1 Malikwa 19 - NABUWWA KEE MALIKWA

ELIYYAS SIINÂ-QALE FAN GEXE

¹ Malik-Acab isi barra-Idebalah, Eliyyas abba heem kee, Baqal-nabuwwa elle qidsiise'nna warse.

² Too waqdi is Eliyyasah farmo rubteeh kaak intemii, «Beera ta uddur atu nabuwwak abba haytem kok abe week, yallitte foyya yoo abtay» inte.

³ Eliyyas meysiteeh rooci megloh yoowweh. Is lih taamat yan num luk, Yuudâ-baaxol tan Bersabaq fan gexe. Taamat kaah yen num wokkel cabba heeh,

⁴ Eliyyas inkih tan ayro bacarih tan baaxot ankalaquk assa 'yeh, sarrak uli caxay silal lehiyyah gubal daffa 'ye. Isi niyat «Ahak rabam yoh aysuk ten» 'yaanam iyye. Too waqdi dooqa abeeh, «YALLAW, ah duudaanam hinna. Yi abbobtiy yok duma sugtek ayse waak, rooci yok eyyeq» iyye.

⁵ Sarrak caxâ-gubal deerih gacca 'yeh xin kaa bee. Too waqdi garciik, malaykatti gabah kaa xagga heeh, «Ugutay maaqo ukum» kaak iyye.

⁶ Ugteh wonnah wagga hee waqdi, kaak amô-ginat gaqambo kee leek kibuk yan gaani kaah suge. Woo lee kee gaqambok yokmeh yooqobeeh, qagteh deerih gace.

⁷ YALLIH malaykatti too waqdi yuduureeh, nammeyhaak kaa ugseeh kaak iyyemii, «Ugutaay safar kol yaqilseemik maaqo akum» kaak iyye.

⁸ Too waqdi Eliyyas ugteeh yokmeeh yooqobeh. Too maaqo, Siinâ-qaley taahirik tanihiyya gufam fan, morootom ayro kee morootom bar safarat akah sugu waa qande kaat gacte.

YALLI ELIYYASAH YUMBULLE

⁹ Siinâ-qale yewqe waqdi, barak elle xiina'gidih gablah adda cule. YALLI garciik kaa'lih yaabeeh, «Eliyyasow, ama'kkel maca abtah?» kaak iyye.

¹⁰ «YALLAW! Nabaamak Naba Dageltaw! Anu kulli way ku taamat aniih, koh dibuk taamita. Takkay immay Israayil mari ko'lih hee qahdi makeeh, ku qibaadah arooca yiggiggileenih ku nabuwwa qidak selli heen. Keenik dibuk raqtem yooy; taway yoo kaadu qidaanam faxan» iyye.

¹¹ YALLI too waqdi kaak iyyemii, «Wokkek tatre koo sugu waak, eweqay foocal yok sol» kaak iyye. Sarrak YALLI wokkek tatram fan naharat kaxxa caacoy qaleela baqaaqissaah xeet taggiggilehiyya ruube. Takkay immay YALLI too caacoh addat mananna. Woo caaco solteeh, sarrak baaxoh angoyyi yekke. Takkay immay YALLI woo baaxoh-angoyyih addat mananna.

¹² Woo baaxoh-angoyyih lakal gira obte. Woo girah addat kaadu mananna. Too girah lakal tutuctoh innah tanim yoobbe.

¹³ Eliyyas a anay yoobbe waqdi, fooca sarot isik qellissa heeh, edde suge gablak afah yewqe. Sarrak gablak afal soole. A anay, «Eliyyasow, ama'kkel maca abtah?» kaak iyye.

¹⁴ Eliyyas too waqdi, «YALLAW! Nabaamak Naba Dageltaw! Anu kulli way ku taamat aniih, koh dibuk taamita. Takkay immay Israayil mari ko'lih hee qahdi makeeh, ku qibaadah arooca yiggiggileenih ku nabuwwa qidak selli heen. Keenik dibuk raqtem yooy; taway yoo kaadu qidaanam faxan» iyye.

¹⁵ Too waqdi YALLI kaak iyyemii, «Akah temeete gita uduur. Damaskoh magaalak sinam elle deedalta'kke fan gexxa 'xicay. Sarrak magaala culaay Cadayel, Suuriyah-malik akah yakke innah, kaa uskut.

¹⁶ Nimsi-baxa-Yaahu kaadu, Israayil-malik akah yakke innah, kaa uskut. Aabil-Macoola deqsitta magaalal yan Saafat-baxa-Eliisaq kaadu, ku lakal nabi akah yakke'nnah, kaa uskut.

¹⁷ Cadayel-gabat rabaamih meysih kude num Yaahû-gabat rabele. Yaahuk kude num kaadu Eliisaq-gabat rabele.

¹⁸ Takkay immay yol imaan luk sugeeh, Baqal-akak-iyyaanamah-qibaada elle abaana'gidih gabak bicsen duyyeeyah gommoh rade weeh, woo ceelo fugute wee maray malcina alfih num yakkehiyya rooci luk ken cabeyyo» iyye.

ELIISAQ ELLE YUSKUTE'NNA

¹⁹ Tohuk lakal Eliyyas gexeeh, sarrak Eliisaq namma awuruy *madmad edde yanihiyyat abquruk kaah suge. Kaa'lih kaadu *madmadat tittat yoxeen awurwak labaatanna kee namma awuruy nammay nammayah axawah tittat yanihiyyat baaxo yabqure mari yen. Usukuuy salafat keenik tan namma awurut abquruk yen. Sarra Eliyyas saro isik kalla heeh Eliisaqal hee.

²⁰ Too waqdi Eliisaq awurwa cabba heeh Eliyyas lakal arduk gexxa 'yeeh, iyyeemih, «Naharak yi abba kee yi inak salaamata exceh ken fugutta heek lakal ko'lih gexeyyo» kaak iyye. Eliyyas, «Meqehik gex; anu koh abem macaay?» kaak iyye.

²¹ Too waqdi Eliisaq uduurra 'yeh isi awurwa yusguudeeh; cado elle alaysa'gidih, buqure edde abak suge *madmad iggilla heeh elle alayse. Woo cado ummattah keefeeh, woo ummatta woo cado tokmeh. Tohuk gaba kale waqdi, kaa cata num yakke'gidih, Eliyyas kataye.