1 Samuwel 11 - NABUWWA KEE MALIKWA

SAAWUL QEEBIT QAMMON MARAK YEYSE

¹ Alsak wadiril Qammon-malikiy Nacas deqsitahiyya Gilqad-rasuk Yaabes-deqsitta-magaala yabbixe'gidih gexeeh maro teetit hee. Yaabes-magaala elle tenem, Gilqad deqsitta baaxok ten. Yaabes-mari Nacasak iyyemii, «Amoytiinuh koo oggoleh immay ninni kee ku fanal bica abnaama» kaak iyyen.

² Nacas keenil gacsemii, «Bica sin lih abeyyo'mmay, elle bicnu waynam inki tiya. Tohumu kulli numuk migdi inti siinik siibba heeh, inkih yan Israayil mara qawratak qidaamih tiyal sin lih biceyyo» keenik iyye.

³ Too waqdi Yaabes magaalah abbobti kaak intemii, «Inkih tan Israayil baaxoh farmo rubnam fan, malcina ayroh gide neh sugaay; too malcina ayrot catoh num neh amaate wayya heek, too atu inteemit orbenno» kaak iyyen.

⁴ Tohuk lakal farmoh sinam ruubeeniih; woo mari, Gibqâ-magaalay Saawul elle yanihiyya fan yemeeteenih, woo xaagu sinaamah warsen. Too xaagu yoobben waqdi, ummatta inkih kaxxam boogisseh.

⁵ Saawul buqreh addak awur gabat hayya heeh amaatuk suge. Too waqdi, «Maca tekkeeh? Sinam akah weqtam macaay?» iyye. Too waqdi Yaabesik yemeete mari baahe xaagu kaah warsen.

⁶ Saawul tah yoobbe waqdi, Yallih *Roocaaniyya isi milkih kaa hayya hayteeh, too waqdi bagcarrite.

⁷ Sarrak namma awur bahha heeh exxa-exxah kuramkurra hee. Tohuk lakal farmoh ruube marak, «A exxaaxi inkih tan Israayil baaxoh mara fan beyaay; ‹Samuwel kee Saawul lih gaaduh gexe wayu waa numih awurwat tama'nnah tanim akkele'mmay, maraaqina› keenik inxica» iyye. Tohuk lakal YALLI Israayil marat cunxo ruubeeh; too meysih num keenik maraaqinnay, yakkeenimiik inkih yemeeten.

⁸ Israayil baaxok sidooca boolih alfih num yemeeteeh, Yuudâ-baaxok kaadu soddom alfih num temeete. Too waqdi too yemeete mara, Saawul, Bedek deqsita aracal gaaboyse.

⁹ Sarrak woo gaaboowe mari, Yaabes-magaalak farmoh yemeete marak iyyeenimii, «Beera wallaqenta, sin wadenno siinik iyyen, inxica» keenik iyyen. Sarrak Yaabes-magaalah mari a farmo yoobbeeh, too waqdi kaxxam ruffa iyyen.

¹⁰ Sarrak Nacasak iyyeenimih, «Beerak wadir ku gubah orbennoh, isih faxxem nek abetto» kaak iyyen.

¹¹ Too bar Saawul isi mara sidiica afah hayya heeh, saaku maaci maacise waqdi, Qammon mari elle yani'kke fan gexeenih qeebi keenit aben. Too qeebit wallaqenta ken seleenih sugen. Rabak raqtem keenik fixixxeeh; kulli numuy isi kabul keenik kude.

¹² Tohuk gaba kalen waqdi Israayil mari, Samuwelil yemeeteh; iyyeenimii, «Saawul malik nek mayakka iyye mari ankel yan? Too mara ni gabal hayis; ken qidennok» iyyen.

¹³ Saawul too waqdi iyyemii, «A saaki YALLI Israayil edde wade ayro ikkal, numul raba manackuma» iyye.

¹⁴ Samuwel kaadu qagseh keenik iyyemii, «Gilgal fan genxay 'xicaay, wokkel nammeyhaak Saawul ni malik kinnim diggosnay» iyye.

¹⁵ Too waqdi yakkeenimik Gilgal fan gexen. Tokkel woo taahirik yen aracal, Saawul ken malik kinnim diggoysen. Sarrak amaanah xiinaanamih astah aban sadgat YALLAH aben. Saawul kee raqqa 'ye Israayil mari inkih too ayro tekkem yessekexxeenih.