1 Malikwa 22 - NABUWWA KEE MALIKWA

NABI MIIKAYHU ACABAT TAKKU WAYTAAMAT YAABE

¹ Tohuk lakal yan namma sanatah, Israayil kee Suuriyah-marih fanat wagri gace.

² A wagri gaceemih sidochaytô-sanat yuduure waqdi, Yuudâ-malikih-yen-Yacoosafat, Israayil-malikih-yen Acabat yangoorowe'gidih gexe.

³ Acab isi qaskarih abbobtik iyyemii, «Aham fanah Suuriyah-malikih-gabat tan Gilqad-rasul tan Raamot-magaala gacisna'gidih, tuk teena akah abe waynam macaay? Woo magaala ni magaala kinnim mataaxigaana innaa?» iyye.

⁴ Kaadu Acab Yacoosafatak iyyeemih, «Raamot-magaala gaadam faxak, qeebit yo'lih angale mantuu?» iyye. Yacoosafat kaal gacseemih, «Isin bical gacinnaan saaku neh waris, yoo kee yi qaskaraay faarisih agantah siinik maraqnak.

⁵ Takkay immay wohuk naharal YALLAL fayu essernam nel tan» iyye.

⁶ Sarrakaa, Acab affara bool takke nabuwwah seeco abeeh; too nabuwwa temeete waqdi ken essereh, iyyeemih, «Raamot magaala nabbixe'gidih gaadu'nna, raaqooh?» iyye. Oson too waqdi, «Gexay gaad; YALLI nasri koh aceelek» kaak iyyen.

⁷ Yacoosafat iyyeemih, «Ahak kalah YALLIH nabiy YALLI aba iyyam neh warisa mayanaa?» iyye.

⁸ Acab iyyeemih, «Inki numuy Yimla-Miikayhu deqsitahiyya yani'mmay, usuk kulli way umam akke waytek meqem yoh mayablaay, tonna-leemik kaat mayyu» iyye. Yacoosafat, «Wonnah maxcin, iyyaanam hinnak» kaak iyye.

⁹ Too waqdi Acab malik buxat taamitak yen qaskariitah secca 'yeh, «Gexay Miikayhu sissikuk ni fanah bah» kaak iyye.

¹⁰ A namma malikii Samaariyah magaalah-gasok-afal, darok caffa elle baxsan aracalaa malik edde gaca sartanay ibak xibqi gufahiyya yeneeh; malik elle daffeya namma korsil elle daffeyan ikkel, a nabuwwa foocal keenik gacca 'teh; sarra takku waytaamat yaabak sugen.

¹¹ Woo nabuwwak numuk teeni, Kanaqná-Xidkiya deqsita nabik ten. Too nabi, birtak-bicse gaysoosi luk yen. Iyyeemih, «YALLI ‹A gaysoosit Suuriyah marat qeebi abettoh inkitanuuk ken baysetto› kok iyya» kaak iyye.

¹² Raqqa 'te nabuwway wokkel sugga 'tehiyya usuk iyyem inteeh, «Gexay Raamot magaalat qeebi ab, aysettok. YALLI nasri koh aceele» iyyen.

¹³ Oson tohut yanin waqdi, Miikayhu baaha'gidih gexe qaskar-abbah-yen-num kaa geeh kaak iyyeemih, «Nabuwwa inkih malikih meqem tubleh tani'mmayii, atu kaadu oson yubleenim tableemi» kaak iyye.

¹⁴ Miikayhu kaal gacsemii, «YALLAY Waarahiyyah migaaqal xiibitah ani'mmay, YALLI yok inxica iyyeemik kalihim kaak maxca» iyye.

¹⁵ Sarrak malik-Acab fan yemeete waqdi, Malik-Acab kaak iyyemii, «Miikayhuw, yoo kee Malik-Yacoosafat Raamot-magaalat qeebi abna'gidih gaadnu innaa, magaadnuuh?» kaak iyye. Miikayhu iyyeemih, «Gexay ken gaada. Keenik aysettoonuuh; YALLI nasri siinih aceele» kaak iyye.

¹⁶ Acab essero kaat qagseeh, «YALLI iyyeemit yo'lih yabta waqdi, ‹Nummat yo'lih yab› kok exceh mananniyoo? Nummat macah yo'lih yaabe wayta?» kaak iyye.

¹⁷ Miikayhu too waqdi kaak iyyeemih, «Israayil qaskaray loyna sinni illi innah fixixih tanihiyya ableh an» iyye. Qagissa heeh, «YALLI ‹A mari is miraacisa abba leh mayanak, isinni buxaaxih gexxaasitoonay inxic» 'yaanam axcuk oobbe» iyye.

¹⁸ Too waqdi Malik-Acab Yacoosafatak iyyeemih, « ‹A nabi yoh umaamak sah meqem mayabla› 'yaanam kok maxacciyoo?» kaak iyye.

¹⁹ Miikayhu qagseh iyyeemih, «Taway YALLI iyyem siinih warisu waa. Anu YALLA qaraanal isi amoytiinih korsih bagul daffeyah uble. Kay malaykoota inkih migda kee gurak kaa maraasiyot kaa abbaxih ubleh eneeh;

²⁰ too waqdi isi malaykootak, ‹Acab, Raamot-magaala gexxa 'yeh wokkel akah raba innah kaa ayrissu duddam iyyaay?› iyye. Too waqdi malaykootak mariiy tu iyye.

²¹ Sarrak roocaaniyya fanaak amma 'teh YALLAL xayyowteeh, ‹Anu kaa ayriseyyo› 'yaanam inte.

²² YALLI, ‹Mannal abettooh?› iyye waqdi, ‹Gexxa exceh Acab nabuwwa diraabat yaabiseyyo› 'yaanam inte. YALLI too waqdi, ‹Gexay, kaa ayris, ku gabal bicelek› 'yaanam axcih uble» kaak iyye.

²³ Miikayhu ellecabol yaabak af edde cabemii, «Taway tekkem tamaha. Ku nabuwwa diraabat yaabiseh; koh tu gactek, YALLI kol oobisu waa bala kol yuckumeh» kaak iyye.

²⁴ Tah yoobbe waqdi, Xidkiya deqsita nabi garih amma 'yeh xaban kaak yootokeeh, «YALLIH Roocaaniyya yoo cabteeh kot gactem maa saaku?» kaak iyye.

²⁵ Miikayhu kaal gacseemih, «Qarik darrê golit sasoh cultu wayta saaku, wohim aaxigetto» kaak iyye.

²⁶ Tohuk lakal Malik Acab isi qaskarih abbak iyyemii, «Miikayhu uxuyay magaalâ-xintoh abbah-yan-Amon kee malik-baxa-Yooqas fan kaa bey.

²⁷ Keenik intamaa, ‹Malikii, «Amaanah uduurra axcem fanah tama num casbit sugusaay dago maaqo kee leek biso kaah maacina» siinik iyye› keenik inxic» iyye.

²⁸ Too waqdi Miikayhu iyyemii, «Atu amaanah uduurra 'tek, YALLI yo'lih yaabe kaa hinna» iyye. Qagseh kaadu iyyemii, «Ummatey, anu axcem oobbeyay yok raaqa» iyye.

ACAB RAAMOT MAGAALAL RABE

²⁹ Tohuk lakal Malik-Acabay Israayil malikih yenehiyya kee Malik-Yacoosafatay Yuudâ-malikih yenehiyya Gilqad rasul ten Raamot-magaalah gaaduh gexen.

³⁰ Acab, Yacoosafatak iyyemii, «Carbi booxa fan genxa waqdi, anu a sarak katta exceh aki sarat gacca exceh aki num ceeleyyo'mmay, atu malik sartanak makatinay edde idiy» kaak iyye. Tonnal Israayil-malik kaa elle aaxige waan sartanat gacca 'yeh qeebit cule.

³¹ Qeebi rade waqdi Suuriyah malik, faras-gaarih-abbobtiy soddom kee nammay tekkehiyyah amri yeceeh iyyemii, «Gexay dibuk Israayil-malik ibbixa; kaak kalih marat qeebi maabina» iyye.

³² Oson Malik Yacoosafat yublen waqdi, yakkeenimiik inkih Israayil-malik kaa yekkeleeniih; too waqdi kaa yabbaxoonuh kaa fan yenkeleeleben. Takkay immay usuk xongolo abe waqdi,

³³ oson Israayil-malik hinnam kaak yubleenih, too waqdi qeebik kaak yeedeenih.

³⁴ Sarrak, garciik Suuriyah-qaskariiti ruubeh yan gaysê-baxi, Acab, fillat-xagar-dacayrih-leh-yan-birtak addak kaa mude. Too waqdi Acab faras-gaari beyak suge numuk, «Mudduumeh! Gaari eykeleelebay nee gacis» iyye.

³⁵ Carbi laqak laqeeh; takkay immay Acab kay gaarih addal rekuh kaa heenih Suuriyah qaskar fan afkanuk raaqe. Akak mudduume aracak kaak oobah yan qabal gaarî-guba kibba hee. Bari yekke waqdi rooci kaak yewqe.

³⁶ Ayro cultam faxxa waqdi, Israayil qaskarih abbobti amri tecee. Iyyeenimihii, «Kulli num isi baaxo kee isi magaala siinik yaduuray» 'yaanam iyyen.

³⁷ Malik-Acab tonnal rabeeh; raysa kaak Samaariyah magaala fan been. Tokkel kaa yoogoqen.

³⁸ Usuk edde suge faras-gaari Samaariyal yan dorih leet kaqlisen. YALLI akah inxicci 'ye innal, xiiqareh xiina too leey kay qabala edde kaqliseenihiyyat kaqalteeh; kuuta kaadu kay qabal muxuqte.

³⁹ Wohuk kalah taniimiy Acab abba heehiyya inkih, kay qariy dakani-qaagak bilqiseeni kee usuk xissa hee magaaloolih aydaad inkih, Israayil-Malikwah-Aydaada deqsita kitaabal yunkuttube.

⁴⁰ Usuk rabe saaku kay aracal kay baxi Acadya gace.

YACOOSAFAT, YUUDÂ-BAAXOL DARDAARE

⁴¹ Israayil-malikih yen Acab dardaareemih affara sanat tikka 'ye saaku, Aasa-baxi-Yacoosafat, Yuudâ-malik yekke.

⁴² Qumrik soddom kee koona liggidat yeneeh; labaatanna kee koona sanat abbootan luk suge. Kay ina Qaduuba deqsitta barrak teneeh; Silci deqsita numih baxák ten.

⁴³ Kay abba Aasak kaxxih YALLIH garil cakkik tan taamah taamitak yen. Tonna'mmay diini-maleela elle taqbude arooca kay dabaanal baateh mananna. Ummatta tokkel sadgat abaanam kee qerto ruubaanam cabteh mananna.

⁴⁴ Yacoosafat Israayil-malik lih bica haysiteh yen.

⁴⁵ Wohuk kalah taniimiy Yacoosafat abba heehiyyaay kay agiirinna kee kay carbih abitto inkih Yuudâ-Malikwah-Aydaada deqsita kitaabal geytinta.

⁴⁶ Lab xiiqareh-xiinay Yalla-maleelah yen mari qibaada elle abak suge aroocal sugtehiyya inkih xiiriyeh. Kay abba Aasa, isi dabaanal woo mara inkih maxiiriyinna.

⁴⁷ Edom-rasi malik luk mananna. Edom akah xiinak yenem Yuudâ-malik doore kay afak yen numih xintok ten.

⁴⁸ Malik-Yacoosafat kaxxa badal gexa maraakib Oofir rasul dahab goranah gexa'gidih bicse. Takkay immay woo maraakib wokkel elle, Qexyon-Gabar deqsita aracal finqiteeh gexak maraaqinna.

⁴⁹ Yacoosafat maraakib bicisak suge waqdi, Israayil-malikih yen Malik-Acadya, kaak, «Yi mari ku mara lih maraakibit gexay inxic» 'yaanam kaak iyye. Yacoosafat toh kaak cineh.

⁵⁰ Yacoosafatal amri yemeeteh, Dawud-Magaalah malik-buxah-mara edde yoogoqen *kabrit kaa yoogoqen. Tohuk lakal kay baxi Yahooram kay lakal kay arac ciggiile.

ACADYA ISRAAYIL MALIK YEKKE

⁵¹ Yuudâ-malikih yen Yacoosafat reedeemih taban kee malcina karma tekke saaku, Acab-baxi-Acadya Israayil-malik yekke. Usuk Samaariyah-magaalal Israayil-rasu namma sanat xiinisak suge.

⁵² Usuk isi abba Acab kee isi ina Idebal kee, tonnah kaadu, Israayil-malikih yen Nabát-Yarobqamay Israayil mara dambi le abittot asisak sugehiyyah raatat gexeeh, YALLAL dambi lem baahe.

⁵³ Usuk isi abbak kaxxih, Yallih aftok gabak bicsen ceeloy Baqal deqsita yuqbude. Tonna-leemik YALLAY Israayil doore Dagelta kinnihiyyat bagcarra ugse.