1 Malikwa 6 - NABUWWA KEE MALIKWA

SULEEMAN QIBAADÂ-QARI XISE

¹ Israayil-mari Masri cabeh yemeeteemih affara bool kee bacra tabanih liggidi tikkaay, Suleeman Israayil-marih-malik yekkeemih affara sanat tikka 'ye saakuy, alsak kaadu Diw deqsita alsay nammayhaytoh alsa kinnihiyyat yanin saaku, Suleeman Yallih Qibaadah-Qarih-xisne qimbise.

² Too qariy Suleeman xisehiyyak adda woo exxaay a exxah xexxaarah lactam cusul akkuk teneeh, baguh labaatanni cusul akkuk ten. Soddom cusul fayyah akkuk ten.

³ Qibaadâ-Qari akak culan naharsi goli xexxaarah tabna cusul akkuk ten. Qibaadâ-Qari baguh labaatanni cusul takkeh, tonnah kaadu, a exxa inki gid takke.

⁴ Qibaadâ-Qarih taagoota qax elle meqe innal xexxaarinuk afa akak qunxuk cabe.

⁵ Qibaadâ-Qarik dariifat qunxa qarwa xiseeh; too qarwa iro le kabuk Qibaadâ-Qarit xakabuh raaqak ten.

⁶ Too qarwa sidiica adda ittak amol xisneh ten. Guba raqta qarwa baguh koona cusul akkuk ten. Fanti-qarwa baguh lica cusul akkuk ten. Inkih daga raqta qarwa baguh malcina cusul akkuk ten. Qibaadâ-Qarih gidaar boohaysaanam faxxiime waak teneemih sabbatah, fanat raku akak heen.

⁷ Xisne aben waqdi maataka kee godma kee, tonnah kaadu, birtak bicsen mansafitteh xongolo akah antaabbe wayta innah, missat orra heenih baahen xeetik xisen.

⁸ Qibaadâ-Qarik gabbi le kabuk xakabuh tan qarwa culaana'gidih, afa ten. Too afak fanti-qarwa kee inkih daga raqta qarwa akak yewqen mawqeena ten.

⁹ Malik Suleeman Qibaadâ-Qarih-xisnek gaba kaleh. Qarik adda le kabul amô-tabsi coox kee luucaanah, sariidah caxak heen.

¹⁰ Taaxige sidiica qarway tittak amol tanihiyyak kulli qari fayyah koona cusul akkuk yeneeh; Qibaadâ-Qarik iro le kabuk xakbisaana'gidih, sariidâ coox amô-tabsuh heen.

¹¹ YALLI Suleeman lih yaabeeh, iyyeemih,

¹² «Anu siinih oobise xinto kee amri oggoltek, a qariy atu away xissahiyyah giddinaamak ku abbah cule xagana duuduseyyo.

¹³ Away Israayil ummatay yi mara kinnihiyyah addal gaceyyo. Israayil mara booxal qidda heeh macaba» kaak iyye.

¹⁴ Suleeman Yallih Qibaadah-Qarik gaba kaleh.

QARI-ADDA BILQISEN

¹⁵ Qarik adda le kabuk gidaaraay amo fan sariidak bicseeniih; qari-baaxak bagul kaadu saagan-coox akak hee.

¹⁶ Kulliimik-Taahiriinoh-Yayse-Goli deqsita goli elle yenem, Qibaadâ-Qarik iqiyak ten. Too golik gambi sariidak bicse. Qibaadâ-Qarik darre le kabuuk woo aracak goli gambi fan, xexxaarah labaatanni cusul akkuk yen.

¹⁷ Woo aracak fooca le kabul yan arac xexxaarah morootom cusul akkuk yen.

¹⁸ Qarik adda qobor kee xalooli taswiir elle heen sariidah cooxut bilqisen. Qari akak bicsen xeet ambulle waa'gidih, qarik bagu inkih sariidat alfen.

¹⁹ Qibaadâ-Qarik iqiyal yen Kulliimik-Taahiriinoh-Yayse-Goli, YALLIH Qahdih-Sandug elle haana'gidih, bicsen.

²⁰ Woo arac xexxaarah labaatanni cusul akkuk yen. Baguh kaadu labaatanni cusul akkuk yen. Fayyah kaadu labaatanni cusulih gide akkuk yen. Golik adda inkih, agle sinni dahabak exfen. Sadgat elle aban aracay sariidak bicseenihiyya kaadu agle sinni dahabak exfen.

²¹ Qibaadâ-Qarik adda inkih dahabak bileenih yenen. Qibaadâ-Qarik Kulliimik-Taahiriinoh-Yayse-Golik adda akak culan afat dahabak bicsen silsilat axawah yen.

²² Inkih yan qarik addak baaxaay gidaar kee amo inkih dahabak exfeenih yenen. Kulliimik-Taahiriinoh-Yayse-Golik adda, sadgat elle aban mansafak inkih dahabak exfen.

²³ Kulliimik-Taahiriinoh-Yayse-Golih addal, galwa leemih ceelok nammay wagartok bicsen. Tohum sidooca sahdayti le xexxaarih gide akkuk ten.

^24-26 Woo nammay masu kee ceelok titta ceelak ten. Kulli tii namma gali luk yen. Kulli gali koona cusul xexxaaarah akkuk yen. Kulli galik a exxaay woo exxa fan xexxaarah tabna cusul akkuk yen.

²⁷ Sarrak too nammaamay galwa lehiyya Kulliimik-Taahiriinoh-Yayse-Golik woo exxa kee a exxal heen. Tiyak teenak gali, golik-gidaar xagak yen; akittuk gali kaadu, golik gersi gidaar xagak yen. Sarrak ken nammayak gali wadir titta xagak yen.

²⁸ A nammaamay galwa lehiyya dahabat exfeenih yenen.

²⁹ Qibaadâ-Qarih golittek fanti goli kee Kulliimik-Taahiriinoh-Yayse-Golih agantah, gidaarwah bagul, woo nammaamay galwa lehiyyah ceelo kee, nakliita kee, fakimit yan qobor taswiirit bilqiseenih yenen.

³⁰ Inkih yan Qibaadah-Qarik baaxa dahabat exfeenih yenen.

³¹ Kulliimik-Taahiriinoh-Yayse-Goli akak culaana'gidih afa bicse. Woo afa wagartok bicsen namma alifuy sittat xakabuh yanihiyya luk ten. Woo namma alifuk inkih, daga raqta exxa qunuunusen qansa-caxxa ceelak ten.

³² Too Kulliimik-Taahiriinoh-Yayse-Golik alfentih bagul, galwa leemih ceelo kee, nakliita kee qobor taswiirih akak heen. Sarrak woo namma alifu kee, nakliitah coox kee galwa leemih ceeloy woo namma alifih bagul taswiirih heenihiyya dahabat exfen.

³³ Qibaadâ-Qari akak culan afay affara rukni lehiyya wagartok bicsen.

³⁴ Tohuk kalah namma alifiy xambaqimahiyya saaganak bicse.

³⁵ Too namma alifih bagul, galwa leemiiy nakliita kee qobor taswir yen. Bagul dahab exfeenih akak yenen.

³⁶ Qibaadâ-Qarih-addah-daaratak sidooca xaay oreenihiyyay tittin bagul heenihiyyak lakal, woo xaak amo le kabul sariida coox haak bicsen. Kulli gidaarak daga raaqa aracah amma 'yaanamah tonnal bicsen.

³⁷ YALLA elle yaqbuden Qarih rakiibo, Suleeman malik edde yekke fereyhayto sanatak nammeyhaytoh alsak Diw deqsitahiyyat aben.

³⁸ Suleeman malik yekkeemih taban kee inikhaytô-sanatak bacarhaytoh alsak Buul deqsitahiyyat, woo-qarih-xisnek gaba kaleenih. Hununuh kaa lowwa heen xisoh kaa xisen. A-qarih-xisne Suleemanat malcina sanatih gide faxxe.