1 Malikwa 20 - NABUWWA KEE MALIKWA

BANIHADAD SAMAARIYA GAADE

¹ Suuriyah-malik-Banihadad, qaskarak elli haam gaabossa heeh; soddom kee nammay takke baaxoh abbobtiy faaris kee gaariira lehiyya catoh haysitta heeh gexe. Samaariyah magaala gufe waqdi maro teetit heeh qeebi teetit abe.

² Too waqdi Israayil-malikih yen malik-Acabay woo magaalal yenehiyyah farmo ruubeeh iyyemii,

³ «Malik-Banihadad gaba taceemiiy, ama tabbixe lakqooy dahab yoh rub. Kok qax-maqaane le agabu kee xaylok kaadu yim akkele, kok iyyah» 'yaanam farmoh kaah ruube.

⁴ Malik Acab tohul kaal gacsemii, «Yi-amoyta-Malik-Banihadadak, ‹Atu intam meqeeh; eelli haam inkih kuumuuy; koh aceeyyo› kaak inxica» 'yaanam kaah ruube.

⁵ Sarrak kaadu farmô-mari Malik-Banihadadak Malik-Acabah gersi farmo baahen. Iyyeenimii, «Ama lito lakqo kee dahabaay, agabu kee xaylo yoh rub 'yaanam kok exceh suge.

⁶ Awayah tu gactek, woh lih kaadu, ku qari kee ku doolat-abbobtih-qarwah addat suginnaan duyyek aysinnaanim beytu wayta yi qaskarih abbobti ruubeyyo. Oson beera ta waqla sin fan amaatelon» 'yaanam farmoh kaah ruube.

⁷ Malik-Acab too waqdi baaxoh-abbobtih inkih kaayya 'yeh keenik iyyemii, «A num nee bayisam faxam tableenii! ‹Ku agabu kee ku xaylooy lito lakqo kee dahab inkih yoh rub› 'yaanamih farmo yoh ruubeeh; woh kaah oggoleh suge» iyye.

⁸ Too waqdi ummatta inkih, «Kay yaabah ayti maacanaay, usuk iyyem moggolin» kaak iyyen.

⁹ Usuk too waqdi woo maral farmo kaah gacseeh iyyemii, «Yi amoytak intaanamaa, ‹Naharak yoo essertem kok oggoleh immay, nammeyhaak yoo essertem kok cineh› kaak inxica» iyye. Farmô-mari Banihadad fan farmo luk yuduure.

¹⁰ Sarrak Banihadad wadirih woo marat gersi farmo ruube. Iyyemii, «Ama elle tan ku magaala bayisu waa mara koh ruubeyyo. Riirak gabat beyaanam tu maraqta. Tah abe wayya heek, yallitte yoo bayissay» iyye.

¹¹ Too waqdi malik-Acab farmo baahe maral gacsemii, «Nummâ-qaskariiti tirtira qeebik naharat maabay, qeebi lakal aba» kaak iyye.

¹² Banihadad kee woo catoh kaah yemeeteh suge baaxoh abbobtih yen mari inkih, malik lih sirooqah addat maqabat yanin waqdi, farmô-mari Acab ruube farmo kaah warsen. Too waqdi Banihadad isi marak «Ugutay magaalâ-qeebih bical gaca» iyye. Too mari too waqdi ugteeh; qeebih bical gacen.

ACAB, BANIHADADAK YEYSEH

¹³ Oson tohut yanin waqdi, malik-Acabal nabi yemeeteeh kaak iyyemii, «YALLI, ‹Ama kaxxa qaskar tablee! A saaku tama qaskarak koo aysiiseyyooh; too waqdi YALLA kinniyom yok aaxigetto› kok iyyah yan» kaak iyye.

¹⁴ Acab too waqdi, «Qeebi foocat iyyi gacele?» iyye. Nabi kaak iyyemii, «YALLI kok iyyamaa, ‹Rakaakay-abbobtih amrih gubat ten furraynah-ten-qaskar qeebi miraacisele› kok iyyah yan» kaak iyye. Malik Acab, «Qeebi qimbisaanamih amri tacayu waytam iyyaay?» iyye. Nabi, «Atu aceetto» iyye.

¹⁵ Too waqdi malik-Acab, woo rakaakayitteh-abbobtih amrih gubat ten furraynah ten qaskaray mangah namma bool kee soddom kee nammay akkuk tenehiyyah seeco abe. Sarrak inkih tan Israayilik malcina alfi qaskariitah seeco abe.

¹⁶ Acab kee kay macaxu carra qeebih temeete waqdi, Banihadad kee kay catoh temeete soddom kee nammay takke baaxoh abbobti isi sirooqah addat tiskireh keenih sugte.

¹⁷ Too waqdi woo furraynah tan qaskar foocah bisoh gexxe. Banihadad wagittoh ruube mari Banihadadak,

¹⁸ «Butta takke qaskar Samaariyah-magaalak temeeteh tan» iyyen. Too waqdi Banihadad iyyemii, «Qeebih amaate kee, hinnay kaadu, wagarih amaate yakkeeni'mmay, woh tu malik, gexay ibbixay ken baaha» iyye.

¹⁹ Woo furraynah tan qaskar qeebi foocat gacteh miraacisseeh; gersi qaskar ken katatte.

²⁰ Furraynah ten qaskarak kulli numuuy isih lih yoome num qide. Sarrak Suuriyah-mari kudeh, Israayil-qaskar lakak ken yeyreddeeniih; Banihadad too waqdi farasat koreh yisillime. Faariisah amot yan gersi mari kaadu kaa lih gexe.

²¹ Takkay immay Malik-Acab raaqe-marat qeebi abeeh, faaris kee gaariira keenik bukkuseh. Suuriyah-marat kaxxa baati abe.

²² Tohuk lakal nabi, malik-Acabal gexeeh kaak iyyemii, «Gexay uduuray qaskar nagay ugusaay, abinnaan mala cubbil aba. Woh akah axcem, yamaate sanat sugumuh addat Malik-Banihadad nammeyhaak qeebi siinit aba'gidih amaatele» iyye.

²³ Malik-Banihadadak qaskar-abbobti intemii, «Israayil-marih-yallitte, qaleelâ-yallitte kinniimih sabbatah, qeebil nek yeyseenih. Takkay immay booxak-bagul qeebi keenit abnek, keenik aysenno.

²⁴ Taway woo soddom kee nammay takke abbobti abbootanak kalay; ken aracal qeebi amrissa abbobti hay.

²⁵ Sarrak woo duma luk sugte qaskarih gide mangah takke qaskarah seeco ab. Faariisa kee gaariirak kaadu too gide gaabos. Tonnal qeebi booxak-bagul keenit abennooh, ta saaku keenik aysenno» iyyen. Malik Banihadad toh oggoleeh, oson kaak iyyeenim abe.

²⁶ Dabaybah addat Malik-Banihadad isi marah seeceeh; Israayilit qeebi aba'gidih, Afeek-magaala fan gabat ken luk gexe.

²⁷ Israayil marah kaadu seeco tekkeh; elle yemeeten ikkel faxxintam keenih aben. Tohuk lakal gaaduh ugutta iyyeeniih ken fanah xayyoowen waqdi, namma ikkeh baxsimma 'yeenih Suuriyah-mara akak yablen ikkel yinfiddigen. Suuriyah-mari baaxo inkih duudeh yeneeh; Israayil-mari ken garil dagnah namma-horta-takke-wadar-baxa ceelak yenen.

²⁸ Malik-Acab fan nabi yemeeteeh kaak iyyemii, «YALLI iyyaamahaa, ‹Suuriyah-mari yok, qaleelâ-Yalla ikkal booxâ-bagih-Yalla hinna iyyeenimih; tonna-leemiik ken qaskaray kaxxam mangohiyyak qeebil sin aysiiseyyo. Too waqdi koo kee ku marak YALLI yoo kinnim aaxigettoonu› siinik iyyah yan» kaak iyye.

²⁹ Israayil-mara kee Suuriyah-mari malcina ayroh gide elle yinfiddigen aracak mari mara keenik wagitak suge. Malcinhaytoh ayro qeebi radeeh; too qeebit too ayro dibuk Israayil-mari Suuriyah-marak bool alfih num qiden.

³⁰ Wohuk raaqe mari Afeek-magaala fan kudeeh; tokkel labaatanna kee malcina alfih qaskariital, magaalat maroh sugte gaso raddeeh edde raben. Banihadad kaadu woo magaala fan kudeeh qarik darrê golit yombooqore.

³¹ Too waqdi kay qaskarih-abbobti kaal gexxeh kaak intemii, «Israayil-mari-le-malikwa racmatta le 'yaanam noobbeh nanik, *qabuudu axcal ninnik uxuyyaay akoota ninnik fillat uxuyya hayneh, Israayil-malikil genxa'gidih idni neh ucuy; tonnal koo qide waam takkehik» kaak iyyen.

³² Too akah iyyen innah, qabuudu axcat uxuyyaay fillat akoota isinnik hayya heenih, malik-Acab fan gexeeniih kaak iyyeenimii, «Ku-naqsi-Banihadad koo kallacah yaniih, ‹Ahaysa anay yoo 'xicay yoo maqidin› 'yaanam kok iyyah yan» kaak iyyen. Malik Acab, «Usuk uxih yanii? Usuk yi toobokoyta» keenik iyye.

³³ Banihadad-qaskarih-abbobti meqe qangara Acab afak raddam wagitak sugeeniih, usuk toh inxicca 'ye waqdi, ta qangara kaak yossokooteeniih, «Nummah ku toobokoyta kinnih» iyyen. Sarrak Acab, «Gexay yol kaa baahay» keenik iyye. Banihadad yemeete waqdi, is lih faras gaaril kaa hee.

³⁴ Too waqdi Banihadad malik-Acabak annah iyye, «Yi abba ku abbak bee magaalooli inkih koh gacseyyo. Yi abba Samaariyal akah abe innah, atu kaadu Damaskoh magaalal tellemmo elle abta arac heetto» kaak iyye. Acab too waqdi iyyemii, «Tah abtek currih koo ruubeyyo» kaak iyyeeh bica kaa'lih abba heeh kaa ruube.

NABI, ACAB QAYBISE

³⁵ YALLIH amrih, butta-takke-nabuwwah-addak, nabi amma iyyeeh isi innah yan nabik, «Yoo utuk» iyye. Woo nabi woh kaak cineh.

³⁶ Too waqdi yab akak cinen nabi, «YALLIH yab cinteemih sabbatah, yok gexxu wayta waqdi, lubak koo qidele» kaak iyye. Sarrak gexe waqdi, usuk akah iyye innah, lubak yemeeteeh kaa qideh.

³⁷ Too nabi kaadu gersi numul yemeeteeh, «Yoo utuk» kaak iyye. Too numuuy kaa yootokeh. Kaxxa atka kaat abeh kaa biyaakeh.

³⁸ Woo nabi too waqdi fooca edde qellisa'gidih, foocat saro isik makka heeh gexe. Israayil-malik tatram fanah usuk akak tabu waa gitih afal gace.

³⁹ Sarrak malik woo gitak tabam yuble waqdi, a nabi anay fayya haak, kaak iyyemii, «Amoytaw, anu qeebi addat suge waqdi, qaskariiti qeebit yibbixen num yol baaheeh, yok iyyemii, ‹Tama num digga hay; faxe innalaay takkay kok yuftuce kaa tekkek, isi rooci edde aceetto. Woh akke waytek, lakqok sidooca alfi mekletto› yok iyye.

⁴⁰ Takkay immay anu innih gersi taamat agxitak sugeeh, woo num yok kudeh» iyye. Too waqdi malik kaak iyyemii, «Atu kol heen digaalat isi afak yabtah tanik, too digaalah heenim mekeltaamaksah!» kaak iyye.

⁴¹ Nabi saro foocak isik kale waqdi, malik nabuwwak numuk teena kinnim kaak yeexegeh.

⁴² Sarrak woo nabi kaak iyyemii, «YALLI kok iyyamaa, ‹Atuu, anu raba akak faxa num yasillimay inteeh; tonna-leemik kay roocit isi rooci meklah aceettooh; kay marih roocit ku marih rooci meklele› kok iyyah yan» kaak iyye.

⁴³ Too waqdi malik Samaariyah magaala fan cer kee naqabut gexe.