1 Malikwa 7 - NABUWWA KEE MALIKWA

SULEEMAN ISI QARI XISE

¹ Suleeman isih kaadu qari xissiteeh; too-qarih-xisne taban kee sidooca sanat kaat faxxe.

^2-3 A qariy xisehiyyak exxak teenah migaaqah ‹Lubnaan Garboh Kaxxa Goli› 'yaanam yeyyeeqe. Too goli xexxaarah bool cusul akkuk yen; baguh kontom cusul akkuk yen; fayyah soddom cusul akkuk yen. Addal sariidak bicsen qamidway affara rooruh yanihiyya heenih yenen. Too qamidwak amol, morootom kee koona cooxuy sariidak bicseeniy amô-tabsah haanahiyya yen. Kulli roorut taban kee koona caxa akak ten. Qarik kaadu amo akak bicseenim sariidak ten.

⁴ Gidaarak namma kabuk kulli kabuk inkih, caacay-culma sidiica rortah cabeenih yenen.

⁵ Afa kee alifu akak affara ruknik xiseenih yenen. Namma kabuk gidaarat rooruh yan sidooca alifu titta fan afkanuk yen.

⁶ Qamidwâ-Goli deqsita arac xise. Too arac xexxaarah kontom cusul akkuk yen; baguh soddom cusul akkuk yen. Too aracak afal kaadu qamidwa sooliseenih, too qamidwak amol sugte tabsi-cooxuk exxa fulak caben.

⁷ Suleeman daffa 'yeh cokmi elle abak yen malik-korsi elle ten goli, migaaqah cokmi-qari deqsitak yen. Too goli gubak xabba haanamay amo fan inkih sariidat exfeenih yenen.

⁸ Suleeman dabaaqah elle yan qari, cokmi elle aban qarik darre le kabut yeneeh; too qari-xisnek raqqa 'te qarwah innal xiseenih yenen. Isi barrah kaadu too bis le qari xiseh yen. Kay barra Masri-malikik baxak ten.

⁹ A qarwa gubaay dagah akak bicseenim, meqe'nnal missat oren xeetiy saytunihiyyak ten. A xeet missal oren xeetik teneeh; adda le kabu kee iro le kabuk inkih xisnek fule kee uxuxxoote yakkeemik missat oreenih bicsen xeetik ten.

¹⁰ Qari-rakiibo akak bicseenim, bagu naba xeetiy xeet elle yayyaaqen ikkel elle bicseenih baaheenihiyyak ten. Too xeetik garab tabna cusul xexxaarah akkuk yeneeh; garab kaadu bacra cusul xexxaarah akkuk yen.

¹¹ Woo xeetik amol kaadu cusulul oreenih bicsen xeet kee, sariidak bicsen amô-tabsah haan coox yen.

¹² Malik-qarih-kaxxa-daarat kee, Qibaadâ-Qarih-addah-daarat kee Qibaadâ-Qarih-adda akak culan naharsi goli inkih, sidooca xaay oreenihiyyay tittin bagul heenik xisen. Woo xeetik amo le kabul sariida heen. Kulli gidaarak daga raaqa aracah amma 'yaanamah tonnal bicsen.

CURAM ABE TAAMA

¹³ Malik Suleeman Curam deqsita numuy gabâ-naggaarinna luk yenehiyyah farmo ruube. Woo num buxa Suur deqsitta magaalal luk yen. Nacaasak mansafwa bicsaanamih ixxiga luk yen.

¹⁴ Kay abba Suur-marah aabakuk yeneeh; addunyal yen saaku kaadu nacaasak mansafitte elle bicsa innah ixxiga luk yen. Kay ina Naftaali deqsitta kedoh tooboke. Curam, kaxxam bagi cubbi leeh yublen xayih raaqisa numuy nacaasak duyye bicsaanamih ixxigal muxxo lehiyyah yen. Suleeman nacaasak bicsan mansafwah taamah abbah kaa hee. Curam toh kaak oggoleh.

NACAASAK BICSEN QAMIDWA

¹⁵ Sarrak Curam namma qamidduy nacaasak bicseenihiyya hee. Too qamidwak kulli tiiy taban kee bacra cusul fayyah akkuk yen; galbabbaqinaaneh taban kee namma cusul akkuk yen.

¹⁶ Toh lih kaadu, woo qamidwak nammayak inkih, amot nacaasak bicsen sacni-af-le-duyye hee. Too namma duyyek kulli tii koona cusul xexxaarah akkuk yen.

¹⁷ Woo sacni-af-le-duyyek kulli tii, bagul sudaaducuh tittat yoxeen silsilatih taswiiriy malciin yakke heeh yen.

¹⁸ Tohuk kalah kaadu nacaasak bicsen rummaanat taswiiriy namma rooruh yani heeh yen.

¹⁹ Qamidwah amot heen namma sacni-af-le-duyyek amol kaadu aki mansafway birro weelo luk tenehiyya hee. Kulli tiiy fayyah affara cusul akkuk yen.

²⁰ Woo mansaf elle heenim, qamidduk silsilat taswiir elle yani ikkek daga raqqa 'ta amoy maroh tanihiyyak ten. Rummaanak namma boolih xayloy namma rooruh tanihiyyah taswiir woo mansafih bagul yen.

²¹ Curam too namma qamidduy nacaasak bicseenihiyya Qibaadâ-Qarih adda akak culan naharsi golik foocal hee. Migda le kabul yen qamiddi migaaqah Yaakin deqsitak yen; gura le kabul yen qamiddi Booqas deqsitak yen.

²² Birro weelo luk yen nacaasak bicsen namma mansaf namma qamiddih amot yen. Qamidwâ-bicak tonnal gaba kalen.

NACAASAK KAXXA TANAK BICSE

²³ Curam kaadu nacaasak sacni gurral yan kaxxa tanak bicse. Too tanakak adda koona cusul akkuk ten. A kabu kee woo kabuk fidnah tabna cusul akkuk ten. Soddom cusul kaadu inkih yan tattab kaak akkuk yen.

²⁴ Namma roorul tan xalâ taswiir tanakak a exxaay woo exxal yen. Too tanakak kulli cusulul tabna taswiir heenih yenen. A taswiir yakkeemiik raaqe tanakak baxsa sinni gurral bicseenih yenen. Toh elle abeenim mannaay innekii, naharak boodo tanak missal xagen. Woo boodok tattabat xalâ-taswiiritte bicsen. Tanak kee tasaawir bicsaana'gidih, diyaayisen nacaas elle caxen. Tonnal woo xalooli-tasaawir woo tanakih bagul yewqe.

²⁵ Too tanak nacaasak bicsen taban kee namma awurih ceeloh amol daffeyseenih yenen. Too awurwak kulli sidocuuy inki kabul afkanuk yen.

²⁶ Woo tanak masuh gaba gennaqtah gide akkuk yen. Af akak figgaan af ceelak yen. San-san akak xambaqu luk cabeenih yenen. Too tanak leek morootom alfih litri abbaxuk yen.

NACAASAK KAADU TABNA GAARI BICSEN

²⁷ Tohuk kalah kaadu, tabna gaari nacaasak bicse. Woo tabna gaarik kulli gaari, xexxaarah affara cusul akkuk teneeh, baguh kaadu affara cusul akkuk teneeh, sidooca cusul kaadu fayyah luk ten.

^28-29 Naharak nacaasak affara rukni bicseeniih, tohuk sarra galdaddaqin nacaas addal heen. Woo galdaddaqin nacaasak bagul lubak kee awuruuy, galwa leemih taswiir aben. Woo affara rukni bicsen nacaasak bagul kaadu woo gurral yan tasaawir heen. Woo taswiirih guba kee dagal silsilat ceela taswiir heen. Tabna gaari elle bicseenim, tonnak ten.

³⁰ Woo gaarik kulli tiya edde gexxa nacaasak bicsen affara iba luk ten. Woo affara ibi kaadu nacaasak bicsen mansafay gaarih iba yasgayyehiyya luk yen. Kulli gaarih amol kaqaylo sacni yen. Kaqaylo sacnih buxux elle daffeysan birti gaarih addal yen. Woo birtih bagul silsilat ceela taswir heen.

³¹ Woo gaarih amol, maroh yan mansafay sacni elle daffeysaanahiyya yeneeh; woo mansaf masuh inki cusul akkuk yeneeh; baguhuu, cusul kee garab akkuk yen. Bagul haxaxa bilqah luk yen. Kulli gaari affara rukni luk ten.

³² Gaarik kulli ibak, a san kee woo sanih fan, xexxaarah cusul kee garab akkuk yen. A gaarih iba yasgayye mansaf, gaarit xakabuh yen.

³³ Woo gaarih ibitte faras gaarih ibitteh inna luk ten. Gaari akak bicsen ibitte inkih nacaasak ten.

³⁴ Kulli gaari ibak gubat elle solta mansafay wadir gaarit xakabuh yanihiyya luk ten.

³⁵ Kulli gaarih amot maroh yan mansaf yen. Too mansaf xexxaarah cusuluk garab akkuk ten. Gaari amol akak tan mansaf gaarit xakabuh yen.

³⁶ Gaari amol akak tan mansafak inkih yan xagaral galwa leemih taswiir kee lubak kee nakliita taswiir heeh yen. Afal silsilat ceela taswiir heen.

³⁷ Too tabna gaarih bici elle yekkem too gurrak ten. A tabna gaarih takkeemiik inki ceelooy inki weelo kee inki masu luk ten.

³⁸ Curam gaariirak kalah kaadu tabna sacni bicse. Too tabna sacnik kulli sacni, gaarik bagul heenih yenen. Kulli sacnik a exxaay woo exxa affara cusul xexxaarah akkuk ten. Kulli sacni bacra boolih litri leek abbaxuk yen.

³⁹ Gaarik konooy Qibaadâ-Qarik migda le kabul heeh, aki konooy kaadu gura le kabul hee. Sacni gurral yan kaxxa tanak kaadu Qibaadâ-Qarik gabbi le kabut raaqa tattab kee ayrô-mawqa le kabut raaqa tattab elle yangale aracak xaqul hee.

CURAM BICSITEEMI

⁴⁰ Curam tohuk kalah kaadu gombod elle caxan distiiy, badiilaali kee, rifan qabala kee lee elle haan sacnitte bicse. Curam Suleeman kaal yecee taamak gaba kaleeh, YALLIH Qibaadah-Qarih-taama seleh. Usuk bicse duyye ah teeti:

⁴¹ Naharak namma qamiddu bicse. Sarrak woo namma qamiddih amot haan sacni af le duyye bicse. Woo duyyek bagul sudaaducuh tittat yoxeen silsilatih taswiir kee

⁴² rummaan-taswiiriy affara bool mangah yakkehiyya hee. Too taswiir, qamiddi amot haan sacni af le duyyeh bagul, kulli tiyak a exxaay woo exxak namma rooruh hayya heenih duuduseenih yenen.

⁴³ Tohuk kalah kaadu tabna gaari kee tabna sacniiy,

⁴⁴ kaxxa lee tanakaay, woo tanak qekuh elle yan taban kee namma awurih ceelooy,

⁴⁵ gombod elle caxan distiiy badiilaali kee, rifan qabala kee lee elle haan sacnitte bicse. Curam YALLIH Qibaadah-Qaril heen duyye akak bicseeh, Suleeman kaal yecee taama akak abem, isiffiyya heen nacaasak ten.

⁴⁶ Suleemanah a duyye inkih elle bicseenim, Ordon daqaarak Sukkot kee Xartan fanal yan aracay qasa-burta elle geytimahiyyak ten. Tokkelii, too duyyeh weelo qasa-burtak bicseenih, diyaayisen nacaas elle caxen.

⁴⁷ Suleeman a duyye qilsak leh gide yable'gidih, miizaanal haamak kaxxam manguk teneeh; tohuk gexxaamah qilsak leh gide taaxigem mananna.

⁴⁸ Suleeman wohuk kalah, YALLIH Qibaadah-Qarih-addal tan duyye dahabak bicsiise. Tohum, sadgatah qerto elle qeerisan aracaay, Yallih sadgatah xayyoosan gaqambo amol akak tan miiz kee,

⁴⁹ tabna caxxay faanuswa amol akak haana. Too cooxuy dahabak bicseenihiyya elle heenim, Kulliimik-Taahiriinoh-Yayse-Golik fooca; konooy gura le kabuk yeneeh, aki konooy migda le kabul yen. Tohuk kalah, qobor gurral bicsen duyyeey, faanuswa kee maxbaxay xibcin edde yabbixeeni kee,

⁵⁰ figaaginiiy, faanuswa edde bargusan afti-xaylooy, sacnitteey, qeerisan qaydarus elle haan mingilwa kee, xikcin elle haan kabaaba inkih, saafik yan dahabak bicsiise. Tohuk kalah kaadu, Kulliimik-Taahiriinoh-Yayse-Goli kee Qibaadah-Qarik iro le kabuk akak culan albaab tabbixe duyye inkih dahabak bicsiise.

⁵¹ Tonnah abak, Suleeman YALLIH Qibaadah-Qarih xisnek gaba kaleh. Too waqdi Suleeman, kay abba Dawud YALLIH qibaadah loowe duyyey rikeek abbaxuk sugehiyya gaabossa heeh, sarrak Qibaadah-Qarik mattacoh yaceen duyye elle daanisan golitteh addal hee. Tohumuu, dahab kee lakqo kee, kaadu wohuk kalah, gersi duyyek ten.