1 Malikwa 2 - NABUWWA KEE MALIKWA

DAWUD ABE FARRINTO

¹ Dawudut rabi xayyoowe waqdi, Suleemanah secca 'yeeh, fayu kaah yecee. Dawud Suleemanak annah iyye,

² «Anu ahaysa diikô-num akku waah aniih, tonna'mmay, atu abinnaanimil digga le num tikay, labhaytu tik.

³ YALLAY ku Dagelta kinnihiyya ab kok axcinnaanim abay, kay gitat gex. Muusal oobe kitaabal tan Yallih xinto kee madqaay, kay baritto kee kay amri inkih duudus. Tonnal abinnaanim gabal kok amqeleeh, elle gexinnaan ikkel abinnaanim gabal kok bicele.

⁴ YALLI yok iyyeemih, ‹Ku ramad anu aba axcem baguuk agaagul sinnim abeenik, Israayil amoytit ken abeyyoomuh qahdi koh cula› 'yaanam yok iyyeh yan. Tonna kinnuk atu kay amri oggoltek, YALLI too qahdi koh duudusele» kaak iyye.

⁵ «Tohuk kalah koh warsam liyo» kaak iyye. «Toh macaay intek, duma Yowab yol baahem taaxigeh. Israayil qaskarih abbobtik namma num qidem kassa koo. Nér-Abner kee Yetér-Qamasa qiddem kaa. Qeebi addat ken maqidinnaay, baaxo wagarih tan saaku, loowitiik ken qidem atu isih kassittah. Tu baahe wee mara annaak qide. Usuk abe umaane kay fillal raqtaah akah biyaakitam kaal tan» iyye.

⁶ «Kaak abtam ahaysa isih taaxige. Amrih rabam kaah maqambaalin.

⁷ «Gilqad rasul yooboke Bardillayah xayloh emeqaay amo keenik wagit. Woh akah kok axcem, ku toobokoyta Absalaamak kude saaku yoh yemqeenih yenen.

⁸ «Gerá-Simqi deqsita numuy, Benyam kedoh yoobokeeh Bacurim magaalal yoobokehiyya yol baahem mahawweenin. Too num anu Macanaayim deqsita arac fan kudak suge waqdi, kaxxa abaaro yot abe. Takkay immay sarrak Ordon weeqaytih garil nongoorowe saaku, kaa qide waamah YALLIH migaaqal kaah xiibite.

⁹ Tahak wadir too num meqe num makkalin. Kasah igintom mantu immay kaak abtam isih taaxige. Amok qabal tif kaak axcuk kabri akah cula'nnah kaak ab» 'yaanam farrintoh kaak iyye.

DAWUD RABEH

¹⁰ Sarrak Dawud amrih rabeeh, Yarusalaamal geytimta Dawud-Magaalal yaaxigen caafatal kaa yoogoqen.

¹¹ Malik Dawud malcina sanat Cebroonul malikih sugeeh, aki soddom kee sidooca sanat Yarusalaamal malikih suge. Sittat morootom sanatih gide Israayil marak malikih suge.

¹² Suleeman, abba lakal malik yekkeeh; dardaarinni kaak kaxxa maqar baahe.

QADOONA RABEH

¹³ Ayrok teena Qadoona Batsabaq fan yemeete. Batsabaq, Suleeman inak ten. Batsabaq Qadoona teetil yemeetem tuble waqdi, «Akah temeetem nagayna?» kaak inte. Qadoona, «Nagayna» iyye.

¹⁴ «Nagayna immay, kok axcem faxam liyo» teetik iyye. «Maca yok intam faxxa?» kaak inte.

¹⁵ «Akah taaxige innah, yi abbah arac ciggiltaah malik takkem yook teneeh; inkih tan Israayil ummat malikih loowitak sugtem yook ten. Tohim makkinnaay, yi toobokoyti malik yekke. Tohim kaadu YALLAK yemeete amrih tekkeemi.

¹⁶ Toh too tiyaay; awayah tu gactek, koo esseram faxam liyo'mmay, ku maganak yok macinin» teetik iyye. Batsabaq, «Yaabit maca lek?» kaak inte.

¹⁷ «Ku maganak, Suunem baahen Abiisag deqsitta baxuwwa rihimih faxah anik, Malik Suleeman lih atu yabtek, kok macinak, ‹Too awká kaah ab› yoh inxic» teetik iyye.

¹⁸ «Meqeh! Malik lih koh yaabeyyo» kaak inte.

¹⁹ Sarrak Batsabaq malik lih Qadoona qaadat yabta'gidih gexxe. Malik isi ina temeete waqdi, elle suge aracak salaamatta teetih aba'gidih ugutta 'yeeh, massakaxxah qununna teetih iyye. Sarrak isi dardaarinnih korsih yuduure. Teetih kaadu elle daffeyta dardaarinni-korsi bahsiiseh kaak migda le kabul heen. Is too korsil daffeyte.

²⁰ Tohuk lakal kaak intemii, «Dago caagid-baxa kot faxa'mmay, ku maganah, yok macinin» kaak inte. Suleeman, «Yi inay, kok aabbu waak, intam faxxam inxicey» teetik iyye.

²¹ «Ku saqalah yan Qadoona, Abiisag rihimih abtam faxak, kaah acuy» kaak inte.

²² «Yi-inay, ah macah yok intaa? Tonnal a dardaarinna kaadu edde kaah ucuya yok intam tayse. Usuk yok saqalah yaniih, sek Abiyataar kee Yowab kay qaxa tanim mataaxiga?» teetik iyye.

²³ Sarrak Suleeman YALLIH migaaqal xiibiteh, iyyeemih, «Qadoona, taham essereemih rabi digaala kaat abe wayya heek, Yalli yot cabe waay!

²⁴ YALLI yi abbah aracal yoo hayya heeh digga yot hee. Qahdi akah culem duuduseeh, abbootan yoo kee yi ramadah yecee. YALLAY waarahiyyah migaaqal xiibita: Qadoonal, ta saakut edde, rabâ-cokmi kaal abeyyo» iyye.

²⁵ Tohuk gexxaamah Malik Suleeman Banaayak, «Qadoona qid» 'yaanam iyyeeh; too num gexeh kaa qide.

ABIYATAAR ARACAK OOBISE

²⁶ Tohuk wadir Suleeman sek Abiyataarak iyyeemih, «Ahaysa Qanatotul geytinta isi buxah gex! Rabi kol amaatuk yene'mmay, yi abba lih ten saaku, gibdaabina kaa'lih tubleeh, YALLAY mulki lehiyyah Qahdih Sandug akkaquk sugte. Tohih sabbatah away koo maqida» kaak iyye.

²⁷ Tohuk wadir YALLAH abak yen seekâ-taamak kaa kaleh. Toh abe waqdi, YALLI, Sek-Qeli kee kay ramadat akkele iyyem nummak maacisse.

YOWAB RABEH

²⁸ Yowab tekkem yoobbeh. Duma Absalaam hinna'mmay, Qadoonâ-qaxa gaceh suge. Too waqdi Yallih Nabnah-Siraq fan gexeeh, tokkel sadgat elle aban aracak gaysoosi gabah xabba hee.

²⁹ Malik Suleeman, «Yowab kudeeh, YALLIH Nabnah Siraqih addal yan sadgat elle aban aracak xaqut yani» 'yaanam yoobbe waqdi, Banaaya ruubeeh, «Kaa qida» iyye.

³⁰ Banaaya Yallih Nabnah-Siraq fan gexeeh, Yowabak, «Malik eweq kok iyyah yan» iyye. Yowab, «Akkel elle rabeyyo ikkal mawqa» iyye. Banaaya wadir yuduureeh, Yowab kaak iyyem malikih warse.

³¹ Suleeman, «Wohoysa usuk faxam kaah ab. Qidda kaa haay elle kaa uguqay cab; usuk abem yoo kee yi abbah ramadih fillal maraqtak. Tu baahe wee mara annaak qide.

³² Yi abba aaxige'kal, kaak yeyse maray tu baahe weehiyya qide. Tohuh YALLI kaa digaalele. Qidem, Israayil qaskarak abbah yen Abner kee, Yuudâ-qaskarih abbah yen Qamasa deqsita numu.

³³ Yowab ta marat abe qidim kaa kee kay ramadih fillal raqtay. Takkay immay Dawud kee kay buxah maraay kaak rade mara kee keenik qarkayto nagrinnaan num, YALLI kulli waqdi amaanah xiinisay» 'yaanam kaak iyye.

³⁴ Tohuk lakal Banaaya Yallih Nabnah-Siraq fan yuduureeh, Yowab qide. Sarrak magaqah kay baaxo kaa beeniih, kay qariy barril geytimahiyyah garil kaa yoogoqen.

³⁵ Too waqdi Suleeman, Yowab luk suge qaskar abbootan Banaayah yecee. Abiyataar luk suge seekah abbootan Saadukuh yecee.

SIMQI RABEH

³⁶ Tohuk lakal Malik Suleeman Simqih farmo ruubeeh, «Ama» kaak iyye. Kaa baahen waqdi, kaak iyyemii, «Yarusalaamal qari xissa haay buxah gacaay, magaalak mawqin.

³⁷ Magaalak tewqeeh Kidroon buyyik bisoh iba hayte koo tekkek, raba isih isil tuckumem ixigaay, numuk tu mawan» 'yaanam kaak iyye.

³⁸ Simqi, «Malikow, meqeh, atu axcinnaanim abeyyo» iyye. Sarrak Yarusalaamal mango wakti suge.

³⁹ Sidooca sanatak wadir Simqi yeddereh suge naqoosak nammay Gat deqsitta baaxol yen malik fan kuden. Too malik migaaqah Maqká-Aakis deqsitak yen. Simqi naqoosa kaak Gat fan gexxem yoobbe waqdi,

⁴⁰ dananal koori haysitta heeh, kaak gexxe naqoosa goranah Gat fan gexe. Tokke gufe waqdi ken geeh gabat ken baahe.

⁴¹ Suleeman Simqi abem yoobbe waqdi,

⁴² farmo kaah ruubeeh «Ama» kaak iyye. Kaa baahen waqdi, kaak iyyemii, «Yarusalaamak awqe waytuh YALLIH migaaqal koo xibsiiseh en. Gexxek koo qideyyom koh warseh en. Atu kaadu, ‹Meqeh magexa; gexek rabi yol yamaatay› inteh ten.

⁴³ Hay, YALLIH migaaqal abte xiibay koo absiisehiyya akah makteeh, yi amri akah cintem maca?

⁴⁴ Yi abbal bahtem taaxigeh, hawwen akak mantu. Tohuh YALLI koo digaaleleeh,

⁴⁵ yot barkat heeleeh; Dawud-dardaarinna YALLIH foocal baxak baxal waarele» kaak iyye.

⁴⁶ Tohuk lakal malik, Banaayak, «Gexay Simqi qiday am» iyyeeh, too num gexeh kaa qide. Tohuk lakal inkih tan Israayil baaxo Suleeman milkih gacte.