1 Malikwa 8 - NABUWWA KEE MALIKWA

YALLIH QAHDIH-SANDUG QIBAADÂ-QARIL ELLE HEEN INNA

^1-2 Too dabaanal YALLIH Qahdih Sandug, Dawud Magaalay Siyon deqsitahiyyal sugte. Malcinhaytoh alsay Etaanim deqsittahiyyat yamaate Iraawô-Dabih-Qiid deqsita qiidih ayro, ummatta Yarusalaamal koboxxe waqdi, Malik Suleeman, too Sandug Yallih Qibaadah-Qari fan baahaana'gidih, Israayilik saqoltih yan maraay kedoh abbobti kee makaabonuh seeco abe.

^3-4 Sarrak Israayil ummattak saqoltih yen mari elle yani ikkel, seeka Qahdih-Sandug ukkuqqa hayteh Yallih Qibaadah-Qari fan beyte. Leewih yooboke mara kee seeka, Yallih Nabnah-Siraq kee tet addal sugte duyye inkih Yallih Qibaadah-Qari fan been.

⁵ Malik Suleeman kee inkih tan Israayil ummat Qahdi-Sanduguk foocal solla 'yeenih, tokkel mangah loowo sinni illi kee laa sadgatah yusguuden.

⁶ Tohuk gaba kalen waqdi, seeka YALLIH Qahdih-Sandug ukkuqqa hayteh, Yallih Qibaadâ-Qarik addal, Kulliimik-Taahiriinoh-Yayse-Goliy iqiyat raaqahiyyah addal daffeyseenih, woo galwa leemih ceeloh gubal heen.

⁷ Tonnal galwa-leemih galway fakimit tanihiyya YALLIH Qahdih-Sandug kee tet elle yakkuqen cooxuh reebu tekke.

⁸ Tet elle yakkuqen cooxih buxuuxak exxaaxi Kulliimik-Taahiriinoh-Yayse-Goli deqsita aracak foocal soola numuh amballayuk yene'mmay, tohuk kalih kabuk amballayuk mananna. Too coox a saaku fan wokkel elle yan.

⁹ Sandug addat geytimak tenem, namma luucuy xeetik bicseenihiyyak ten. Israayil mari Masri rasuk eweqqa 'yeh safarat yan saaku, YALLI Siinâ-qaleh amol Israayil mara lih abe qahdih-yab too luucul yunkuttube. Too namma xaa too Sandugih addat haytem Muusak ten.

^10-11 Seeka woo Sandug daffessa haytek lakal, Taahirik-Yan-Aracih-addak awaquk sugte waqdi, garciik qamburre qarik adda inkih buulteh; YALLIH nabna yaybulle noori, inkih yan qarik adda ifissa hee. Too waqdi seeka isi taama abtuh adda culaanam maduudinnon.

¹² Sarrak Suleeman dooqa abe. Dooqah iyyemii, «YALLAW, dite kee qamburreh addat gactam dooritte.

¹³ Away koh kaxxam naba qariy dabqih kulli way elle gactu wayta xise» iyye.

SULEEMAN UMMATAH WARSEEMI

¹⁴ Sarrak inkih tan Israayil ummatay soltahiyya fan ufkunna 'yeh, dooqa keenih abe.

¹⁵ Tohuk lakal iyyeemihii, «YALLAY Israayil doore Dagelta kinnihiyya fayla taafay. YALLI isi gabat y'abba abe xagna duuduse» iyye. Kaadu qagseh, iyyemii, «YALLI duma y'abbak,

¹⁶ ‹Inni mara Masrik eyyeqqa heemiiy akke, Israayil baaxol yoo elle yaqbuden qari elle xisu waan magaala dooreh masuginniyo'mmay, yi ummatta xiinissa'gidih, Dawudow, koo dooreh› 'yaanam kaak iyyeh suge» iyye.

¹⁷ Yab tokket mayseedinnay, bisoh beeh iyyeemihii, «Yi abba, YALLAY Israayil doore Dagelta kinnihiyya, elle yaqbuden qari xisam faxeh suge waqdi,

¹⁸ YALLI yi abbah yan Dawuduk iyyeemih, ‹Yoo elle yaqbuden qari xissam faxxe waqdi meqem niyatteh tani'mmay,

¹⁹ woo qari xissu waytam koo hinnay, ku baxa. Atu isih xalte ku baxi xisele› 'yaanam kaak iyyeh suge.

²⁰ «Ta saaku, YALLI iyyeemik cabem maliiy duuduseh. YALLI elle iyye'nnal, Dawud aracal Israayil ummatih malik ekkeh an. YALLAY Israayil doore Dagelta kinnihiyya elle yaqbuden qari xiseh an.

²¹ YALLI isi ummat lih abe qahdi-kutbeh elle yan luuc addat akak yan Sandug too qarih addal heeh an» iyye.

SULEEMAN DOOQA

²² Suleeman toh inxicca 'yeh, gaabowwa 'ye mari kaa elle yable ikkel, sadgatah qidan saqa elle cararisan mansaf gariik solla 'yeh, dooqah namma gaba fayya hee.

²³ Dooqah iyyeemih, «YALLAW, Israayil ummatta doore Dageltaw, kok sa qaran kee baaxol Yalli mayana. Baguuk koo taqbude ku naqoosah litoh tan kacni akak amurruqe waa Dagelta kinnitooh; keenih culte xagana duudusa Dagelta kinnito.

²⁴ Yi abba Dawuduy ku naqasuh yeneh culte xagana duudusseh. Duma edde yabba intem inkih, tiya tiyah duudusseh.

²⁵ Taway YALLAW, Israayil ummatta doore Dageltaw, duma yi abbak koh duudusseyyo inteemik inki tiyay raqtehiyya tan. Tohumuu, ‹Kok radu waa mari, atu akah abte innah, anu aba excem dudda luk abe ken tekkek, tonnal ku reeda baxak baxal raqta reeda akkele› 'yaanam inteh ten.

²⁶ Tonna kinnuk Israayil ummatta doore Dageltaw, atu inxicca 'teeh yi abba Dawuduy ku naqasuh sugehiyyah culte xagni ku gabat dudda geyay.

²⁷ «Yi Dageltaw, baaxo koo tabbixeemih dudda geelee? Qaran kee qaraanak ellecabot raqta qaraanitte tabbixu dudda akah gee wayta Dagelta kinnitok, hay, xise-qari-baxi mannal koo abbixele?

²⁸ YALLAW, yi Dageltaw, anu ku naqasu kinniyok, aba dooqa yok oobbeyaay, a saaku koo akah kallacam yoh duudus.

²⁹ A qarik bar kee loqoh amo wagit. A qariy ku qibaada-elle-takke'gidih doortehiyyah fan ufkunna exceh kulli waqdi abah an dooqa yok raabit.

³⁰ Yooy ku naqasuh yanihiyya kee ku mara ta Qibaadah-Qari fan ufkunna inneh abna dooqa nek raabit. Qaraanay ku dabqih yanihiyyak ni kallaci oobbeyaay, abne dambih qafu neh ab.

³¹ «Sahdaytuk, ‹Qellat bahte›, 'yeenih kaa xiibsisaana'gidih, ta Qibaadah-Qari fan kaa baahen ken tekkek, too num ‹Anuy baahem mayyu› 'yaanam axcuk Qibaadâ-Qaril yan sadgat elle aban aracih foocal xiibite kaa tekkek,

³² too waqdi, yi Dageltaw, qaraanak ken ankacisaay, cakki le num uybulluy. Qellat le numul celta digaala kaat abaay; qellat baahe wee num currih rub.

³³ «Atu isi mara abte Israayil ummatta kol baahen dambik gexxaamah, naqboytit keenik tiysiise koo tekkek, oson toh ubulla heenih kol yuduureeniih, ta Qibaadah-Qarih fan amma 'yeenih koh rammitta axcuk, ‹Yallaw, abneh nan dambik qafu neh ab› axcuk, dooqa abeenik,

³⁴ elle tan qaraanaak too dooqa keenik raabit. Ku ummatta abteh sugte dambik qafu keenih abaay; dumaak ken kaxxa abbobtih teceeh sugte ken baaxo fan ken gacis.

³⁵ «Ku ummatta kol bahte dambik gexxaamah, qaran alfimeeh rob waytimam ubulla heenih; too saaku toobitta 'yeenih koh rammitak, a Qibaadah-Qari fan ufkunna 'yeenih dooqa aben ken tekkek,

³⁶ too dooqa elle tan qaraanaak keenik raabit. Israayil ummattay ku naqoosah tanihiyya abte dambik qafu keenih ab. Edde gexan meqe-gita ken baris. A baaxo, ku baaxoy ku marah ikoytah teceehiyya kinnuk, rob tet mawaysiisin.

³⁷ «A baaxol qulul rade kee, dalkay numuk numut tabtahiyya sinaamat rade kee, tooboke daro orongoobitiiy caaco bayse kee, qanayti sele yekkek, naqboytit qeebih magaala keenik marot haytek, biyak ken yabbaxuuy, gibdaabina keenil lem keenit tikka 'tek,

³⁸ tohuk dooqa aban waqdi dooqa keenik oggol. Yi Dageltaw, ku ummattay atu isih doorittehiyyak faxe num abe dambih baguuk nadaamitta 'yeh, gaba fayya haak a Qibaadah Qarit ufkunna 'yeh dooqa abe kaa tekkek,

³⁹ ken dooqa raabit. Qaraanay ku dabqah yanihiyyak ken dooqa ankacisaay, dambik qafu keenih abaay ken cat. Sahdayti afqadoh addat yascubem taaxigem, dibuk koo. Tonna-kinnuk, kulli numuh kay abini elle aninnaan innal, keenil uckum.

⁴⁰ Tonnal ku mari atu ken kaxxa abbobtih ikoytah tecee baaxol yaniinim fanah ku yab oggolak xiinelon.

^41-42 «Israayilih aabuke waamah faxe numuuy takkay, ku nabna kee ku qande kee cayla yaabbu waa waqdi kee, ku abini le innak xaagu geyu waa waqdi, a Qibaadah-Qaril dooqa aba'gidih xer baaxok yemeete kaa tekkek,

⁴³ too dooqa kaak raabitaay koo akah kallacem kaah ab. Isih dabqah elle tan qaraanak kay yab oobbey. Tonnal, Israayil ummattak kaxxih, addunyal enna 'ta ummatta koo aaxigeleeh ku amri duudusele. Toh lih kaadu, a qariy anu xisehiyya koo elle yaqbuden qari kinnim aaxigelon.

⁴⁴ «Ku mari, atu ken amrissa waqdi, naqboytiitih isik yan marat qeebi abaana'gidih gaadan waqdi, faxe ikkeliiy yanoonay, a magaalay isih doorittehiyya kee ta Qariy ku qibaadah xisehiyya fan ufkunna 'yeenih kooy YALLAH yanihiyya kallacan waqdi,

⁴⁵ elle tan qaraanak ken dooqa oggolaay nasri keenih ucuy.

⁴⁶ «Dambit ase waa num mayanaay; tohih sabbatah ku mari dambi lem kol baahen ken tekkeeh, tohuk gexxaamah ku naqbi keenil oobeeh, naqboytit gabal ken hayte koo tekkeh, woo naqboytit xer baaxo takkuu, xayi baaxo takku, seewah ken been ken tekkek,

⁴⁷ kaskassoowan waqdi, ‹Yallaw, dambit asneh naniih umam abneh noysommeh nanik, qafu neh ab› axcuk toobiten ken tekkek, too tooba keenik raabit.

⁴⁸ Oson too baaxoy seewah-ken-elle-beenih sugeenihiyyal nummaak isinni afqadook toobitta 'yeenih koo kallacan ken tekkekii, too kallaciy kot abaanahiyya kaadu a rasu ken kaxxa abbobtih ikoytah taceehiyya fan ufkunnaay, kaadu ta magaalay atu isih doorittehiyya fan ufkunnaay, tonnah kaadu, ta qariy anu ku qibaadah xisehiyya fanah afkunuk aben ken tekkek,

⁴⁹ tonnal, YALLAW, too dooqa keenik oggol. Qaraanay ku dabqah yanihiyyaak dooqa keenik oobbeyaay, keenih racmataay, ku mari abba hee dambi keenih cab.

⁵⁰ Kol bahha heen umaane kee dambik qafu keenih ab. Seewah ken bee marih gaba keenil xabbacos.

⁵¹ Israayil mari ku maraay, ku ikoyta. Masri rasuy gira keenil yekkehiyyak addak teyyeeqe ku mara kinnon.

^52-53 YALLAW, Mulki le Dageltaw, duma ni kaxxa abbobti Masri rasuk teyyeeqe saaku, Muusay ku naqasuh yanihiyyak, ‹A mara inni mara aba'gidih baadal tan ummattah addak ken doore› 'yaanam inteh ten. Akah inte innah, nummah ku maray atu doorittehiyya kinnon. Tonnal, a maray isim abtehiyya kee, yooy ku naqasuh yanihiyya kot abna kallaci nek macinin. Kol esserinnaan im neh oggol» iyyeeh, dooqak gaba kaleh.

⁵⁴ Suleeman ta dooqa abe waqdi, namma gaba qaran fan fayya heeh, YALLAH sadgat elle aban aracak foocal gulubuh gaceh abe. Too dooqak gaba kale waqdi, tokkek ugutta 'yeh,

⁵⁵ anay fayya haak, «YALLAW, akkel gaaboowe Israayil marat inkih barkat hay» 'yaanam iyye.

⁵⁶ Sarrak kaadu qagseh, «YALLI isi naqasuh yan Muusal oobise meqe qahdi inkih duuduseh. YALLAY, akah inxicca 'ye innah, isi ummattah wagari kee amaan yeceehiyya fayla taafay.

⁵⁷ «YALLAY ni Dageltah yani, ni kaxxa abbobti'lih akah suge innah, ne'lih yanay. Nee cabe waay ne'lih yanay.

⁵⁸ Usuk ni kaxxa abbobtil yecee amri kee madqa dacrisna'gidiiy, kay gita oggolla'gidih, usuk faxam katatnuh digga le afqado net haay.

⁵⁹ YALLAY ni Dagelta kinnihiyya anu away a dooqa abe waqdi kaa kallacem hawweene waay. Usuk doorite Israayil mara kee ken malikih yamqay. Cakki ayrook ayro keenih duudusay.

⁶⁰ Tonnal, addunyâ-bagul yan mari inkih, Yalli dibuk kaa kinniih; kaak sa gersi Yalli ane waam aaxigelon.

⁶¹ Isin, kay maraw, ta saaku akah abten innah, baguuk YALLAY ni Dagelta kinnihiyyal yaamineeh, kay amri kee usuk nek faxam oggola mara tika» 'yaanam iyye.

QIBAADÂ-QARI TAAHIRROYSEN

⁶² Tohuk lakal Malik Suleeman kee wokkel suggu 'ye mari inkih YALLAH sadgat aben.

⁶³ Amaanah xiinaanamih astah aban sadgatah, Suleeman laak labaatanna kee namma alfi yusguudeh. Illi kee wadarak bool kee labaatanni alfi yusguude. Israayil ummatta kee malik toh akah abeenim, a sadgat, YALLIH Qibaadah-Qarih orba sadgat yakke'gidik ten.

⁶⁴ Too ayroh addat Qibaadâ-Qarih daaratih addal, hununuh Qibaadâ-Qarih foocat raqta fanti exxa Yallih taamah taahirroyseh. Tokkel cado akak inkih cararisu waa saq yusguudeh, sadgatah daro baahe. Kaadu amaanah xiinaanamih astah aban sadgatak xayta cararise. Too sadgat woo aracal akah abem, sadgatah qidan saq elle yasguudeeni'gidih, nacaasak bicsen mansaf a axxul le sadgat bagul akak abaanah gide nabnah akkuk mananna.

⁶⁵ Qibaadâ-Qaril Suleeman kee inkih tan ummatta Iraawô-Dabih-Qiid deqsita qiidih YALLAY ni Dagelta kinni aynabukuuy africuk malcina ayro qiidih asen. Too qiidih gaaboowe mari kaxxam manguk yeneeh; Camat deqsitta daabak xabba haanamaay Masri cuduudul yan daqaarah amma 'yaanam baaxok inkih mango mari woo qiidih yemeete.

⁶⁶ Bacarhaytoh ayro Suleeman yemeete mara le baaxo fanah rubsuuse. Too ummattay YALLI isih doorehiyya, YALLI Dawuduy kay naqasuh yenehiyya kee Israayil ummattat hee barkat yublen waqdi, kaa faylisak ruffu axcuk yuduuren.