1 Malikwa 4 - NABUWWA KEE MALIKWA

SULEEMAN GUBAL TEN DOOLATIH ABBOBTI

¹ Suleeman inkih tan Israayilik malikih yen.

² Kay gubal taamitak yen maray kaxxa-kaxxa-marih taamah-luk-yenehiyya iyyaay innek, Saadúk-Qadarya diini-abbah yen.

³ Siisâ-xayloh-nammayay migaaqah Aciiya kee Alicoref deqsitahiyya kutbe-abeenitik ten. Aciilúd-Yacoosafat takkem-yaktubih yen.

⁴ Yoyadáq-Banaaya inkih tan qaskarak abbah yen. Saaduk kee Abiyataar diini-abbobtik ten.

⁵ Naatán-Qadarya rakaakayitteh-abbobtih abbah yen. Naatán-Xaabud, sek kee malikih-fayu-yecee-kasloytak yen.

⁶ Aciisar malik-qarih abbah yen. Abdá-Adoniiram dirkih tamsiisan marih amol yen.

⁷ Suleeman dabaanal, inkih tan Israayil baaxol enna 'ta taban kee namma rakaakay, taban kee namma abba luk ten. Too taban kee namma abba sanatal inki alsa, malik kee malik buxah marah, leek maaqo baahak yenen.

⁸ Too taban kee namma numih migaq kee reeda elle luk sugen rakaakayitteh migaq ah kaana: Cuur-baxi abbah elle sugem, Efrayim rasuk qaleela mango aracak ten.

⁹ Deker-baxi abbah elle sugem, Makax kee Saqalbim kee Beet-Semes kee Eelon-Beet-Canan deqsitta magaaloolik ten.

¹⁰ Cesed-baxi abbah elle sugem, Arubbot magaala kee Sooko magaala kee inkih yan Ceefar rasuk ten.

¹¹ Abinadab-baxay Suleeman baxá ginnaaqot abbaxuk yenehiyya inkih yan Door rasul abbah yen. Kay barra migaaqah Taafat deqsitak ten.

¹² Aciilúd-Baqna kaadu Taqnak kee Magiddo deqsitta magaalooli kee Beet-Saqan garil enna 'ta baaxok abbah yen. Beet-Saqan deqsitta baaxo, Yidraqel magaalak xayi tan Xartan deqsitta magaalak xabba haanamaay Aabil-Macoola magaala kee Yokmaqam magaalah amma 'yaanam tan baaxo.

¹³ Geber-baxi abbah akak yenem, Gilqad rasul tan magaalay Raamot deqsita kee, Yaaqir-gulubuy Manassek radehiyyah mandarway Gilqad-rasul enni 'ta kee, Basan-rasuk Argob deqsita aracal geytimta lactam takke magaaloolik ten. Too lactam magaala inkih gasoosa maroh edde teneeh; gasoosah alfentah nacaasak bicsen biriita luk ten.

¹⁴ Qiddó-Acinadab, Macanaayim rakaakayak abbah yen.

¹⁵ Suleemanak baxáy Basmat deqsittahiyya abbaxuk yen Acimaax, Naftaalî-rasuk abbah yen.

¹⁶ Cuusáy-Baqna, Aaser-rasu kee Baqlot-magaalak abbah yen.

¹⁷ Faruwác-Yacoosafat kaadu Issakar-rasuk abbah yen.

¹⁸ Eelá-Simqi, Benyam-rasuk abbah yen.

¹⁹ Uurí-Geber, Gilqad baaxok abbah yen. Duma Sicon deqsita malikiy Amoora deqsita marak malikih suge kee, Qoog deqsita malikiy Basan deqsitta baaxok malikih sugehiyya too baaxol xiinisak sugte. Too taban kee namma numuk kalah kaadu, keenik inkih amol raaqa num heeh.

²⁰ Yuuda kee Israayil mari mangah arrooqih gide akkuk yeneeniih, isinnih elle faxen innal akamukuuy aaqabuk farcaanak yenen.

²¹ Suleeman reedah amol akak yenem, Furaat weeqaytuk xabba haanamaay Filistiin kee Masri cuduuduh amma 'yaanam tan baaxok ten. Too mari gabbara kaah acayuk, usuk addunyal suggu 'yem fanah kay gubat sugen.

²² Suleeman kee Suleeman-marih fanal kulli ayro maaqok ankammuk tenemii, nabam adda meqe bululuk bool kee labaatanni kiis kee, tonnah kaadu, cabubuk namma bool kee morootom kiis takkem ankammuk ten.

²³ Too daro lih gabâ-maaqoh sugsen awurwak taban kee, qaysoh sugte awurwak labaatanna kee, illi kee wadarak bool takkem kulli ayro maaqoh qidak yen. Toh lih kaadu wayxex kee qarkuddo kee segeeri kee dorrahik mangom keenih baahak yenen.

²⁴ Suleeman Furaat-weeqaytuk ayrô-culma le kabut raqqa 'ta baaxok, Tifsac-rasuk xabba haanamaay Gaadâ-magaalah amma 'yaanam tan baaxo isi milkih hee. Furaat-rasuk ayrô-culma le kabut raqta baaxol sugte malikwa inkih kay gubat gacte. Cuggaaneh kaak tan baaxooxah mara kee kay fan kaxxam muquk ten.

²⁵ Usuk suggu 'yem fan, Israayil kee Yuudah yooboke mari amaanah xiinak suge. Kay dabaanal Israayil kee Yuudâ rasul suggu 'ye mari amaanah yeneeh; numtin amol qinab-xalta-caxa kee *sublayto luk yenen.

²⁶ Suleeman faaris-gasoosay gaari edde beya faaris tabbixehiyyak morootom alfi gaso luk yen. Tohuk kalah kaadu, amot akak gacan faariisak taban kee namma alfi luk yen.

²⁷ Usuk rakaakayah abbobtih hee taban kee namma numuk, kulli num faxxinta maaqo edde baaha'gidih, kaal yeexegen alsat maqidda kaah ruubak yen. Kaa kee kay buxah mara kee kay buxal maaqo ukumma haa marah maaqok faxxa haanam oson keenih baahak yenen. Maaqok faxximma 'tam xayyoosak sugen.

²⁸ Tohuk kalah kaadu, kulli num keenik, gabru deqsitta daro kee darok rade caffak isil tanim, gaari edde beyan faaris kee wohuk kalah tan faroosah maaqoh baahak yenen.

²⁹ Yalli Suleemanah kaxxa kas kee tut xayih radiyya kee loowo sinni ixxiga yecee.

^30-31 Suleeman kulli numuk kasah aysuk yen. Ayrô-mawqat raaqa mara kee Masri mara tekkek, tikki 'ta ummattak inkih kasah aysuk yen. Etan deqsita numuy Qedra deqsita gulubuh yoobokehiyyak kasah aysuk yen. Macol deqsita numih xayloy migaaqah Heeman kee Kalkol kee Dardaq akak axcuk yeneenihiyyak kasah aysuk yen. Woo deraafil enna 'ta baaxooxal kas kee migaq-gexxo le malikik yen.

³² Suleeman sidiica alfi takke missilitte yuktubeh cabeeh, alfik amo takke gaditteeta yuktubeh cabe.

³³ Baaxol enni 'ya coox kee qaysot inkih yaabe. Lubnaan rasul tan kaxxa sariida kee gidaar bagul taabuke qaysot inkih yaabe. Kalah kaadu, alluwwa kee kimbiiriiy, garbah baaxok bagul gexxa alluwwa kee kulluumut yaabeh cabe.

³⁴ Gersi malikway addunyâ-bagul enna 'ta usuk kasah akah yene'nna toobbeeh; too waqdi kaa ankacisu waa mara kaa fan ruuben.