1 Samuwel 18 - NABUWWA KEE MALIKWA

YONAATAN DAWUDUH ABE BICA

¹ Saawul Dawud lih abak suge yaabak gaba kalla hee waqdi, Saawul-baxay Yonaatan migaq luk yenehiyya Dawud kaxxam yossokoote. Isi nabsih kacanuh luk yen inna, kaah yesselle.

² Too saakuk wadir Saawul, Dawud isi buxal daffeyseeh, kay abbah-buxa aduuri kaa mahanna.

³ Yonaatan Dawudut abeh yan assakootiyyak gexxaamah, aggiriqe sinni fantaaxaw itta luk haysiten.

⁴ Yonaatan isih luk suge dallaabiya kee qeebik isinni edde reebisan biriitak bicsen sartanaay seefiiy gaysê-baxa kee bagi-qarum inkih kaah yecee.

⁵ Dawud, Saawul kaa akah ruubinnaan taama gabal kaah bicca 'teh adaaruk yen. Tonna-leemiik Saawul qaskarak exxak teenah abba kaa abe. Tohuk gexxaamah Saawul qaskarih abbobti kee raqqa 'ye mari inkih ruffa iyye.

SAAWUL, DAWUDUH LE KUUXEWAYNAANA

⁶ Dawud, Filistiin-num qidda heeh amaatuk sugeeh; qaskar kaadu buxa fan elle amaatuk sugte ikkel, Israayil magaaloolik yemeete agbi gad abakaay argaduk karambo kee aki duyye aagaruk, Malik-Saawuluh matren.

⁷ Too agbi gadah, «Saawul mango alfi yakke mara qide'mmay Dawud mango tabanih alfih num qide» iyyen.

⁸ Saawul tah yoobbe waqdi, faxe cineeh kaxxam bagcarrite. «A agbi yok dibuk mango alfih num qide iyyaanaah, Dawuduk mango tabanih alfih num qide iyyeenim hinnaa? Yi lakal malik kaa abaanam faxaanam hinna?» iyye.

⁹ Tohuk gexxaamah kuuxewaynaan kee dareemu Dawuduh afqadot hee.

^10-11 Nammayhaytoh ayro garciik Yalli ruube ginni Saawulut culeeh xagar kaak yimlikeh. Isi qarih addal cissit ane sinni numih innah gabaak yaabe. Too waqdi Dawud kulli saaku akah abak yene'nnah *begena aagaruk kaa sahhaloysam yekkele waqdi, Saawul, «A gabat abbixe macaxuh kaat heeh gidaarat kaa maay xakbiso?» 'yaanam kaal temeete. Tohuk lakal woo macaxu namma adda kaat haa'gidih qide. Dawuduh tu gactek, namma adda inkih walel is raaqise.

¹² Too ayrok wadir Saawul, YALLI isi cabeeh Dawud lih yanim yubleeh, Dawuduk meysitak raaqe.

¹³ Tonna-leemik isi buxak beyya kaa heeh, alfi takke qaskarak abba kaa abe. Dawud isi marak foocat gacca 'yeh carbi-booxa fan ken bee.

¹⁴ YALLI Dawud lih yeneemih sabbatah, Dawud abba hannaanim gabal kaah bicak ten.

¹⁵ Saawul Dawuduh gabal kullim bictam yuble waqdi, meysih dumak lafteh.

¹⁶ Takkay immay kaak kalih maray Israayil kee Yuudâ rasul yenehiyya inkih, carbi aben waqdi Dawud ken miraaciseemih sabbatah, kaa yikcinen.

SAAWUL ISI BAXÁ RIHIMIH DAWUDUH YECEE

¹⁷ Ayrok teena Saawul Dawuduk iyyeemih, «Inni baxá digibih koh abam faxa. Awkák migaq Meeraba. Tonna'mmay inni baxá koh abaamak dumalaa, agiruh yan qaskariitay digga le takkeemiiy, YALLIH migaaqal abna carbi abettoomul, koo kee yoo naharak titta geynam meqe» kaak iyye. Saawul woh akah iyyemii, tonnal Filistiin mari carbil kaa qideleeh isih kaa qidaamak ken gabat kaa qidsiisa'gidik ten.

¹⁸ Dawud, «Tu'loowot yan num hinniyooy; malik ballu yakkeenim caddik gufa num makka» iyye.

¹⁹ Takkay immay Saawuluu, Dawuduk, Meerab rihimih koh abeyyo edde iyye waktit, kaa hinna'mmay, Mecuyaal deqsitta baaxok yemeete Qadriyel deqsita numuh tet abe.

²⁰ Saawuluk gersi baxáy Miikal deqsittahiyya Dawud tikcine. Saawul woh yoobbe waqdi nabam yossokoote.

²¹ Ahaysa, «Miikal kaah abeyyooh, tet gabat oflot akah rada innah, kaak abeyyo. Ellecaboh Filistiin marih gabat rabele» 'yaanam isi bagul yuscube. Tohuk lakal Dawuduk qagseh iyyeemih, «Ballu yok akkettooh baxá koh abeyyo» kaak iyye.

²² Kay gubal taamat yan marak, «Dibuk tani ikkel, ‹Malik koo yossokooteh; kay gubal taamita mari kaadu koo kicnaah; malikil kay baxá Miikal koh digbisa'gidih, macah essere wayta? A nasiib isik maruubitin› kaak inxica» iyye.

²³ Too mari Saawul keenik akah inxicca 'ye innah kaak iyyen. Usuk too waqdi keenil gacseemih, «Yi innah yan miskintuy tu'loowot suge weehiyyal malik ballu yakkeenim kaxxaama» iyye.

²⁴ Too waqdi woo mari Dawud keenil gacsem gexeenih Saawuluh warse.

²⁵ Tohuk lakal Saawul kaadu too maral farmo kaah ruubeeh iyyeemih, «Malik, ‹Isi baxál alkumuh bool yakke Filistiin mara qidda hay labiinak kombor-arab kalla haay yoh keenik bah. Tohuk sah kok faxam mayyuk, tohum ni naqboytiitih digaala akkele, kok iyyah yan› inxicay kaah warisa» 'yaanamih farmo kaah ruube. Saawul toh kaa elle qidsiisa'gidih iyyeemik ten.

²⁶ Saawul gubal taamita kay doolatih maray farmo elle ruubehiyya a farmo Dawuduh warsen. Dawud ah yoobbe waqdi yifriceeh, Saawul ballu yakkem yossokooteh. Digib yakkeemik naharat,

²⁷ Dawud kee kay mara gexxeeh; Filistiin marak namma bool num qideenih yemeeten. Kombor-arooba bahha heeh, malikik foocal lowwa heeh, namma bool duudussa kaal hee. Tohuk wadir, Saawul is baxá rihimih kaah yecee.

²⁸ Too waqdi Saawul, YALLI Dawud lih yanim yeexegeeh, kay baxá kaa kicnam digga hee.

²⁹ Tohuk gexxaamah Dawuduk kaxxa meysih meysiteeh, rabba 'yam fan naqboytah kaak suge.

³⁰ Filistiin-mari too dabanal Israayil-marah gaaduh gexakaay qeebi keenit abak sugen. Too qeebil inkih, gersi qaskar abbobti hinna'mmay, Dawud keenil ansaruk yen. Tohuk gexxaamah kay migaq kulli ikkel yontoobbe.