1 Samuwel 12 - NABUWWA KEE MALIKWA

SAMUWEL UMMATTA LUK ABE YAABA

¹ Tohuk gaba kalen waqdi, Samuwel Israayil marak iyyemii, «Isin, ‹Ab› yok inteenim abeeh, sin xiinisu waa malik siinih reediseh.

² Malik taway geyteeniih, sin miraacisa'gidih gabat sin le. Yoh tu gactek idooliteh amô qidi baaheh ani'mmay, yi xaylo sin lih tan. Furrayniinooy aham fan miraacah siinik suge.

³ A tableenim yooy; qellat celtaamak tu siinil baaheh sugek, YALLA kee YALLI doore malikih garil yol haysita. Awur akkiiy danan akki akak bee num yenek, hinnay kaadu, ayrise kee hinnay edde xukkuteh suge num yenek, hinnay kaadu, guqul akak bee num yeneeh, tahak tuk teena elle baahe num yenek, yot haysitay kaah mekleyyok» iyye.

⁴ Too waqdi ummatta, «Aleey! Atu nee elle ayrissem mantuuy net abte xukko mantu. Numuk kaadu nek beytem mantu» kaak iyyen.

⁵ Samuwel too waqdi keenik iyyemii, «Meqeh hay! Tonnal tu yol gee wayteenimih a saaku YALLA kee YALLI doore malik ni sumaq takkay» keenik iyye. Oson too waqdi, «Meqeh. YALLA kee YALLI doore malik nel sumaaqittay» kaak iyyen.

⁶ Samuwel qagseh keenik iyyemii, «YALLAY Muusa kee Haaruun sin kaxxa abbobti Masrik yayyaaqeeni'gidih doorehiyya sumaq yekke.

⁷ Taway isin ama elle tanin ikkel elle soolaay; anu YALLI sin kee sin kaxxa abbobtik rooci cata'gidih abe kaxxa taama elle abe'nna, kassis siinih abak, YALLIH foocal geyto siinit haysitam faxam liyo.

⁸ Yaqkuub kee kay buxah mara Masri gexxe saaku, Masri mari keenit xukkutak sugeeh, too waqdi sin kaxxa abbobti catoh YALLAL weqte. YALLI Muusa kee Haarun keenih ruube. Oson Masrik eyyeqqa ken heeniih, a saaku isin elle tanin baaxol ken nookisen.

⁹ Takkay immay sin kaxxa abbobti isinni Dagelta hawwenteh. Tohih sabbatah YALLI, Caxor-magaalah qaskarih abbay Sisra deqsita keenit abe qeebil woo marak ken gacsiiseh. Tonnah kaadu, Filistiin mara kee Mooyab marih malik keenit abte qeebil woo marak ken gacsiiseh.

¹⁰ Too waqdi YALLAL cato essereeniih iyyeenimii, ‹YALLAW, ku garil dambi lem bahne. Koo cabba hayneh, Baqal kee Qastarot deqsittam ku aftok nuqbude. Taway naqboytiitik nee cataay; ahaysa koo aqbudenno› iyyen.

¹¹ YALLI too waqdi Gidqoon kee Barak kee Yeftac ruubeeh, ellecabol yoo ruube. Kulli num naqboytiitik sin cateeh; tohuk gexxaamah amaanah xinten.

¹² Takkay immay Qammon rasul malikih yen numuy migaaqah Nacas deqsitahiyya sin yabbixu waam tublen waqdi, YALLIH malikannu cinteenih, ‹Nee xiinisa malik neh reedis› yok inten.

¹³ «Taway isin doorten malik amah kaa. Isin faxxeeniih YALLI kaa siinih yecee.

¹⁴ YALLAK meysitteeniih, kaa tuqbudeeniih, kay amri duudusseenih, kay xinto cine wayteenih, tonnah kaadu, sin kee sin amol reeda malik YALLA kinni sin Dageltih gita kataya mara tekkeenik, kullim siinil amqele.

¹⁵ Tonna hinna'mmay, YALLIH yab aabbe wayteeniih kay amri cinteenik, tonnal YALLI sin kee sin malikil inkih umam baahele.

¹⁶ Toh too tiyaay; taway elle tanin ikkel elle soola. YALLI abu waa kay kaxxa abitto abletton.

¹⁷ Away edde nanim rob edde yamaate wakti hinna'mmay, taway anu YALLA esserak, ‹YALLAW, kakkaqo kee rob rub› axceyyooh; YALLI too waqdi kakkaqo kee rob ruubele. Tah takku wayta waqdi YALLAK, ‹Malik neh reedis› inteeniih, tohul YALLAL dambi lem bahteenim isinnik aaxigetton» iyye.

¹⁸ Tohuk lakal Samuwel YALLA kallaceeh, too ayrot edde YALLI kakkaqo kee rob ruube. Too waqdi ummatta inkih YALLA kee Samuwelik meysitteh.

¹⁹ Sarrak Samuwelik, «Rabe wayna'gidih ku maganah ku Dagelta neh kallac. Duma abne dambik kalah kaadu, ‹Malik neh reedis› YALLAK inne waqdi, YALLIH garil dambi lem bahnem away ninnik neexege» iyyen.

²⁰ Samuwel keenik iyyemii, «Umaanek mangoomut asseeni'mmay, tohuh mameysitinaay, YALLAK maxxeerinaay, inkih tan afqadook kay taamah taamita.

²¹ Gabak bicsen duyyey tu akke waytaah tu xiqe sinnihiyya maqbudina. Tu xiqe wayta duyye, umaane siinit takke way, siinih xiqtam mali.

²² YALLI isih, isi mara sin abuh sin dooreh, tohuk gexxaamah isi nabnah taagah sin macina.

²³ Yoh tu gactek, kulli way dooqa siinih abeyyo. Dooqa siinih abe waam YALLAL dambi baaheemik loowinta. Tonnah kaadu abeh meqem kee gitah tanim sin barseyyo.

²⁴ YALLIH amri oobbeya! Isinni afqadook kay taamat gaca. Duma siinih abem kassita.

²⁵ Dambit bisoh inteenik, sin kee sin malik inkih bayselem ixiga» keenik iyye.