1 Samuwel 17 - NABUWWA KEE MALIKWA

GOLYAAD ISRAAYIL MARAH QEEBIH SEECE

¹ Filistiin mari Yuudâ-rasul geytinta Sooko deqsitta mandaral gaaboowe. Efes-Dammin deqsita aracay Sooko kee Qadeeka fanat geytimahiyyal yinfiddigen.

² Malik Saawul kee Israayil qaskar qeebih bical gacca 'yeenih Eela deqsitta golol yinfiddigen.

³ Filistiin mari woo golok kabuk teenal qalel rooruh gaceeh; aki kabul Israayil mari qalel rooruh gaceeh, fanat golo keenik raqte.

^4-5 Filistiin qaskarak addak Golyaad deqsita celem bukka 'yeeh, Israayil qaskarih addak qeebi kaa'lih aba num yanim keh essere. A num Gat deqsitta magaalal yoobokeh yeneeh, xexxaarah lica cusul kee garab akkuk yeneeh, isik edde waasan nacaasak bicsen kameesiy qilsah kontom kee malcina kiilo yakkehiyya kee, amo edde dacrisan nacaasak bicsen kalabtat sartanah yen.

⁶ Ibitte kaak nacaasak bicsen carbi silaacak isinni edde dacrisan sartanat sartanah ten. Tohuk kalah kaadu, nacaasak bicsen macaxuy xer rikel qidaana sunkut luk yen.

⁷ Kalah kaadu, lafudda le caxxi macaxu luk yen. A macaxuk af malcina kiilo yakke birtak bicseenih yenen. Aki qaskariiti foocat kay gob gabat hayya heeh kaak gexak yen.

⁸ Golyaad sollu 'yeh, Israayil qaskarak, «Isin Saawul marah tanin; anuuy Filistiin-celeemak numuk teena kinniyo. Away isin qeebi nummah duudettoonum siinit celta? Duudettoonum siinit celtek, yo'lih yaame'gidih, sin marak numuk teena ruuba.

⁹ Yok yeyseh yoo qidek, nanu sin naqoosa akkenno. Takkay immay kaak eyseeh kaa qidek, isin ni naqoosa akketton.

¹⁰ Taway hay, Israayil qaskarey, qeebi yo'lih abu waa num siinit yenek, yawqay» iyye.

¹¹ Saawul kee kay qaskar Golyaad yab toobbe waqdi, warigga keenit raddeeh; kaxxa cunxo ken tibbixe.

DAWUD CARBI BOOXA GEXE

¹² Dawud Efrat deqsita gulubuh gacisa; Yiisa deqsita numih baxak ten. Elle yoobokem, Yuudâ rasul tan Beetlacam-magaala. Yiisa lab xaylok bacaar luk yeneeh, Saawul malikih yen dabaanal Yiisa barak idoolite numuh yen.

¹³ Xaylok sidoc kaak Saawul lih carbi booxa fan gexeh yen. Saqalah keenik tenem Aliyabaay; Aliyabal kataytam Abinadabak ten. Abinadabal kataytam Samma deqsita awkak ten.

¹⁴ Dawud keenik inkih barah qunxa salafti-baxak ten.

¹⁵ Qeebi elle yakku waa aracaak, wadir illi elle dacrisa arac fan gexak gacak yen.

¹⁶ Golyaad, morootom ayroh gide inki ayro namma adda carra kee saaku, «Siinik qeebih-booxal yoh obtam iyya?» axcuk, hiddoowak keenil suge.

DAWUD SAAWUL QASKAR DIYAARA'GID YEMEETE

¹⁷ Ayrok teena Yiisa Dawuduk iyyeemih, «Alen alok tabna kiilo takkem kee, a tabna gaqambo sissikuk beyay, ku toobokoy woo aracal tanihiyyah bey.

¹⁸ Qittak a tabna koxxa kaadu beyay, alfi-abbah yan numuh aceetto. Ku tooboko akah tani'nna wagga haay; tamaate waqdi ken tubleeh nagay yaniinimih asta gabat bah.

¹⁹ Malik Saawul kee ku tooboko gersi Israayil mari inkih Eelâ-golol Filistiin marih qeebit yanin» kaak iyye.

²⁰ Dawud maaca dibroh ugutta 'yeeh, illit gersi mara cabba heeh, kay abba kaah elle warse innal, usuk kaal yecee maaqo gabat hayya heeh gexe. Dawud, Israayil mari carbi booxa fanah gexaah, qeebi tirtirisan waqdi, yemeete.

²¹ Filistiin mara kee Israayil marak kulli mariiy fooca kee foocah sittat gacca 'yeenih, qeebi-arac yibbixeenih yenen.

²² Dawud kaal ruuben maaqo, maaqoh afat yen numul cabba heeh, qeebi elle yakkem faxa'kke fan yerdeh toobokot yongooroweeh, salaamatta keenih abe.

²³ Usuk too yaabat ken lih yaaba waqdi, Golyaad elle suge aracak bisoh taturra 'yeh, dumaak akah iyyeh suge innah, Israayil qaskarak away kaadu, «Yo'lih taameenim maay duddan?» iyye. Dawud tah kaak yoobbe.

²⁴ Israayil mari Golyaad yuble waqdi, cunxo gexxaamah kudeenih.

²⁵ Sittak iyyeenimih, «A num Israayil mara elle bursuta'nna ubula» iyyen. «Malik Saawul a num qidu waa numuh kaxxa acwa aceeleeh, kaadu isi baxá digibih kaah abele. Kay buxah marak gabbara mabeya» sittak iyyen.

²⁶ Dawud isi garil suge marak iyyeemih, «A Filistiin num qideh, Israayil mara a migaq-sinnak currih yayyaaqu waa numuh maca aceelon? A Filistiiniitih diini mali fiiruk iyya yekke waqdiiy; waara Yallih qaskarat qeebi aba'gid akah yemeetem?» iyye.

²⁷ Too waqdi oson Golyaad qidu waa numuh aboonu waanam kaah warsen.

²⁸ Aliyab deqsita numuy Dawuduk saqalah yene Dawud sinam lih yaabah yoobbe waqdi, kaat bagcarriteh kaak iyyeemih, «Atu akkel maca abta? Woo bacarih tan baaxol dibuk raaqe illit dacayrih iyyi raaqe? A kaxxam isit yakkalow! Afqadot uma cisab litom aaxigeh. Qeebi wagitta'gidih temeete inna?» kaak iyye.

²⁹ Too waqdi Dawud saqalak iyyemii, «Away maca baaheeh? Essero kinni way esseram maduuda innaa?» kaak iyye.

³⁰ Kaadu gersi num fan gexeeh, naharak esserem kaa essere. Esserinnaan num naharsi mari iyyem kaak iyye.

³¹ Inkinki mari Dawud iyyem yoobbeeniih, wohim Saawuluh warsen. Saawul too waqdi Dawuduh farmo ruube.

³² Dawud kay fan yemeete waqdi, Saawuluk, «Yi amoytaw, a Filistiin-numuk faxe num meysite waama. Anu away gexeh qeebi kaat abeyyo» iyye.

³³ Saawuluuy, «Aleey, atu awkaay; usuk furraynu tikki 'yeemiiy a saaku fan carbit yan num kinnuk, qeebi kaat abtam madudda» kaak iyye.

³⁴ Dawuduuy, «Yi amoytaw, anu yi abbah illi dacrisaah; lubak akkiiy, hinnay kaadu, gersi alluwwa woo illik anaqto beytek,

³⁵ lakat eredda akak exceh woo anaqto raaqisa. Woo lubak yakku, hinnay kaadu, faxe ala takkeemih yoo fan yenkeleebe kaa tekkek, katlal xabba kaak heeh aatakuk kaa qidak suge.

³⁶ Lubokwa kee gersi alluwwa qideeh; a Filistiin-numuy diini aalle waah, waara Yallih qaskarih migaq baysahiyyak toh abeyyo.

³⁷ YALLAY lubokwa kee gersi alluwwak yoo catehiyya a Filistiin numuk yoo catele» iyye. Saawuluuy, «Meqeh hay, YALLI ko'lih yanayak gex» kaak iyye.

³⁸ Sarrak qeebik isinni edde reebisan biriitak bicsen sartan xagarat haa'gidih kaah yeceeh, amo edde dacrisan nacaasak bicsen kalabta kaah yecee.

³⁹ Too waqdi Dawud Saawul seef woo qeebik isinni edde reebisan biriitak bicsen xagarat haan sartanak bagul hayya heeh, ibah gexam gabbate. Takkay immay duma a gid takke duyye akkuqe weemih sabbatah, gexam yeffereh. Too waqdi Saawuluk, «A gid takke duyye luk qeebi abam maduuda. Ahayduma a gid takke duyye ukkuqeh maaxiga» iyye. Sarrak too duyye isik kaleeh,

⁴⁰ saq dacrisa waqdi gabat haak suge caxxa hirgitta heeh, sarrak buyyi-garik saytun xeetik konooy ukkuqqu heeh, oloh addat hee. Sarrakaay wanxef bicsitti heeh, Golyaadat qeebi aba'gidih gexe.

DAWUD GOLYAADAK YEYSEH

⁴¹ Woo Filistiin-numuh tu gactek, gob kaah yakkuqe numuy foocat kaak gexahiyya lih Dawud fan yemeete.

⁴² Sarrak Dawud nagay yismiteek ellecabol kaxxam kaa bursute. Macaay inteenik, Dawud qunxa numuy meqe xagar le kinnim kaak yuble.

⁴³ Too waqdi Dawuduk iyyemii, «Amah maca akak abta caxxay? Yoo kuta maay takkale?» kaak iyyeeh, yalla iyyeh yaqbude duyyeh migaq xagga heeh kaa abaare.

⁴⁴ Sarrakaay Dawuduk, «Qeebi yo'lih abtuh am. Raysa kok guma kee alluwwâ-cado abeyyok» iyye.

⁴⁵ Too waqdi Dawuduuy, «Atu seefiiy macaxu kee xer rikel qidan af le birta macaxu haysitteh temeete. Yoh tu gactek, Israayil qaskaray atu bursuttehiyyah Dageltih migaaqal emeete. Usuk YALLAY Nabaamak Nabahiyya.

⁴⁶ Ta saaku YALLI yi gabah addat koo heele. Anu kok qeebih ayseyyooh, moyya kok kaleyyo. Filistiin marih raysi guma kee alluwwâ-gadda akkele. Tohuk wadir Israayil mari Yalla lem baadal yan mari inkih aabbele.

⁴⁷ Akkel yan mari kaadu YALLI isi mara cata'gidih seef kee macaxu faxe waam ablelon. Qeebil taysu waytam YALLAAY; takkeenimik ni gabat sin heele» kaak iyye.

⁴⁸ Tohuk lakal Golyaad Dawud fanah kaadu bisoh gexeeh, Dawud kaadu *Filistiin macaxi elle yani'kke fan Golyaadat qeebi aba'gidih sissikuk ereddi 'yeh, fooca fan gexe.

⁴⁹ Too waqdi olot gaba rubbu heeh, xaa eyyeqqa heeh woo xaa Golyaadat hee. Woo xaa qansat kaak rade. Too waqdi moyyâ-lafa kaak tiddigilleh baaxol afah rade.

⁵⁰ Tonnal Dawud seef sinnuk, wanxef kee xaat Golyaadak yeyseh.

⁵¹ Sarrak arduk kaa fan gexeeh, amol kaak sollu 'yeeh, kay seef siibba heeh, moyya kaak edde yirgiqeh kaa qide. Filistiin mari Golyaad rabem yuble waqdi inkih kuden.

⁵² Israayil kee Yuudâ-mariiy deero abak lakat keenik arduk, Gat deqsitta magaalah culmeyna kee Ekron deqsitta magaalah culmeyna guffa haanam fan ken yeyredden. Filistiin-mari Saqrayimik Gat kee Ekron fan gexa gital tinnikissem kee madallah raqtem yekken.

⁵³ Israayil mari wokkek yuduure waqdi, Filistiin mari qeebih elle yinfiddigeh suge aracal caben duyye keenik buuben.

⁵⁴ Dawud Golyaad-moyya Yarusalaam fan beeh, kay silac gabat luk raaqeeh, isi siraqih addal hee.

⁵⁵ Saawul naharak Dawud Golyaadat qeebi aba'gidih gexah yuble waqdi, qaskarak abbah yen numuy migaaqah Abner deqsitahiyyak, «A awki iyyin baxay?» axcuk essereh yen. Woo numuy, «Yi amoytaw, anu maaxiga» 'yaanam kaal gacse.

⁵⁶ Malikiiy, «Hay, gexay esseray amey» kaak iyye.

⁵⁷ Sarra Dawud Golyaad qidda heek wadir yuduure waqdi, Abner Saawul fan kaa bee. Dawud too waqdi Golyaad-moyya gabat abbaxuk yen.

⁵⁸ Kaa baahen waqdi Saawul kaa essereeh, «Furraynow, iyyin baxa kinnito?» kaak iyye. Dawud, «Anu ku naqasuh yan Yiisay Beetlacamal yoobokehiyyah baxa kinniyo» kaak iyye.