1 Samuwel 15 - NABUWWA KEE MALIKWA

SAAWUL YALLI KAAK IYYEM CINEH

^1-2 Samuwel Saawuluk iyyemii, «Dumah yan saaku, YALLI, isi maray Israayilih yoobokehiyyak malik takke'gidih koo askute'gidih yoo dooreeh, ku fanah yoo ruube. Taway YALLAY Nabaamak Nabahiyya kok iyyam ah teetik, oobbey. ‹Qamaalek-mari sin kaxxa abbobti Masrik temeete saaku, qaduwwi keenil yekken. Tohuk gexxaamah, anu ken digaalam faxak,

³ gexay qeebit ken ibbixaay, elli haanam keenik bayis. Labha kee agabuuy, urru kee salaadah yan qunxa urru inkih sella keenik hay. Laa kee illiiy, gaala kee danoonak tu macabinay keenik qid› kok iyya» kaak iyye.

⁴ Saawul qaskarak luk suggu 'yeemih seeco abeeh; Teleem deqsita aracal yakkeenih gide keenik wagte. Israayil rasuk temeete qaskar namma boolih alfi tekke. Yuudâ-baaxok temeete qaskar tabna alfih num tekke.

⁵ Tohuk lakal Saawul Qamaalek-marih-magaala fanah yemeeteeh, tokkel goloh addat raarisak keenih suge.

⁶ Tokkek Keena-deqsitta-kedoh yooboke marah farmo ruube. Keena-kaxxa-abbobti, Israayil-mari Masrik yemeete saaku keenih yemqeenih yenen. Tohuk gexxaamah farmo keenih ruubeeh, iyyemii, «Qamaalek-marat qeebi abnam fanxa'mmay, ken lih masuginay, waalih keenik gaca. Isin meqem-bar-leela kinnitoonuuh, gabat nek rabtaanam siinik mafanxa» 'yaanam keenih ruube. Keenâ-mari too farmo gee waqdi, ken cabeh gexe.

⁷ Saawul, Cawiila deqsita aracak Sur deqsita aracay Masrik ayrô-mawqat raaqahiyyah amma 'yaanam, qeebi keenit abeeh keenik yeyseh.

⁸ Qamaalek-marih-malikih-yen-Agag, rooci luk yibbixeeniih, raqqa 'ye mara num keenik cabe'kal sella ken hee.

⁹ Takkay immay Saawul kee kay qaskar woo malik kee, laa kee illik taysem kee, xagar meqe daheela kee illi-xaylo sella mahannoonuy, Qamaalek marak dannabah orbisen. Boola leeh, tuxxiq sinnim akak yublen lac mabennoonuy sella ken hee.

YALLI SAAWULUK AMOYTIINU CINEH

¹⁰ Too waqdi YALLI Samuwelik iyyeemih,

¹¹ «Saawul malikih heemih away nadaamitah an. Yoo cineeh yi yab cineh» kaak iyye. Toh Samuwelit kaxxam toomeh, too waqdi inkih yan bar YALLA kallacak xiine.

¹² Maaci maacise waqdi ugutta 'yeh Saawul goranah gexe. Sarrak Samuwelik, «Saawul Karmel fan gexe» 'yaanam iyyen. «Usuk wokkel kaa elle kassitan isi ceelo bicsiise. Sarrak Gilgal fan gexe» kaak iyyen.

¹³ Samuwel, Saawul elle yani'kke yemeeteeh; Saawul kaa yuble waqdi, «Samuwelow, YALLI barkat kot haay» axcuk salaamatta kaah abek lakal, «YALLI yok ‹Aba› iyyem duuduseh» kaak iyye.

¹⁴ Samuwel too waqdi, «Hay, anay akak aabbe laa kee illi ankek temeete?» kaak iyye.

¹⁵ Saawul tohul kaal gacsemii, «Amah yi mari Qamaalek marak beemi. Laa kee illik taysem YALLAY ku Dageltah yanih sadgat abna'gidih raaqisne. Wohuk raqtemiiy inkih selli hayne» iyye.

¹⁶ Samuwel, ‹Kalay tibba 'xic; woo yab hinnak. YALLI bir yok iyyem koh warisu waak, oobbey» kaak iyye. Saawul, «Yoh waris hay» iyye.

¹⁷ Samuwel kaak iyyemii, «Atu qunxa numuh is tubleh immay Israayilil tan kedoodak inkih mirac tekke. YALLI Israayil-malik takke'gidih, koo yuskuteeh koo dooreh.

¹⁸ Woo Qamaalek maray dambileela kinni bayissa'gidih amri koh yeceeh, ‹Ken bayis› 'yaanam kok iyye. ‹Inkih sella ken haytam fanah qeebi keenit ab› kok iyye.

¹⁹ Hay tonnal, kay amri macah cinte? YALLAL dambi lem bahha hayteh, dannaba orbissa'gidih qataatakte. Tahat akah assem macaa?» kaak iyye.

²⁰ Saawul iyyemii, «YALLIH amri macininniyo. Usuk yok akah iyye innah qeebih gexeeh, Malik-Agag gabat baahe. Qamaalek-mara inkih selli hee.

²¹ Tonna'mmay yi mari inki adda Yallah tontocowweemik illi kee laak tayseemiy selli hay iyyeenihiyya dannabah beenih; Gilgalal ku Dageltih sadgatah qidaana'gidih akke baahen» iyye.

²² Samuwel iyyemii, «Hay meqehik, YALLI, amri kaak oggolaanam kee, kay sadgatah saqa qidaanamak macah lafitam kot celtaa? YALLIH garil kay sadgatah gabul le maruw qidaanamak, usuk iyyem abaanaah kay yaabat maqal haanam muxxo le.

²³ Kay amri cinaanam baab-abittol yaamineenimih gide dambik le. Kaxxa-mariinoh, YALLA cabba heenih xeet kee cooxuk bicsen duyyeeya yaqbudeenimih gide dambik le. Tonnal atu YALLA cinteeh, YALLI kaadu Israayil ummatih amoytiinu koh cineh» kaak iyye.

²⁴ Too waqdi Saawul, «Anu nummah dambit aseh an» iyye. «Anu YALLIH amri cineeh, atu yoh tescesse gita makatayinniyo. Inni marak meysiteemih sabbatah, oson faxeenim abe.

²⁵ Takkay immay away koo kallacaamah, abe dambi yol cabay, YALLA aqbude'gidih yo'lih uduur» kaak iyye.

²⁶ Samuwel kaal gacseemih, «Ko'lih maaduura. Atu YALLIH amri cinteeh; YALLI tahaysa Israayil marih amoytiinu kok kaleh» kaak iyye.

²⁷ Sarrak Samuwel gexoh enkeleelebba 'ye waqdi, Saawul saro kaak yibbixe. Woo saro qanxixxeh.

²⁸ Too waqdi Samuwel annah kaak iyye. «YALLI a saaku Israayil ummatih amoytiinu kok kaleh, gersi numuy kok yaysehiyyah yecee.

²⁹ Waara YALLAY Israayil doorehiyya diraabat mayaabaay iyyeemit mayaduura. YALLI, sahdayti innah, waqdiiy tu m'iyya» kaak iyye.

³⁰ Saawul, «Anu dambi leemit aseh anik bas, away akim isih raqtuh, Israayil-makaabon kee ummatih foocal yoo essekexxeyaay YALLAY ku Dagelta kinni aqbude'gidih yo'lih uduur» kaak iyye.

³¹ Sarrak Samuwel kaa'lih yuduureeh, Saawul YALLA yuqbudeh.

³² Tohuk lakal Samuwel iyyemii, «Ama Qamaalek marih malik annah yol baaha» iyye. Agag, «Baaha kaa» iyyeenim yoobbe waqdi, ahaysa malik yoh akah seecam rabak tan kaa hinna 'yaanam isi niyal luk yemeete.

³³ Kaa baahen waqdi Samuwel kaak iyyemii, «Ku seef mango inonti xaylo maleh akah cabe'nnah, ku ina a saaku kaadu baxa maleh raaqele» kaak iyye. Sarrak YALLA elle yaqbuden aracay Gilgalal yanik foocal exxa-exxah kaa kure.

³⁴ Sarrak Samuwel Raama fan gexe. Malik-Saawul Gibqal tan isi buxa fan yuduure.

³⁵ Samuwel too ayrok wadir Saawul abaluk maraaqinna. Takkay immay kaat tekkeemih tiyak kaxxam kaah qaade. YALLI kaadu Saawul Israayil-malik abeemit nadaamiteh.