1 Samuwel 16 - NABUWWA KEE MALIKWA

YALLI DAWUD MALIK YAKKE'GIDIH DOORE

¹ YALLI Samuwelik annah iyye. «Anu ahak wadir malik yakkem kaak mafaxak, atu Saawuluh akah qaaddam macaay? Away caxâ-xaylok bicsen *saliid (zeyti) gabat haay Beetlacam deqsitta magaalal yan Yiisa deqsita numih buxa gex. Kay xaylok tiik teena malik abuh dooreh an» kaak iyye.

² Samuwel YALLAL gacseemih, «Saawul ah yoobbek yoo qidelek, ah mannal abu duudah?» iyye. YALLI too waqdi annah kaak iyye. «Dahalto gabat luk gexaay, ‹YALLAH sadgat aba'gidih emeete› inxic» kaak iyye.

³ «Woo sadgat arac yamaate'gidih Yiisah seecaay, too waqdi abtu waytam anu koh warseyyo. Anu koh warisu waa num malik yakke'gidih amo kaak askutetto» kaak iyye.

⁴ Samuwel YALLI kaak aba elle iyye'nnal abeeh, Beetlacam magaala gexe. Tokkel too magaalah-abbobti, Samuwel tuble waqdi, wariggitteh intemii, «Ni abbaw, akah temeetem nagayna innaa?» kaak iyyen.

⁵ Too waqdi usuk keenil gacseemih, «Anu akke akah emeetem nagaynaay; YALLAH sadgat aba'gidih emeete. Isin isinni taahirroysay wokke fan yo'lih gexa» keenik iyye. Kalah kaadu Yiisa kee kay xaylok kaadu «Isinni taahirroysay woo sadgat arac fan ama» iyye.

⁶ Yiisa kee kay xaylo woo sadgat-arac temeete waqdi, Samuwel Yiisâ-xaylok tiik teenay Aliyab deqsita yuble waqdi, «YALLI malikih doorem ta numu» 'yaanam isi bagih addat yuscube.

⁷ YALLIIY Samuwelik annah iyye. «Anu doore num a num hinna. Woo num xeeriih qaxmeqe numu. Takkay immay qax-maqaane kee xexxaarat tu kaak mawan. Anu sahda kinni mara elle aaxigem, sahda sahda elle taaxige gurra hinna. Sahda, sahdak irô-xagar wagittaah; yoh tu gactek, sahdayti nummaak kinni num kaak wagita» iyye.

⁸ Tohuk lakal Yiisa Abinadab deqsita baxah seeceh, Samuwelil kaa baaheh. Samuweliiy, «YALLI a awka kaadu madoorinna» iyye.

⁹ Yiisa kaadu Samma deqsita baxa baaheeh; Samuwel, «A awka kaadu YALLI madoorinna» kaak iyye.

¹⁰ Tonnal Yiisa, xaylok malciin inkih kaal baaheeh; Samuweliiy, «YALLI a urruk num madoorinna» kaak iyye.

¹¹ Sarrak Samuwel Yiisak, «Ahak kalah gersi xaylo maay lito?» kaak iyye. Too waqdi Yiisa, «Urruk inkih qunxa awki yanih immay afal illi dacayrit yan» kaak iyye. Samuweliiy, «Gexay ama kaak inxic. Usuk amaate'kal, sadgat mabnak» kaak iyye.

¹² Tohuk gexxaamah Yiisa kay xaylok inkih qunxa baxay Dawud deqsitak yeneh farmo ruube. Dawud furrayniinot meqe xagar kee qax-maqaane inkih luk yen. Too waqdi YALLI Samuwelik, «Anu doore num tamah kaak, amol sukuti kaak hayis» iyye.

¹³ Samuweliiy Dawud toobokoh foocal saliidit amo kaak yuskute. Too waqdiik YALLI Dawudul isi *Roocaaniyya oobiseeh; too saakuk xabba haanam YALLIH Roocaaniyya kaa'lih ten. Tohuk lakal Samuwel Raama fan yuduure.

DAWUD SAAWUL TAAMAT GACE

¹⁴ YALLIH Roocaaniyya Saawul xagarak gexxeeh; YALLI kaal ruube ginni kaa biyaakeh.

¹⁵ Buxal kaah taamita mari tah yuble waqdi, kaak iyyemii, «Yalli kol ruube ginni koo biyaakah yanik,

¹⁶ baaha nek intek, *begena nagay yaagure num koh bahnu wayna. Yalli kol ruube ginni bahta waqdi, too num too begenal koo sahhaloyseleeh; too waqdi cabettooh nagay akketto» kaak iyyen.

¹⁷ Saawul toh yoobbe waqdi, «Gexay nagay digir yaaxige num yoh baaha» iyye.

¹⁸ Tokkel suge marak numuk teeni iyyeemih, «Beetlacam yan Yiisa deqsita num gadah yaaguren duyye yaagure baxa le. Too awki qaxti maqaane kee agiranna inkih leeh, qaskariinok bayisam maliiy, yab kaadu nagay yaaxige. YALLI kaadu kaa'lih yan» iyye.

¹⁹ Tohuk lakal Saawul Yiisa fan farmo ruubeeh, iyyeemih, «Ama ku baxay illit dacayrih yanihiyya yoo fan rub» 'yaanam farmoh kaah ruube.

²⁰ Toh yoobbe waqdi, Yiisa gaqambo kee qinabak bicsen kamri edde yan saar elle yaarru waa oklo merrah kaah ucuyya heeh, girgirruy gabat beyu waa kaadu ucuyya heeh kaa ruube.

²¹ Dawud Saawul fan yemeeteeh, too waqdi kay taamat gace. Saawul Dawud kaxxam yikcineeh, isi silac yakkuqe num kaa abe.

²² Ayrok teena Saawul Yiisah farmo ruubeeh iyyeemih, «Dawud ossokooteh aniih; inni taamat kaa haam faxak, atu ruksat kaah aceetto» iyye.

²³ Tohuk lakal Yalli Saawulil ginni ruubinnaan waqdi, Dawud taaxige begena gabat hayya heeh aagaruk kaah yen. Toh Saawul sahhaloysak teneeh; too waqdi ginni kaa cabak yeneeh, nagay akkuk yen.