1 Malikwa 3 - NABUWWA KEE MALIKWA

SULEEMAN QAKLI GEYA'GIDIH DOOQA ABE

¹ Suleeman Masri-malikik-baxá rihimih abiteeh, qalla kaa'lih haysite. Yarusalaamal isi qari kee YALLIH Qibaadah-Qari xissa heeh, Yarusalaam magaalat gaso maroh haam fanah, Dawud-Caafat deqsita caafatal tet hee.

² Too dabaanal, YALLIH Qibaadah-Qari xissiimeh manannaay; tonna-leemik ummatta qibaada elle aban aroocay fayyat raqtahiyyal sadgat abak ten.

³ Suleeman YALLA kicinuk yeneeh, isi-abbah-raat kataatak yen. Takkay immay too qibaada elle aban aroocay fayyat raqtahiyyal sadgatah saq qidak yeneh, qaydarus kaadu sadgatah qeerisak yen.

⁴ Sahda kaxxam tassakaxxem, Gibqon magaalal fayya le aracal yen sadgat-araca. Suleeman gexeh, tokkel sadgat abe. Too sadgatih aracal Suleeman saqak alfi takkem cado-akak-carrisan-sadgatah qidak yen.

⁵ Too bar YALLI Suleemanah yumbulleeh, kaak iyyeemih, «Maca koh abam faxxaah, yoo esseritey» iyye.

⁶ Suleeman YALLAK iyyemii, «Yi-abba-Dawuduy ku naqasuh yenehiyyah kaxxa kacanu luk sugteeh; usuk kaadu baguuk kol yaamineeh, cakki-kee qadaalat-le numuk ten. Atu kaah abak sugte maqaane kaak mayseedinnitooy, a saaku kay baxa kay qarkaytol hayte.

⁷ YALLAW, yi Dageltaw, yooy ku-naqasuh-yanihiyya yi abbah aracal hayte. Tonna'mmay anu ahayduma qunxa num kinniyoh, sahda elle xiinisa inna matteexega.

⁸ Anu akah table'nnah, atu doorte maray mangah loowo akak duudume waytahiyyah abba yoo abteh tan.

⁹ Tonna'mmay ku ummatta qadaalatat edde xiinisaah, umam-kee-meqem-edde-baxisa-kas yoh acuyey. Too kas aalle week, a-axxul le ku mara qadlit xiinisam maduuda» iyye.

¹⁰ Suleemanak Yalli too yab kaxxam yossokooteeh;

¹¹ tonna leemiik kaak iyyemii, «Qumri xexxar yoh ucuy yok maxaccitooy, gaddaliino yoh ucuy yok maxaccitooy, naqboytit yoh qid yok maxaccito. Tohuk tu maxaccitoy, missah yan cokmit ummatta-edde-xiinisa-kas yoh ucuy yok inteehiiy;

¹² too atu-faxxem koh aceeyyo. Kas kee bagi-cubbiy sahdayti ahayduma gee weeh, sarra gee wayu-waa koh aceeyyo.

¹³ Kalah kaadu, atu yoo essere waytem koh abeyyo. Addunyal tanim fan kok kalih malik aalle waa gaddaliino kee nabna kot heeyyo.

¹⁴ Toh lih kaadu, ku-abba-Dawud akah abak suge innah, anu-kok-aba-axcem abteeh yi xinto kee yi amri inkih tugdubek, qumri kok ayxeereyyo» 'yaanam kaak iyye.

¹⁵ Suleeman xiinik ugte waqdi, Yalli soonol kaa'lih yaabem yeexegeh. Sarrak Yarusalaam magaala gexeeh, YALLIH Qahdi-addat-akak-yan-Sanduguk foocal sollu 'yeh, cado-akak-carrisan-sadgatah saq qide. Tonnah kaadu, amaanah-xiinaanamih-asta-yakke-sadgat abeeh, kaa'lih taamita marah inkih xigla abe.

SULEEMAN MEQE MEKLAH MEKLE

¹⁶ Ayrok teena xiiqareh-xiinah yan agbi malikil yemeete.

¹⁷ Ken nammayak tiyak teena annah kaak inte. «Amoytaw, yoo kee a barra inki qaril naniih; is yo'lih tan waqdi, anu lab-baxa xale.

¹⁸ Namma ayrok lakal is kaadu lab-baxa xalte. Too waqdi tet kee yok sa, woo qaril num mananna.

¹⁹ Barak teena garciik isi baxak bagul korteeh; woo awkiiy ufuy weeh edde rabe.

²⁰ Too waqdi barat uguttu 'teh anu xiinit an waqdi, yi baxa yi garik beyya hayteh isi qarkaytol hayya hayte. Sarrak rabe awka yi qarkaytoh bagul hayya hayte.

²¹ Maaca awka angu aysaaxe'gidih ugte waqdi, rabeh suge. Kaxxam xayyowwa exceh kaa wagte waqdi, yi baxak masuginna» 'yaanam inte.

²² Nammeyhaytô-barrah tu gactek, annah inte. «Aleeyyah, rabe-awki ku baxaay; nuwwi-awki yi baxa» 'yaanam inte. Naharat yabte barra, «Aleeyyah, rabe-awki ku baxaay; nuwwi-awki yiimi» inte. Tonnal malik foocal titta weenih.

²³ Too waqdi Suleeman iyyemii, «Kulli tiya siinik, ‹Nuwwi-awki yiimiiy, rabe-awki yim hinna› 'yaanam inteenik,

²⁴ wonnal, seef yoh baaha» iyyeeh; woo seef baahen waqdi,

²⁵ «Ama-nuwwi-awka namma'kkel kurra haay tiyahaay garab keenih akak acuya» iyye.

²⁶ Too waqdi nummah inak afqadot baxi kacni culeeh, «Amoytaw, ku maganak, awka maqidinay teetih acuy» inte. Aki barraay, «Nek numuh maacanay kaa qiday namma'kkel neh kur» inte.

²⁷ Tohuk lakal Suleeman annah iyye. «Awka miqidinay naharat yabte barrah acuy; nummah-ina teeti» iyye.

²⁸ Israayil mari Suleeman a namma barrah yab elle kure'nna yoobben waqdi, kaxxam kaa yessekexxen. Kaa akah yessekexxeenim, usuk too ayrook lakal, Yalli sahdâ tittin-way missat edde bicsa kas kaah yeceem yeexegeenimi.