1 Samuwel 14 - NABUWWA KEE MALIKWA

YONAATAN FILISTIIN MARAT ABE QEEBI

¹ Ayrok teena Yonaatan, furraynuh yan numuy silac kaah abbaxuk sugehiyyak, «Filistiin mari elle yani'kke fan nee bey» iyye. Takkay immay too gexo isi abbah mawarsinna.

² Kay abba woo saaku Migroon deqsita aracal rummaantô caxah gubal yinfiddigeh yen. Migroon deqsita arac Gibqâ-magaala kaxxam xeeruk mananna. Saawul lih laca boolih num yen.

³ Aciiya deqsita sek rikeek tan saroy dibuk sek haysitahiyya gacak, kaa'lih yen. Usuk Ikabod-saqalay Aciitub deqsitahiyyak baxak ten. Aciitub Fincas baxak teneeh, Qelik kaadu baxi baxak ten. Qeli dumal Siilo deqsita aracal YALLIH seekih yen. Wokkel suge mari Yonaatan gexem able'kal raaqen.

⁴ Yonaatan Filistiin mara fan gexe waqdi, gitah akak gace daabal namma boolo sugte. Woo namma boolok, boolok teena akak tenem gitak a exxal teneeh, boolok teena aki exxal ten. Woo boolok tiyak teena Boxex deqsitak ten; aki boolooy Sene deqsitak ten.

⁵ Tiyak teena akak taban gitak kilbat le kabuk teneeh, Mikmasak foocah raaqak ten. Aki boolooy gabbi qaxat Gabaq deqsitta magaalat foocah raaqak ten.

⁶ Yonaatan woo furraynuy kaa'lih yanik iyyemii, «A *Filistiiniy diini-maleelah tanihiyya elle tani'kke fan nee bey. YALLI nee catam takkehik, dagnah faxeh gide nakke'mmay YALLI isih faxek, keenik nee aysiisele» iyye.

⁷ Too waqdi woo furrayni kaak iyyemii, «Anu, atu abtam faxxa haytam, ko'lih abeyyooh, kok mabaxsima» kaak iyye.

⁸ Yonaatan, «Meqeh hay! Tonnal woo Filistiin-mari nee yable'gidih ken fan nee bey. Nee ubulla haan waqdi,

⁹ ‹Elle tanin ikkel elle idiya› nek iyyeenik, gufne aracal elle aadenno.

¹⁰ Hinna'mmay, ‹Ni fanah ama› nek iyyeenik, tonnal ken fan gexenno. YALLI keenik nee aysiiselem elle naaxagu waynam tonna» iyye.

¹¹ Sarrak Filistiin-mari ken akah yable innah aben. Too waqdi Filistiin-mari, «Wagga! Qibraan marak tu takkem edde yombooqoreenih sugen boodoodak away yawqeenih yanin» iyyen.

¹² Sarrak Yonaatan kee kaa'lih yan furraynuh seeceenih, «Siinih warisnam fanxam linok, annah nel ama» keenik iyyen. Too waqdi Yonaatan is lih yen furraynuk, «Yoo katay; YALLI keenik nee yiysiiseh yanik» iyye.

¹³ Yonaatan naharak edde suge aracak yewqeeh, oson elle yanin ikke fan gulubuh gexe. Furrayni salafak kaa kataye. Ken guffu heen waqdi, Yonaatan Filistiin-marat qeebi abeeh, niksoh baaxot ken hee. Too waqdi kaa'lih yen furrayni usuk yinkise mara tiya tiyal qide.

¹⁴ Naharak keenit aben atkat, Yonaatan kee furraynu, dagoh gide takke baaxol labaatanna yakke mara keenik qiden.

¹⁵ Barril yanoonuu, carbi booxal yanoonu, *Filistiin qaskaray qarwat sugtet kaadu cunxoh axaxo keenit hayte. Tohut yanin waqdi baaxo edde tengeyyeh. Too saaku too marat Yalli badit kee meysi ruube.

¹⁶ Saawuluk dacayrih yan maray Benyam baaxok Gibqa deqsita aracal sugehiyya Filistiin-maray kinni'nna waagisay kudahiyya yublen.

¹⁷ Too waqdi Saawul isi marak iyyemii, «Qaskar inki aracal gaaboysaay yakkeenih gide keenik loowa. Ane waa num wagita» iyye. Qaskar loowen waqdi, Yonaatan kee woo furraynuh yan numuy kay silac abbaxuk suge deedaltam yublen.

¹⁸ Sarrak Saawul Aciiya deqsita numuy seekih yanik, «Yallih Qahdi addat akak yan Sandug bah» iyye. Too ayro, Yallih Qahdi addat akak yan Sandug Israayil qaskar elle tinfiddigeh ten aracal yen.

¹⁹ Too sandug baahan waqdi, Filistiin-mari waxqaxitak suge. Waxqaxitiyyah waqdiik waqdi lafitak laften. Too waqdi Saawul seekik, «Ahaysa ama sandug yanay inxic» iyye.

²⁰ Sarrak kaa kee kay qaskar, Filistiin-maray inkitanuuk baditeeh isinni kee isinnih qeebi tittat abahiyya fan gexen.

²¹ Qibraan-maray duma isi mara cabba heeh, Filistiin-mara lih sugehiyya too saaku ken cabeh, isi mara fan yuduure. Saawul kee Yonaatan marat yengelen.

²² Gersi maray kaadu Efrayim qaleelat sasak sugehiyya Filistiin-mari bukeenim yoobbeeniih, tonna-leemik Saawul kee Yonaatan lih gacca 'yeenih, Filistiin-marat qeebi aben.

²³ Beet-Awen deqsita aracak taturra 'yaanam fan qeebi keenit abak sugen. Too ayro YALLI Israayil mara tonnal cate.

QEEBIK LAKAL TEKKEEMI

²⁴ Takkay immay too ayro Israayil-mari qululuk gexxaamah boolaateh yen. Toh akah tekkem Saawul, «A saaku naqboytiitik cane gacse'kal, maaqo xaginnaan numul abaaro obtay» 'yaanamal maaqo akme waanamih amri keenil oobiseh ken xibsiiseh yen. Tohuk gexxaamah inkih tan ayro qululut asen.

^25-26 Sarrak yakkeenimiik mango coox elle yan aracah yemeeten. Woo cooxuk ooba malab baaxol tif axcuk yen. Takkay immay Saawul keenit abe xiibah meysih num keenik woo malabak maxaqaminna.

²⁷ Yonaatanah tu gactek, kay abba, «A saaku maaqo akminnaan numul abaaro obtay» iyyem yoobbeh mananna. Tonna-leemiik gabat abbaxuk suge caxxa woo malab edde yan gorrat rubbu heeh malab yeyyeeqeeh, yokme. Too waqdi namma inti kaak fakkinteh.

²⁸ Sarrak numuk teeni kaak iyyemii, «Ku abba, ‹A saaku maaqo afah xaginnaan numul abaaro oobele› iyyeh, nee meysiise. Tonna-leemik qululuk gexxaamah maqar cabneh» iyye.

²⁹ Yonaatan too waqdi iyyemii, «Yi abba ni maral baahem kaxxam umaamak tanih tan. Anu away malabak tu'baxa okmeemih namma inti yok fakkintem maay tablen?

³⁰ Ni mari naqboytiitik yeyse waqdi, naqboytit gabat luk sugte maaqo yakmeenimil qululuk nagay akkuk yeneenih, Filistiin-marak kaxxam qidak yenen» iyye.

³¹ Too saaku Israayil-mari Filistiin-marak yeyseeh. Mikmas deqsita aracak xabba haanamaay Ayyaalon deqsita aracah amma 'yaanam qeebi keenit abak yemeeten. Too waqdi satqiteenih kaxxam boolaaten.

³² Tonna-leemik naqboytiitik dannabah been illi kee laa tokkel elle yusguuden. Cado akak qabala luk yokmen.

³³ Saawuluh toh warseeniih, «A mari cado qabala lih yakmeeh, YALLIH garil dambi leemit asaanam maay tablee?» kaak iyyen. Too waqdi Saawul woh abe marak, «Isin Yallih-qahdi makteenih, makoleela kinniton» axcuk keenit xongole. Sarrak, ‹Kaxxa xaa akke yoh baaha» iyye.

³⁴ Kaadu qagseh iyyemii, «Inkih tan ummatta fan gexay, ‹Isinni laa kee illi akke baaha› keenik inxica. Baahoonu waan waqdi akkel elle usgudda haay ukuma. Ahak wadir qabal addat akak yan cado makminaay, YALLAL dambi lem mabaahina› keenik inxica» iyye. Too bar yakkeenimik laa baaheeniih wokkel yusguuden.

³⁵ Sarrak Saawul YALLAH sadgat elle aban arac bicse. Duma YALLAH sadgat elle aban arac bicseh masuginna.

³⁶ Tohuk lakal Saawul isi marak iyyemii, «Barat edde gexxa inneh, Filistiin-mara gaadnay ayro bukka 'tam fan buubak ken sugnay, num keenik wade'kal sella ken haynay» iyye. Ummatta too waqdi, «Atu tayseh axcinnaanim abenno» iyyen. Takkay immay sek iyyemii, «Naharak Yallal fayu esserray» iyye.

³⁷ Too waqdi Saawul Yallak, «Filistiin-marat qeebi abnek, iisa neh acee mantuu?» iyye. Yalli too ayro tu kaal magacisinna.

³⁸ Too waqdi Saawul qaskar abbobtik, «Annah yol amay, dambi abe mari yenek, ken nayyaaqeemi» iyye.

³⁹ «Waara YALLAY Israayil-marah nasri yeceehiyyal xiibitah ani'mmay, yi baxa Yonaatan takke way, a saaku qellat luk sugu waa numul rabi amaatele» iyye. Toh iyye waqdi, num tu kaal magacisinna.

⁴⁰ Tohuk lakal Saawul iyyemii, «Kulli num siinik wokkel soolay 'xica. Yoo kee yi baxa Yonaatan akkel soolenno» iyye. Oson, «Kot meqem ceelinnaanim ab» iyyen.

⁴¹ Tohuk lakal Saawul YALLAK iyyemii, «YALLAW, Israayil doore Dageltaw, a saaku dooqak raddi macah yoh gacse wayte? A taahirik yan xaal tuk teena yol gacis. Qellat lem yoo kee Yonaataanak numuk teena tekkek, *Urim migaaqal eyyeeqaay; hinnay ku maray Israayilih yoobokehiyya tekkek, *Tummim migaaqal eyyeq» iyye. Too waqdi Saawul kee Yonaatan 'yaanam tewqe. Tonna-leemiik ummatta too qellatat ane waytam tumbulle.

⁴² Sarrak kaadu Saawul, «Yoo kee yi baxak qellat le num baxis» iyye. Too waqdi «Yonaatan» 'yaanam tewqe.

⁴³ Sarrak Saawul, «Abtem macaay?» kaak iyye. Yonaatan, «Gabat abbaxuk suge caxxat dago malab-baxa kumussa heeh okme. Ah yooy rabah bical an» iyye.

⁴⁴ Too waqdi Saawul kaak iyyemii, «Raba kol ackume wayya heek, Yalli yot cabe waay!» kaak iyye.

⁴⁵ Takkay immay ummatta intemii, «Yonaatanay Israayil marah qeebil a xaqan le nasri orbisehiyyal rabi yamaate'nnaa? Matakka. Amok xagorti kaak kate waamah, waara YALLIH migaaqal xiibinna. A saaku usuk orbise iisa akah geem Yallih cato» iyyen. Tonnal too ummatta Yonaatan rabak catteh.

⁴⁶ Tohuk lakal Saawul Filistiin-mara xakaake kalaanamak yeedeeh; Filistiin mari isi baaxo fan wadir gace.

⁴⁷ Saawul Israayil malik tikka 'yeemih kulli ikkel naqboytiitih isik enna 'ya marat qeebi abak suge. Mooyab-maraay Qammon-maraay Edom-maraay, tonnah kaadu, Xooba kee Filistiin-malikwat inkih qeebi abak suge. Qeebi lih abinnaan marak iisa orbisak yen.

⁴⁸ Qamaalek-marat kinni way maqar le qeebil keenik yeyseh. Israayil mara abbixe raarra hee marih gabak cateh.

⁴⁹ Saawuluk lab-xaylo Yonaatan kee Iswi kee Malkisuwaq deqsitak ten. Say-xayloh migaq kaak Meerab kee Miikal deqsitak ten. Meerab Miikal naharat teneeh, Miikal karmah teetik qunxuk ten.

⁵⁰ Kay barra migaaqah Acinooqam deqsitak ten. Acinooqam, Acimqax deqsita numih baxák ten. Kay qaskarih abbah tenem, Abner deqsita numuk ten. Usuk Saawuluk qammih-baxak ten. Abba kaak Ner deqsita numuk ten. Ner Saawuluk qammik ten.

⁵¹ Saawul-abba Kees kee Abner-abba Ner inkih, Abiiyel deqsita numih xaylok ten.

⁵² Saawul suggu 'yem fan Filistiin mara luk kaxxa qeebi abe. Qeebil agiru akkiiy celem akki akkinnaan num yable waqdi, isi qaskarat asgalluk yen.