1 Samuwel 2 - NABUWWA KEE MALIKWA

CANNA ABTE FAYLA

¹ Canna YALLA faylisak inteemih, «Anu rufto akak liyom YALLA. YALLI yoh abe maqaanek gexxaamah qande baaheh, yoo niqibuk suge maral usuuleh. YALLI yoh abe maqaaneh kaxxam ruffu axce.

² YALLAY taahirik yanik sah yalli mayan. YALLIH bis lem matan. Nee dacrissam Yalla; kaak sa reebu mannu.

³ Sinaamey, hida caba. Kaxxiina xagarat hayya hayteenih mayaabina. YALLI kullim yaaxige Dagelta kinni; ummatta abba haytaamal inkih mekla.

⁴ Celeemah tan qaskarak gaysê-baxi yiddigilleh. Qamal maleela qande geyte.

⁵ Duma cayit suge mari qululut yanih, a saaku maaqô-goranah marin taamat taqabit yanin. Qululut suge mari qulul cabeh. Maxalaytoh sugte barra malciin xalteh; mango xaylo luk sugte barra foyyah raqte.

⁶ Qiddam YALLAAY; waddam YALLA. Sahda akeera rubtam kaa; rooci sahdat haytam kaa.

⁷ Gaddaleela sinam abtaah baacoytit sinam abtam kaa. Marak teena fayya haah; marak teena ramma haa.

⁸ Baacoytiitih suge mara caysah tu maleela gaddalisah. Malik xaylot ken missoysa; kaxxa marat ken missoysa. Baaxo elle tan rakiibo YALLIH imi; baad woo rakiiboh-bagul xise.

⁹ Kaal teemenem dacrissam kaa; uma mari dite-gadda yakke. Sahdayti nasri akah geyam isih le qande hinna.

¹⁰ YALLI isi naqboytit foyyisele; Kulliimik daga raaqa Dagelti qaraanak keenit kaayele. YALLI inkih tan addunyal ackumele. Isi malikit qande heeleeh; isih doore malikih nasri aceele» 'yaanam inte.

¹¹ Tohuk lakal Elkaana Raamal tan isi buxa fan yuduure. Takkay immay Samuweliy awki baxah yani wokkel Qeli deqsita seekil kaa caben. Tokkel, Qeli deqsita sek aba kaak iyyam abak, YALLIH taamat gace.

QELI-XAYLO

^12-13 Qeli qamal-uma xaylo luk yen. Kay xaylo YALLAT baaqid luk manannaay, hinnay kaadu YALLAH-aban-sadgatak seekah yaceen aftot baaqid luk manannon. Num sadgat aba'gidih wokke yamaate waqdi, ken taamah afat yan num sidiica af le malkaqay cado edde mudaanahiyya luk amma 'yaah,

¹⁴ cado addat akak alaysan buutik cado edde ayyaaquk yen. Sarrak too malkaqat awqinnaan cadoyta seekah acayuk yenen. Siilo fanah Yallih qibaadah yamaate marak, seeka cado elle beyak tenem tonnak ten.

¹⁵ Qeli-xayloy seekah tanihiyyak afat yen numu, too umaane dibuk hinnay, sadgatah qiden lac yasguudeh yan numuk, xayta kalla heeh carrise'kal yan waqdi, «Sek alaysen cado kok moggolak, solal kaah alaysa'gidih qasa cadoyta rike bah» axcuk yen.

¹⁶ Woo num, «Naharak gitah tanim abnay xicaay; xayta carrisneek lakal, isih faxxem beettok sug» kaak iyye kaa tekkek, «Aleey aleey! Awayiik yol ucuy; acee waytek dirkih beeyyo» axcuk yen.

¹⁷ Ta dambiy Qeli-xaylo abtahiyya YALLIH garil kaxxam gibduk ten. Oson ummatta YALLAH abta sadgat burutak yenen.

SAMUWEL KEE BUXÂ-MARA

¹⁸ Toh tekke way Samuwel awkah yeneeh, *baftak bicsen kameesit gacca 'yeh, YALLIH taama abak yen.

¹⁹ Kay ina, kulli sanatal tet baqli sadgat aba'gidih gexa waqdi, kaa'lih gexak teneeh; too waqdi baxah qunxa kames baxay xagarat culsah haanahiyya bicisseh gabat hayya hayteh kaah beyak ten.

²⁰ Too waqdi Qeli Elkaana kee Cannah dooqa abak yeneeh; Elkaanak, «YALLI a barrat a awkay YALLIH taamat hayteenihiyyah aftok, gersi xaylo koh yacaay» axcuk yen. Tohuk lakal isinni buxah gexak yenen.

²¹ YALLI Cannat barkat heeh, gersi lab-xayloh sidoc kee say-xayloh nammay xalte. Samuweliy awkah yanihiyya YALLIH taama elle aba aracal elle ambuk yembe.

QELI ISI XAYLO ELLE SAHITE'NNA

²² Qeli kaxxam idoolite saaku, kay xaylo Israayil marak abtam yoobbeh; gersim hinna'mmay, Yallih Nabnah-Siraqih afal taamitah yan agabu'lih xiinaanam keenik yoobbeh yen.

^23-24 Toh yoobbe waqdi keenik iyyeemih, «Annah tanim macah abtan? Isin abtan umaane kulli mari yoh warisak, yi xayloy annah tanim maabina. YALLIH marih garil siinik yan xaagi meqe xaagu hinna.

²⁵ Num numul umam baahek, woo umaanek YALLI kaa catam takkeh, immay, YALLAL dambi lem baahe num YALLIH digaalak iyyi cata? Maabina, yi xayloy» keenik iyye. Takkay immay YALLI uma raba keenih faxeemih sabbatah, abba yab moggolinnon.

²⁶ Samuweliy awkah yanihiyya ambuk elle yambeemil, YALLA kee ummatta kacanu gee.

YALLIH-NUM QELIH FARMO BAAHE.

²⁷ Ayrok teena Yallih-num Qeli fan yemeeteeh, Yallak baahe farmo kaah warse. Kaak iyyeemih, «YALLI kok iyyaamah, ‹Ku buxah mara Masri-marih naqoosah ten saaku, Haaruunuh umbulle.

²⁸ Yi taamat gacak, yoh aban sadgatah baahan saqa elle qidan aracal sadgatah baahan saqa yasguudeenim kee, yoo elle yaqbuden aracal qerto ruubaanam kee, rikeek tan saroy sek haysitahiyyat gacca 'yeenih fayu yol esseraana'gidih, inkih tan Israayil ummatih addak yi seeka ken abe. Israayil ummat yoh carrisan sadgatih cadok exxa kenim takkay› 'yaanam exce.

²⁹ Hay tonnal, yi mari yoh baaha sadgatah koo kee ku xaylo inti macah rubtan? Sugay, atu yok isi xaylo mannal tassakaxxeeh? Yi mari baahah yan sadgatih cadok aysinnaan exxah adoobat gabulteenim siinik able waam makkalina.

³⁰ Yoo YALLAY Israayil doore Dagelta kinnihiyya, ku buxah marak atu akak radde gulubut yan mari qumri keenik yanim fan yi taamah taamitta seeka akkelon 'yaanamal, duma xagana keenih culeh suge. Awayah tu gactek, woo xagni bagul keenih maan. Yoo yaynabe mara aynabeyyoh, yoo buri intit yable mara buri intit ableyyo.

³¹ Taway nagay yoo ankacisay raq. Ku buxah marih addat bar naba num akah ane waa innah, atu akah tooboke kedoh exxa kee ku buxah marak furrayna qunxih cabaariseyyo. Toh edde abu waa wakti yemeeteh.

³² Israayiliy ku abbah saqlih xayloh tanihiyyah abu waa maqaane tabalu wayta waqdi aysinettooh, yi aracat tekkem tabalu wayta waqdi bagi kok cararele. Ku buxah mari tahak wadir qumrih idoolitta 'yaanam fan masugan.

³³ Kok rade marak inki baxay yoo yakdumu waahiyya sugeleeh; takkay immay inti weeleeh, niya kaak addigillele. Kok rade mari inkih uma rabah rabele.

³⁴ Ku xaylo Cofni kee Fincas nammeyak inki ayroh addat rabelon. Too waqdi anu inxicca excem numma kinnim aaxigetto.

³⁵ Imaan yol le numuy anu aba axcem abahiyya seekih heeyyo. Too seekik ramad raaqele. Too ramad anu dooru waa malik lih gacca 'yeh, yoh taamitele.

³⁶ Kok rade marak saaboh raaqinnaan mari a seekiy anu dooru waahiyyah durruyyatal lakqo kee maaqô-kallacih gexele. «Labhay, maaqô-gide edde geyna taamat nee haa; sin akdumennok», axcuk ken kallacelon 'yaanam kok axce› » kaak iyye.