1 Samuwel 10 - NABUWWA KEE MALIKWA

¹ Tohuk lakal Samuwel caxâ xaylok bicsen saliid* (zeyti) edde yan karaarat bahha heeh Saawuluk amol caxe. Sarrak fugga kaa heeh kaak iyyeemih, «YALLI, Israayiliy isi mara abehiyyah amoyta takke'gidih, koo yuskute. Atu kay mara naqboytiitik dacrisettooh, ken catetto. YALLI Israayil amoyta takke'gidih koo doorem elle taaxagu waytam macaay intek,

² a saaku yok elle gexxa ikkel, Benyam baaxok Xelxac deqsita aracal yan Raacel kabrih garil, namma num koh sugele. Too namma num, ‹Atu gorrisak sugte okaale geytinteh immay ku abba okaaleh cisab maliy, koh cisabbootaah, «Baxi yok bayeh yanik, maca aboo?» iyya› 'yaanam kok axcelon.

³ Tokkek gexettooh, Taabor deqsita aracak woo kaxxam naba caxa elle tani ikke fan amaatetto. Tokkel sidiica numuy Beetal deqsita arac fan Yallah sadgat abaana'gidih gexxahiyya geetto. Too marak numuk teeni girgirwak sidoc beyak koh sugele; aki num sidooca gaqamboyta luk sugele; sidochaytô-numuuy qinab kamrik kibuk yan saar gabat luk koh sugele.

⁴ Too waqdi salaamatta koh abeloonuuh, sarrak namma gaqamboyta koh aceeloonuuh; beetetto.

⁵ Tohuk lakal Gibqa-Eelohim deqsitta magaalay Filistiin-qaskar elle tinfidiggeh tanihiyya fan amaatetto. Too magaalak culmal butta takke nabuwway Yallih sadgat elle aban koomak roorul obtahiyyat garayetto. A nabuwwa *begena kee karambooy fooxima kee kirar aagarukuuy argadukuuy nabuwwah innah yaabakaay xongolak koh sugelon.

⁶ Too waqdi garciik YALLIH *Roocaaniyya isi milkih koo heeleeh, atu woo oson diinih aban rigdot ken lih angaletto. Atu kaadu keenik kaxxih nabuwwah innah yaabetto. Too waqdi akah suge wayte num akketto.

⁷ Taham tikka 'tek wadir, Yalli ko'lih aneleeh; kot ceelinnaanim abetto.

⁸ Tokkek Gilgal magaala fan yok naharat amaatetto. Too magaalal anu kot angooroweyyooh, cado akak carrisan sadgat Yallah abeyyooh, tonnah kaadu, amaanah xiinaanamih astah aban sadgat Yallah abeyyo. Anu amma exceh abtu waytam koh warsam fan, malcina ayroh tokkel sugetto» kaak iyye.

⁹ Saawul Samuwel garik daqaarima'gidih enkeleelebba 'ye waqdi, Yalli Saawuluh qusba afqado yecee. Samuwel kaak inxicca 'yem inkih too ayrot edde tekke.

¹⁰ Saawul kee kay taamat yan num Gibqat gufte waqdi, butta takke nabuwwa kaat garayte. Too waqdi Yallih-Roocaaniyya isi milkih kaa hayte. Sarrak usuk, oson aban diini rigdot ken lih yengeleeh, keenik kaxxih nabuwwah innah yaabe.

¹¹ Duma kaa aaxaguk yen mari, ah abah kaa yublen waqdi, «Kees baxat tekkem macaa? Labhay, Saawuluuy kinni way nabi yekke kunna!» tittak iyyen.

¹² Wokkel suge num, «A tablen nabuwwak abba iyyaay?» iyye. «Saawuluuy kinni way nabi yekke kunna!» inta maxco tokkek raqte.

¹³ Sarrak Saawul woo diini rigdo kee nabuwwah innah abe yab gaba kale waqdi, koomah amol yan aracay Yallah sadgat elle abaanahiyya fan gexe.

¹⁴ Saawul-qammi, Saawul kee kay taamat yan num yuble waqdi, «Anke gexxeenih sugten?» keenik iyye. Saawuluuy, «Okaale goranat sugne'mmay waynehiiy, Samuwelih warisna'gidih kaal genxe» iyye.

¹⁵ Kay qammi, «Hay, Samuwel maca kok iyye?» kaak iyye.

¹⁶ «Samuwel ‹Okaale geytinteh› nek iyye» kaak iyye. Samuwel «Malik akketto» kaak iyyem qammih mawarsinna.

MALIKIH SAAWUL DOOREN

¹⁷ Samuwel, ummattah inkih Mixfa deqsita aracal, YALLI iyyem ankacisaana'gidih, seeco abe.

¹⁸ Too mari gaaboowe waqdi keenik iyyemii, «YALLAY Israayil doore Dagelta kinnihiyya siinik iyyamaa, ‹Masrik sin eyyeeqeeh, Masri mara kee raqqa 'ye maray siinit xukkutak sugehiyyak sin wade› siinik iyyah yan» keenik iyye.

¹⁹ Samuwel qagisak keenik iyyeemih, «Kulli gadaama kee taqabik sin teyyeeqem, sin Dagelta. Takkay immay a saaku kaa cinteenih, Malik neh reedis 'yaanam yok inten. Faxxaanam toh tekkek, kedo-kedo kee gulub kee gulubuh gacca 'xicay YALLIH qibaadah-arac xayyoowa» keenik iyye.

²⁰ Tohuk lakal Samuwel kulli kedo qibaada-arac fan bahsiise. Too waqdi YALLI Benyam kedo gersi kedoodak addaak doore.

²¹ Sarrak Samuwel Benyam kedoh yooboke mara qibaada-aracah bahsiise. YALLI ken addak Matri deqsita gulubut raaqa mara doore. Too mari fooca fanah yemeete waqdi, ken addak kaadu Kees baxa Saawul doore. Too waqdi ummatta kaa fan wagitteeh kaa wayte waqdi,

²² YALLAK, «YALLAW, uxih raaqe num maay yan?» iyyen. YALLI, «Saawul woh kaana. Woo buulok darret tombooqoreh tanim kaa» keenik iyye.

²³ Too waqdi arduk gexxa 'yeenih ummatta foocah kaa baahen. Tikki 'ta ummattak inkih xexxaarah amo gexak raaqe.

²⁴ Sarrak Samuwel ummattak iyyemii, «YALLI doorem tama numuuy; kay xaqan le num ni addat mayan» keenik iyye. Sarrak ummatta inkih anay fayya haak, «Ani haay malik! Ani haay malik!» iyyen.

²⁵ Tohuk lakal Samuwel ummattah inkih, malik le cakki kee ummatta kaadu kaal le cakki warseh. Gaba kalla hee waqdi, keenih warsem kitaabal uktubba heeh, woo kitab taahirik yan aracat daanise. Tohuk gaba kale waqdi kulli numuk, «Ahaysa isinni buxah uduura» iyye.

²⁶ Sarrak Saawul Gibqa deqsita magaalal tan isi buxa fan yuduure. Too waqdi cayla leelah yan maray Yalli Saawul cataanamih fayxi edde heehiyya kaa'lih gexe.

²⁷ Takkay immay dago maray umaane ugsam faxahiyya yen. Too mari, «A num-baxi maca neh xiqele?» 'yaanam axcuk kaa burteenih, tohuk gexxaamah mattaco kaah mabaahinnon. Saawuluh tu gactek, oson abeenimit baaqid mahaysitinna.