1 Malikwa 9 - NABUWWA KEE MALIKWA

YALLI NAMMAYHAAK SULEEMANAH YUMBULLE

¹ Suleeman, YALLAH bicsam faxak suge Qibaadah-Qari kee, isi qari kee, kalah kaadu, bicsam faxak suggu 'yeemik gaba kalek sarra,

² Gibqoonul akah yumbulle'nnah, YALLI nammay haak kaah yumbulle.

³ YALLI kaak iyyeemih, «Abte dooqa kok oobbeh. Atu xisse qari taahirroyseeh; kulli way yoo elle yaqbudoonu waan qari kinnuk, ahaysa yi inti kee yi afqado kulli waqdi kaa dacrisele.

⁴ Ku abba akah abak suge innah, agaagul sinnuk baguuk yoo tuqbude koo tekkeeh, kok aba axcem abteeh yi amri duuduse koo tekkek,

⁵ anuy ku abbak ‹Ku reeda baxak baxal raaqeleeh ku nasab Israayil ummattak abbobti akkele› 'yaanam exceh sugeeh; tohim kaak elle inxicca exce'nnal duuduseyyo.

⁶ Takkay immay sin takku, sin ramad takku, darre yot cabteenik, aba siinik exceh sin akah amrisem cabba hayteenik, yi aftok gersiimih qibaadat culla 'teenikii,

⁷ tonnal a baaxoy anu doore ummattah tan Israayilih ecee sugehiyyak sin ayyaaqeyyo. A Qibaadah Qariy yoo elle taqbudeeni'gidih taahirroyse baaqid luk maraaqa. Israayil ummatta, kulli ikkek yamaate mari elle anqaasah burtan mara akkelon.

⁸ Away tablen Qibaadah-Qari kaxxa qari'mmay abur akkeleeh; wokkek gitah gaca mari a abur yabalu waa waqdi wariggiteloonuuh, qagabsitelon. ‹YALLI a baaxo kee a Qibaadah-Qaril annah tanim akah baahem macak tan kaa?› axcuk waagiselon.

⁹ Too waqdi tokkel suge mari, ‹Ama marat ah akah tekkem, YALLAY ken kaxxa abbobti Masrik yeyyeeqehiyya cabba heenih gabak bicsen duyyeeya qibaadat gaceenih. Tohih sabbatah YALLI tama-umaane keenil oobise› 'yaanam axcelon» kaak iyye.

SULEEMAN CURAM LIH ABE BICA

¹⁰ Suleeman YALLIH Qibaadah-Qari kee kay qari xisne labaatanni sanat kaak beyte.

¹¹ Suur rasuk malikih yen Curam deqsita malik a taama edde aba'gidih, Suleemanah saagan coox kee sariidâ coox kee dahabak faxxa haah gide kaah yecee. A taama gaba kalte saaku, Suleeman wohih galtoh Galiil rasul tan labaatanni magaala kaah yecee.

¹² Curam woo magaalooliy Suleeman kaah yeceehiyya wagta'gidih gexeeh yuble waqdi massakootinna.

¹³ Sarrak Suleemanak, «Yi toobokoytaw, ta magaaloolik sa yoh teceem waytee?» kaak iyye. Too magaaloolik migaaqah Kabul rasu 'yaanam iyye.

¹⁴ Curam, Suleemanah affara alfih kiilok muxxi yakke dahabak ruubeh suge.

SULEEMAN ABSIISE TAAMA

¹⁵ Malik Suleeman YALLIH Qibaadah-Qari kee isi qariiy, kalah kaadu, magaalat maroh heen gaso kee, tonnah kaadu, magaalak ayrô-mawqa le kabut raqta baaxoy ramma luk sugtehiyya edde missoysem, dirkih tamsiisa marih gabak ten. Tohuk kalah, Caxor kee Magiddo kee Geser deqsitta magaalooli kaadu keenit bicsiise.

¹⁶ Dumah yan saaku Masri-malik Geser-magaala qeebit yibbixeh sugeeh, teetil suge mara selli heeh gira teetit ruube. Sarrak woo baaxo Malik Suleeman kay baxá abite saaku ikoytah teetih yecee.

¹⁷ Hay sarra, Suleeman too magaala dirkih tamsiisa marih gabat nammeyhaak xise. Tohuk kalah kaadu, too marih gabat Guba-raqta-Beet-Coron kee,

¹⁸ Baqalat kee, Tamaari deqsitta magaalay Yuudâ rasuk bacarih tan baaxol tanihiyya ken gabat xise.

¹⁹ Lee-kee-qayso akak inxicca 'yaanam kee, faaris kee faarisit beyan gaariira daanah elle hayu waa magaalooli ta marat bicse. Wohuk kalah kaadu, Yarusalaam takkuu, Lubnaan takkuu, hinnay kaadu, kay dardaarinni guffa haa baaxol usuk faxxa haa xisne ken gabat xise.

^20-21 Suleeman a xisne edde absiisem, duma too baaxol suge maray Israayil mari bayse weehiyyak rade marak ten. Too mari migaaqah Amoora kee Ciita kee Fariida kee Ciiwi kee Yabuusa deqsitta kedoodah yaabuke marak ten. A saaku fanah, Israayil mari too marak rade mara naqoosah tamsiisa.

²² Suleeman Israayil mara naqoosinnat abbaxuk manannaay; oson kay qaskar kee qaskar abbobti kee gaariira amrisa mara kee faaris amok qeebi abta qaskarah yenen.

²³ Suleemanah xisne abak yen marak amo wagitak ken tamsiisak yen mari koona bool kee kontom num akkuk yen. Too mari Israayilih yaabuke marak ten.

²⁴ Suleeman, Masri-malikih-baxáy ginnaaqot abbaxuk yenehiyya Yarusalaamal geytimta Dawud-Magaala yaaxigen caafatay duma elle sugtehiyyak tet kaleeh; teetih xise qaril tet hee. Sarrak magaalak ayrô-mawqa le kabut raqta baaxoy ramma luk sugtehiyya missoyse.

²⁵ YALLAH sadgat elle abaana'gidih bicse aracal, Suleeman, sanatal sidiica adda YALLIH migaaqal cado akak carrisan saqih sadgat kee, amaanah xiinaanamih astah aban sadgat elle abak yen. Tonnah kaadu, suruy meqe qerto too aracal qeerisak yen. Yallih Qibaadah-Qaril aban taama tonnal abe.

²⁶ Malik Suleeman, Edom rasuk Agba deqsitta caraatih afal Eelat deqsita aracal xayuk raqta Qexyon-Gabar deqsitta magaalal maraakib bicsiise.

²⁷ Malik Curam isi taamat luk yen maray badal maraakibit elle gexan innih ixxiga lehiyya, too maraakibit Suleeman mara lih taamita'gidih, catoh kaah ruube.

²⁸ Too mari Oofir deqsita rasu fan markabat gexeeniih; gacen saaku, taban kee affara alfih kiilok fula le dahab Suleemanah gabat baahen.