1 Samuwel 19 - NABUWWA KEE MALIKWA

SAAWUL, DAWUD QIDAM FAXE

¹ Saawul, isi baxa Yonaatan kee kay gubal taamita marah inkih Dawud qidam faxam warse. Yonaatan Dawud kaxxam kicinuk yeneeh;

² tonna-leemik Dawuduk, «Yi abba koo qidam faxak, beera cubbi macabin; aracak teenat qellitay edde idiy.

³ Atu uqurat edde tani ikkeh gari amma inna waqdi, yi abbah foocal sollu exceh ku giddinaamat kaa'lih yaabeyyooh; iyyam yellek, koo aysixxigeyyo» kaak iyye.

⁴ Sarrak Yonaatan abbâ garil Dawud kaxxam fayliseeh, «Malikow, Dawuduy ku naqasuh yani, umaane takkeemih kol baahem málik, umam kaak maabin. Koh kaxxa cato takkeemik sah, kol baahem málik, yanay kaa inxic.

⁵ Yot maca akkele axce'kal Golyaadat qeebi abeh qideeh; YALLI Israayilih nasri edde yecee. Woo marak neyse saaku, atu isih ruffa intek, a saaku, Dawuduy tuh umaane baahe weel umam akah bahtam faxxaah, sabab maleh kaa akah qiddam faxxam macaay?» kaak iyye.

⁶ Too waqdi Saawul Yonaatan kaak iyyem numma kinnim yubleeh, «Tahaysa Dawud qide waamah YALLIH migaaqal xiibitah» iyye.

⁷ Toh yoobbe waqdi, Yonaatan Dawuduh seeceeh, kay abba iyyem kaah warseh. Sarrak Saawul fan kaa baaheeh, dumaak edde suge kay taamah kaa gacse.

⁸ Qeebi kaadu qagteeh; too waqdi Dawud carbi-booxa fan gexe. Tokkel Dawud Filistiin marat kaxxa qeebiy edde kudaanahiyya, keenit abe.

⁹ Ayrok teena YALLI Saawulut ginni ruubeeh; too ginni xagar kaak yimlikeh. Too waqdi buxah addal macaxu gabat luk daffeyak suge. Dawud wokkel *begena digirak suge.

¹⁰ Saawul too waqdi macaxu kaat haa'gidih kaa fan qide. Takkay immay Dawud woo macaxuk walel isi raaqiseeh; macaxi kaak tatreh gidaarat kareerak raqqa 'ye. Too waqdi Dawud too bar kudeh gexe.

¹¹ Too barat edde, Saawul Dawud buxal yanim keh wagtaana'gidih, sinam ruube. «A barat edde yanim keh wagga haay, buxal sugek, saaku qiday kaa caba» iyye. Dawud barra Miikal baqalak inteemih, «Ta baraak kude waytek, beera koo qideloonum ixig» kaak inte.

¹² Too waqdi qarik amok taagatak kaa oobisse. Tokkek kudeh gexe.

¹³ Tohuk lakal buxah addal qibaadah luk sugte gabak bicsen ceelo bahha hayteeh qarkaytô-bagul hayya hayteh, too ceelo sarot uybududda hayteek lakal, amô-ginah wadar dagooruk bicsen barkuma akah hayte.

¹⁴ Saawul ruube mari yemeete waqdi, Miikal, «Dawud lakmisah qarkaytô-bagul yan» keenik inte.

¹⁵ Too mari Saawuluh toh warse waqdi, Saawul keenik iyyeemih, «Gexay isinni intih ubula. Lakmisak sugek, ukkuqqa kaa haay akke kaa baaha; anu kaa qideyyok» keenik iyye.

¹⁶ Too mari Dawud buxah yuduureeh; qari culeenih wagten waqdi, gabak bicsen ceelo kee wadar xagooruk bicsen barkuma qarkaytô-bagul keenih sugte.

¹⁷ Toh Saawuluh warsen waqdi, Miikalak, «Ama» iyyeh farmo ruube. Is temeete waqdi, Miikalak, «Atu yoo akah ayrisseeh naqboyta yok akah rubtem macaa?» teetik iyye. Is kaal gacisseemih, « ‹Yoo ruube waytek, koo qideyyo› yok iyyeeh; too waqdi kaa ruube» inte.

¹⁸ Toh inkih tekke waqdi, Dawud kudeh, Saamuweliy Raama magaalal yanihiyya fan gexe. Tokkel Saawul kaal bahha heem inkih kaah warse. Tohuk lakal Dawud kee Samuwel Nayot deqsita arac fan gexeenih wokkel elle yeeden.

¹⁹ Sarrak Saawul, Dawud Nayot deqsita aracay Raamal geytimahiyyal yani 'yaanam yoobbe.

²⁰ Too waqdi kaa yaxayu waa mara kaah ruube. Woo mari, Samuwel foocat akak yan nabuwway butta takkeey nabuwwah innah yabtah xongoltahiyya yublen. Yallak keenil obte *Roocaaniyya too mara kaadu timlikeeh, too waqdi Saawul ruube mari woo marat yengeleeh, kaadu nabuwwah innah yaabakaay xongolak yenen.

²¹ Saawul toh yoobbe waqdi gersi mara ruube. Too mari kaadu naharsi marak kaxxih too marat yengeleeniih, nabuwwah innah yaabakaay xongolak yenen. Kaadu sidochaytô gabah sinam kaah ruubeeh too mari kaadu dumî-mari abem abe.

²² Ellecabol isih Raamâ-magaala fan yemeete. Seku deqsita aracal yen kaxxam naba qeela gufe waqdi, Samuwel kee Dawud elle tani'kke wokkel suge marak essere. Too mari, «Samuwel kee Dawud Nayotul tan» kaak iyyen.

²³ Usuk wokke gexak elle suge'kkel, Yallih-Roocaaniyya kaa kaadu timlikeeh, Nayot guffa haam fan nabuwwah innah yaabakaay xongolak Nayot fan yemeete.

²⁴ Tokkel gersi marak kaxxih dallaabiyay edde suge isik kalla heeh Samuwel foocal nabuwwah innah yaabakaay xongolak yen. Laqo kee bar inkih tonnal inaaqat suge. «Saawuluuy kinni way nabi yekke kunna!» 'yaanamih missili tokkek raaqe.