kimal akah amaaate weeh, a saaku kaadu akah amaate weem macaay?» iyye.

^28-29 Yonaatan kaak iyyeemih, «Dawud akak amaate weem, ‹Buxâ-mari yok Beetlacam magaalal sadgat abam faxaah too sadgatak yi saqal, ‹Maraaqin› yok iyyek, yi kataysa tekkek ku maganak buxâ-marat boysita'gidih yoo rub› axcuk yoo kallaceeh, Beetlacam fan gexe. Akah amaate weem tohu» iyye.

³⁰ Too waqdi Saawul Yonaatanat kaxxam bagcarriteeh, «Kee ilmoytow, Yiisâ-baxa qaxat gacteeh, is kee isi ina qawratak qida num tekkem away kok ableh an.

³¹ Yiisâ-baxi addunyal yanim fanah, a baaxoh malik matakkam mataaxiga inna? Away gexay akke kaa bah. Rabi kaal yamaatek» iyye.

³² Yonaatan abbal gacseemih, «Maca baaheeh macal raba?» iyye.

³³ Toh iyye waqdi Saawul, Yonaatan qidam faxeeh, macaxu kaa fan qide. Tonnal, Yonaatan isi abba Dawud qidam faxam yeexege.

³⁴ Tohuk gexxaamah Yonaatan maaqoh amok naqabut ugteh gexeeh, inkih tan ayro tu xage'kal ase. Toh alsi biloh qiidih edde asen ayrok nammeyhaytoh ayrok ten. Too naqabuh akah yenneqebbem, kay abba Dawudut abeh yan xaafu kee ceele-waytik ten.

³⁵ Too ayrol ciggilta ayro, kaa kee Dawud duma abte bicih xagnah, Dawud elle yan arac awka gabat hayya heeh gexe.

³⁶ Too awkak iyyeemih, «Taway wokke fan gexay, anu qidu waa gaysê-xaylo gorrisetto» iyye. Taaxige awki arduk gexe waqdi, Yonaatan gaysê-baxa kaak dagah amot qide.

³⁷ Awki gaysê-baxi elle rade arac yemeete waqdi, Yonaatan anay fayya haak, «Gaysê-baxi kok daga yanik,

³⁸ ama'kkel masoolinay, isissikay am» iyye. Too waqdi taaxige awki gaysê-baxa ukkuqqa heeh,

³⁹ tah akah takkem kinnim aaxige'kal, Yonaatan fan yuduure. Taham akah tekkem, Yonaatan kee Dawuduk kalih mari aaxaguk mananna.

⁴⁰ Tohuk lakal Yonaatan awkak, «A silac gabat beyay magaala uduur» iyye.

⁴¹ Awki gexek lakal, Dawud sasot edde suge xaluuqah addak yewqeeh, assakaxxiyyah gulubuh gacca 'yeh sidiica adda gommoh rade. Too waqdi Yonaatan kee kaa titta fugutteh, numuuy numul weeqah hayya hee. Dawuduk afqado Yonaatan kaak baxsimam xiqe cinteeh, Yonaatanak muxxi biyaakite.

⁴² Yonaatan Dawuduk annah iyye, «Amaan ko'lih yanay. Yoo kee koo kee nek rade marii, nanu abne Yalla-kee-xagana bayse waa mara YALLI ken abay nee abay» iyye. Tohuk lakal Dawud gexeeh, Yonaatan magaala fanah yuduure.