1 Malikwa 21 - NABUWWA KEE MALIKWA

MALIK-ACAB, NABOT DEQSITA NUM ELLE QIDE'NNA

¹ Yidraqel magaalah addal, Malik-Acab buxah garil, qinab-coox elle yaysubuken arac le numuy migaaqah Nabot deqsitahiyya yen.

² Ayrok teena Acab, Nabotuk annah iyye, «Ama atu lito qinab elle yaysubuken booxa yi buxah garit tanik, yoh teceemi. Saalot haan duyye elle aysubukem faxaah; tet aftok ahak tayse booxay qinab xala coox elle taysubuke koh aceeyyo, hinnay kaadu, faxxek, celta limoh kok xaamiteyyo» kaak iyye.

³ Nabot kaak iyyemii, «A aracay inni kaxxa abbobtik nagrehiyya koh aceemik, YALLI yoo catay» kaak iyye.

⁴ Acab too waqdi Nabot kaak iyyeemih naqabu kee danni luk buxa fan gexe. Gidaarat foocah gacca 'yeh qarkaytok bagul qaxah gace. Maaqo kaah baahen waqdi, wonnah yufkuneeh maaqo akme cineh.

⁵ Sarrak kay barra Idebal arac kaal culteh, kaak intemii, «A gide macah dannittaah maaqo macah cintaah?» kaak inte.

⁶ Usuk teetik iyyemii, «Nabotuk, ‹Qinab caxah booxa kok xaamu waah; faxxek kaadu tet aftok gersi arac koh acayu waa› exceeh; yok cineeh; maaqo akah cinam tohih sabbata» iyye.

⁷ Idebal too waqdi annah kaak inte, «Meqehik, atu malik kinnitoo hinnito? Katay, qarkaytok ugutay, mawariggitinay maaqo ukum. Nabotuk qinab-booxa anu koh ayyaaqeyyok, ama ikkek ugut» axcuk aytikuma kaah tecee.

⁸ Sarrak warkat tuktubeeh; woo warkatal kay migaaqal is firmat hayte. Sarrak kaadu kay yab elle hayya hayteh, qaskar abbobti kee Yidraqel rasih makaabonuh rubte.

⁹ Woo warkatal tenemii, «Naharak soom edde abtaana'gidih ayro haysita. Too ayro sahdah inkih seecaay, Nabot kaxxa aracal haa.

¹⁰ Baabuurute marak nammay bahha haay, kay foocal daffessa ken haay, ‹Nabot, Yalla-kee malik xaafe axcuk kaal wada› inxica. Too waqdi magaalak afah kaa eyyeeqay xeetit kaa qida» 'yaanam elle hayte warkat rubte.

¹¹ Qaskar abbobti kee Yidraqel rasih makaabon Idebal keenik aba iyyem abeenih.

¹² Soom edde aboonu waan ayro heen; ummattah inkih seecen. Nabot kaxxa aracal heen.

¹³ Too waqdi woo baabuurute namma num amma 'teh sahda foocal, «Nabot Yalla kee malik abaare» axcuk kaal waden. Sarrak magaalak afah kaa beyya heenih, xeetit kaa qiden.

¹⁴ Too waqdi Nabot rabeemih farmo Idebalah ruuben.

¹⁵ Idebal a farmo akah toobbe'nnaak, Acabak annah inte. «Nabot rabek, away gexay woo kol aylamme cine qinab-booxa bet» kaak inte.

¹⁶ Acab too waqdi sissikuk woo qinab-cooxih-booxa isih haysita'gidih gexe.

YALLI, ACAB ABEM YESSECEKKE

¹⁷ Sarrak YALLI nabi-Eliyyasak annah iyye.

¹⁸ «Samaariyah malikih yan Acab fan gex. Usuk Nabot-qinabih-booxa isih haysita'gidih wokkel koh sugele.

¹⁹ Too waqdi yooy YALLAH yani annah kaak axcem kaah waris. ‹Atu num qiddeh, kay midir isih haysitteh. Hununuh kuuta Nabot qabala elle muxuuqak sugte aracal, ku qabala kaadu muxuuqele› kaak inxic» iyye.

²⁰ Acab, Eliyyas yuble waqdi, «Yi naqboytaw, yoo matarte!» kaak iyye. Eliyyas too waqdi kaal gacsemii, «Koo matreh anih; atu inkitanuuk YALLI niqbaamat asa num tekke.

²¹ Tohuk gexxaamah YALLI kok iyyemii, ‹Bala kol ruubeyyo. Koo qideyyo; kok radda labhak baacoytit takkuu, gaddaloola takku, inkih ken bayseyyo.

²² Ku buxah marat, Nabat-baxa-Yarobqamay Israayil-malikih yenehiyya kee, Aciiyâ-baxa-Baqsay kaadu Israayil-malikih yenehiyyah buxah marat tekkeemih innah tanim keenit akkele. YALLI woh akah kok iyyamaa, Israayil mara dambit asisseeh naqabu yot culusseemih sabbatah kok axce› iyyah yan» kaak iyye.

²³ «Idebal tiyah tu gactekiiy, YALLI kaadu iyyaamah, ‹Yidraqel magaalah addal raysa teetik kuuta akmele.

²⁴ Ku buxah marak magaalah addal rabinnaan numih raysa kuuta akmeleeh, barrih raqta baaxol rabinnaan numih raysa guma akmele› 'yaanam kok iyyah yan» kaak iyye.

²⁵ YALLIH garil, ahayduma Acab gide YALLI niqbaamat ase num mananna. Tohut inkih kaa asissem, nikaacat luk yen kay barrak ten. Tet migaq Idebalak ten.

²⁶ YALLI Israayil-marih-foocal baaxok keenih yeyyeeqeh yen Amoorah marak kaxxih, Acab, Yallih aftok xeet kee cooxuk sahda bicisse duyyeh qibaadat gaceeh; toh kaxxam qaybik taniimik ten.

²⁷ Eliyyas yaabak gaba kale waqdi, Acab sara isik qanxiseh baaxot qideeh, sartanah *qabuddat gace. Maaqo cineeh xiinih qabuddal gace. Tohuk wadir fooci kaak dattowwa 'yeh cisabbootak gexe.

²⁸ Tohuk lakal YALLIH qangara Eliyyasal obteeh; YALLI kaak iyyeemih,

²⁹ «Acab yoh elle rammita inna tubleh innaa? Yoh rammiteemih sabbatah, addunya bagul yanim fanah bala kaal moobisa. Takkay immay kay baxih waktil bala kay buxah maral oobiseyyo» iyye.