1 Samuwel 1 - NABUWWA KEE MALIKWA

ELKAANA DEQSITA NUM KEE KAY BUXAH MARA

¹ Elkaana akak iyyan num yen. Woo num Efrayim kedoh aabakuk yeneeh; dabqah Efrayim rasuk qaleela mango aracal geytinta magaalay Raama deqsittahiyyal yen. Abba kaak Yaroocam deqsitak yen. Yaroocam abba Aliihu deqsita numuk ten. Elkaana Aliihuk baxi baxak ten. Efrayim kedok Xuuf deqsita gulubuk Toocu deqsita buxah marat raaqak yen.

² Elkaana namma barra luk yen. A namma barra migaaqah Canna kee Faninna deqsitak ten. Faninna xaylo luk ten. Canna xaylo luk mananna.

³ Kulli sanatal Elkaana, Raama akak iyyan baaxook, Siilo deqsitta magaala fan, YALLAY Nabaamak Nabahiyya yaqbude'gidiiy kay sadgat aba'gidih, amaatuk yen. Tokkel Qeli deqsita numih xayloy migooqah Cofni kee Fincas deqsittahiyya YALLIH seekah yenen.

⁴ Elkaana tokkel Yallih sadgat abinnaan waqdi, cadok inki exxa Faninna acayuk yeneeh, aki exxak tet xayloh tiyahaay rike-rike acayuk yen.

⁵ Elkaana, Canna kaxxam kicinuk yeneh; tohuk gexxaamah cadoytak namma ikke teetih acayuk yene'mmay, YALLI xalay teetih yeceeh mananna.

⁶ Faninna, caggoyta teetik xaylo malim aaxaguk, aaminnaanim teetil baahak, is anqibinnaanim teetik abak ten.

⁷ Kulli-way tannah tanim teetil baahak mango sanoota sugte. YALLA elle yaqbuden arac gexinnaan waqdi, Faninna, is anqibinnaanim teetik abak teneeh; too waqdi Canna weeqah hayya haytah maaqo edde cinak ten.

⁸ Tet baqli too waqdi, «Cannay, macah weqtaah? Maaqo macah cinta? Kulli way, akah weqweqsintam macaay? Lab-xayloh tabanak yoo lito way, maca wayta?» teetik axcuk yen.

CANNA KEE QELI

^9-10 Ayrok teena Siilol YALLA-elle-yaqbuden-qaril akamuk sugen maaqok gaba kalen waqdi, Canna ugutta 'teh bagi teetik ankakammuk YALLAL weqte. Too waqdi Qeli deqsita sek, Qibaadâ-Qarih albaabih garil sirbiyal daffeyak suge.

¹¹ Canna YALLAH nadri culte. Inteemih, «YALLAW, Nabaamak Naba Dageltaw, yooy ku naqaso kinnihiyya ubuleey! Yi ceya ubuleey! Inti yol hayis! Yoo mamaaqilin. Yi Goytaw, lab-baxa yoh teceek, rabba 'yam fan ku taamat kaa heeyyooh, amo kaak mamoolay, taabakay axceyyo» 'yaanam axcuk YALLAH nadri culte.

^12-13 Canna mango uddur fan isi bagut YALLA kallacak tutuc axcuk sugte waqdi, Qeli tet yubleh, wagga tet hee. Too waqdi sokto asgayyih tet yuble waqdi sikrat yekkeleeh,

¹⁴ «A gide macah taskireeh? Katay ahaysa qinab kamri maaqabin» teetik iyye.

¹⁵ Is too waqdi kaak inteemih, «Yi saqalow, sikrat mayyu. Maskirinniyo. Cisaabah bagi akak yankakamme barra kinniyooh, liyoh an ceya YALLAH warsitah kaa kallacak suge.

¹⁶ Uma-taamat assa barra yoo makkalin. Liyoh an biyak kee cisaabah Yalla kallacitak suge ikkal» kaak inte.

¹⁷ Qeli too waqdi, «Muquk gex hay! Israayil doore Dagelti atu faxxem koh abay» teetik iyye.

¹⁸ Is kaadu, «Kulli way yoh meqem ku bagut gactay» kaak inte. Sarrak gexxeeh maaqo xagteeh, tohuk wadir cisab teetik kateh.

SAMUWEL UBKA KEE QUNXUK SUGE SAAKU TEKKEEMI

¹⁹ Ciggilta ayro Elkaana kee kay buxah mara maaca dibroh ugutta yeenih YALLA yuqbudeenih. Sarrak Raamal tan isinni buxa fan gexen. Elkaana Canna lih xiineeh, YALLI is kaa akah kallactem teetih duuduseh.

²⁰ YALLI, bagut lab-baxa teetih hee. Too awki yoobokeh; migaaqah Samuwel 'yaanam kaak inte. «YALLA essereh sugeemih sabbatah YALLI kaa yoh yecee» 'yaanam inte.

²¹ Elkaana kee kay buxah mara, sanatal aban sadgat kee, kalah kaadu YALLAH nadri akah aben sadgat abaana'gidih, Siilo edde gexan uddur yemeete.

²² Takkay immay too saaku Canna kaa'lih magexinna. Kaak intemii, «Awka anguk ayyaaqe saaku, YALLIH Qibaadah-Qari kaa beyyooh; tokkel qumri kaak yanim fan elle sugele» inte.

²³ Elkaana teetil gacseemih, «Nabam meqeemi. Taysem kot ceelinnaanim ab. Awka anguk tayyaaqem fanah buxal sug. YALLAH culte nadri YALLI duudusi koo haay» teetik iyye. Sarrak Canna isi baxih amo wagitak buxal elle raqte.

²⁴ Sarrak anguk kaa mollasse saaku, Siilo fan kaa beyte. Gabat kaadu sidooca karmat yan awur kee, darok tabna kiilo kee, qinabak bicsen kamrik kibuk yan saar luk gexxe. Samuwel Siilol yan YALLIH Qibaadah-Qari fan been saaku qunxuk yen.

²⁵ Awur yusguudeenik lakal, awka Qeli fan been.

²⁶ Too waqdi Canna Qelik intemii, «Yi Saqalow, yoo maay taaxigeeh? Anu duma akkel solla exceh YALLA kallacak ten barra kinniyo.

²⁷ Too saaku YALLAK, ‹Baxa yoh ucuy›, axcuk sugeeh; woo baxi amah kaay; YALLI yoh yeceeh;

²⁸ anu kaadu YALLIH num yakke'gidih, kaa aceeh an. Qumri kaak yanim fan YALLIH taamat gacele» inte. Usuk tokkel YALLA yuqbude.