1 Malikwa 18 - NABUWWA KEE MALIKWA

ELIYYAS MALIK-ACABAT YONGOOROWE

¹ Qabar radeemih sidiica sanat tikka 'yek lakal, ayrok teena YALLI Eliyyasak annah iyye. «Gexay Malik Acabah umbulluy; anu rob ruubeyyok» iyye.

² Eliyyas malikih yambullee'gidih gexe. Samaariyal ibak-gibdi qulul radeh yan.

³ Tonna-leemik Acab, Qobadya-deqsita-numuy malik-qarih-abbah yenehiyyah seece. Qobadya YALLIH meysi xagarat le numuk ten.

⁴ Idebal Yallih nabuwwa qidak ten saaku, Qobadya bool nabi beyya heeh namma kontomuh ken kurra heeh gablat yooqore numuk ten. Too nabuwwah makmok maaqabu tokke baahak yen.

⁵ Acab, Qobadyak annah iyye, «Gexay, qulul kee rabak ken catna'gidih, baakil kee faarisih qaysok tu geytam keh, buyyitte kee weeqayti dariifal gorrisey» iyye.

⁶ Sarrak kulli numuuy qaysô-goran keenik elle abu waa kabu tittah warissa heenik lakal, Malik Acab inki kabul goranah keenik gexeeh, Qobadya aki kabul gexe.

⁷ Qobadya woo gexoh gexa waqdi, garciik Eliyyasat garaye. Qobadya kaa yeexegeeh, too waqdi addah qununna 'ye. Sarrak, «Yi nabiyow, Eliyyasaw, ah nummaak koo?» iyye.

⁸ Eliyyas too waqdi, «Yeey ah yook; gexay ku malikik, ‹Eliyyas akkel yan› inxic» iyye.

⁹ Qobadya too waqdi iyyemii, «Kee maca baahee? Malik gabat yoo akah qidsissam faxxam macaa?» kaak iyye.

¹⁰ «YALLAY waaraah ku Dageltah yanihiyyah migaaqal koo xiibitah; malik ku goranah baadal cabba hee ikke mali. ‹Yi baaxol mayana› axcinnaan abba xibsiisak suge.

¹¹ Hay, taway atu, too numuk, ‹Eliyyas akkel yan, inxic› yok anni'nnal inta?

¹² Anu akkek gexa waqdiik, YALLIH *Roocaaniyya beyya koo hayteh, aaxige waan baaxol koo qiddek, maca abeyyo? Atu akkel tanim kaah warissa heeh akkel koo week, raba yol ackumele. Anu awkah en saakuuy a saaku fanah YALLIH qibaadat yan num kinniyo.

¹³ Malik barrah tan Idebal nabuwwa qidak ten saaku, anu bool nabi namma kontomul baxissa heeh gablah addat ken uqurat makmok maqub amoh keenih baahak suge num kinniyom maay toobbee?

¹⁴ Hay tonnal, malikih anu akkel anim waris 'yaanam macah yok intaa? Warsek yoo qidele» kaak iyye.

¹⁵ Eliyyas kaal gacsemii, «YALLAY waaraah Nabaamak Nabahiyyay anu akah taamitahiyyah migaaqal xiibitah aniih, a saaku Malik Acabah ambulleeyyo» kaak iyye.

¹⁶ Sarrak Qobadya Malik Acab fan gexeeh Eliyyas yemeetem kaah warseh. Acab too waqdi Eliyyasat garaya'gidih gexe.

¹⁷ Acab kaat radda 'ye waqdi, «Ah koo innaa? Israayilil umaaneh akak abaanam yeegemen numow» kaak iyye.

¹⁸ Eliyyas too waqdi kaal gacsemii, «Umaane keenil oobissem, yoo hinnay; umaane keenil oobissem, koo kee ku abba. Isin YALLIH amri cineeh Yalla akke sinni Baqal yuqbude mara kinniton.

¹⁹ Taway Israayil marak inkih, Karmel qalel yot ongoorowa inxic. Baqal-nabuwwak affara bool kee kontom gabat bah. Say-yalla akak iyyan duyyey migaaqah Aseera akah iyyaanahiyyay ku barra Idebal cato akah abtahiyyah nabuwwak affara bool gabat bah» kaak iyye.

ELIYYAS KEE BAQAL-NABUWWA

²⁰ Acab, Israayil mara kee Baqal-nabuwwak inkih Karmel qale fan ama 'yaanam iyye.

²¹ Too mari yemeete waqdi, Eliyyas foocal keenik solla 'yeh keenik iyyemii, «Isinnih taysem aaxige cinteenih, agaagulut rabten. Sin Dagelta YALLA tekkek, YALLA uqbudaay; Baqal tekkek, Baqal uqbuda» keenik iyye. Sahda too waqdi tu kaal magacsinnay tibba inte.

²² Tohuk lakal Eliyyas iyyemii, «YALLIH nabuwwak raqtem dibuk yoo. Baqal-nabuwwaay affara bool kee kontom takke.

²³ Taway namma awur baaha. Woo namma awuruk Baqal-nabuwwa awuruk teena beyya heenih yasguudoonay niyyassa heek lakal, akak gira sinni bocoh bagul hoonay. Anu kaadu aki awuruk toh abeyyo.

²⁴ Too waqdi Baqal-nabuwwa isinni yalla kallacoonay, anu kaadu YALLA kallaceyyo. Too dooqa abna waqdi, gira ruubinnaan Yalli nummah Yalla kinnim aaxigenno» iyye. Ummatta, «Taham meqeemik, takkay» iyyen.

²⁵ Sarrak Eliyyas Baqal-nabuwwak iyyemii, «Isin mangitoonumih sabbatah, isinni awur naharat beyay usguuda. Too waqdi bocot gira maruubina; isinni yalla kallaca» keenik iyye.

²⁶ Oson too awur beeniih usgudday niyyassa heenih, maacak xabba haanamaay dohri tikka 'yam fan dooqa abak sugen. Anay fayya haak, «Baqalow, innam nek oobbey, innam nek oobbey» iyyeeniih; toh lih kaadu, woo kaah sadgat elle abaana'gidih xisen aracat meekitak, way kaqitakaay way kaadu argaduk aseeni'mmay, keenil gacsem matan.

²⁷ Dohri yekke waqdi, Eliyyas keenil anqaaseh iyyemii, «Aykee sin yalli xayuk yaabbeh mayanak, dooqah anay fayya hayteenih abe wayten. Sin yalli away cisaabat aniiy, taamah agxeh aniiy, safarah rikek teena gexe yekke kaa tekkek, anay fayya kaah haa. Inaaqat yanim takkehik, kaadu kaa ugusa» axcuk, anqaasah ken lih yaabe.

²⁸ Usuk toh keenik iyye waqdi, woo ken qibaadah abitto elle inta innal, qabal keenik caxitam fanah gileela kee balaadit isinnik qanxis, qanxis heen.

²⁹ Carri barih sadgat edde aban waktih fanah waxxaq axcukuuy goroorocitak sugen. Takkay immay tu keenil gacissam magennoonuuy; hebeltoh anay mantabbinna.

³⁰ Too waqdi Eliyyas ummattak, «Taway yol ama» iyye. Oson too waqdi inkih kaal gaaboowen. Too mari kaal yemeete waqdi, YALLAH sadgat elle abak sugen aracay yiddigilleh sugehiyyah bicsiyyat gaceeh,

³¹ gexxa 'yeh taban kee namma xaa baahe. Woo taban kee namma xaa, Israayil addal tan taban kee namma kedoy Yaqkuub xayloh migaaqal muggaaqiseenihiyyah ceelallok ten. Yaqkuub, YALLI Israayil-'yaanamih-migaq akah yeyyeeqe numuk ten.

³² A taban kee namma xaak YALLAH sadgat elle abak sugen arac bicse. Woo aracat maroh af qunxa boodooda dage. Woo boodooda leek kiboonuh taban kee affara litri faxak yen.

³³ Sarrak boco bahha heeh, woo Yallih-migaaqal xise aracak bagul hee. Sarrak woo awur asguddaay niyyassa heeh, woo bocoh bagul hee. Too waqdi iyyemii, «Affara gaanu leek kibba haay, woo aracih bagul tan sadgat kee bocol caxa» iyye. Too mari Eliyyas keenik aba iyyem aben.

³⁴ «Qagisa» keenik iyye. Qagseenih. «Kaadu inki adda qagisa» keenik iyye. Qagseenih.

³⁵ Too waqdi woo lee Yallih sadgatah bicsen arac kee bocok bagul caxitteeh; dagen af qunxa boodoodat leek kibbiime.

³⁶ Sadgat edde aban uddur gufe waqdi, nabi Eliyyas Yallih-sadgat-elle-abaana'gidih-bicsen-aracih-garih amma 'yeeh iyyemii, «YALLAW, Abraahim kee Iscaakaay Yaqkuub doore Dageltaw, atu Israayilil Yalla kinnitooh, anu kaadu ku naqasu kinniyom ta saaku ken iysixxig. A saaku anu abah anim atu yok aba intem kinnim ken iysixxig.

³⁷ YALLAW, a mari atu Yalla kinnitom yaaxige'gidiiy tonna-leemik kol yaduure'gidih, aba dooqa yok oobbeyay yok raabitey» iyye.

³⁸ Too waqdi YALLIH gira qaraanak obteeh; too waqdi qiden awuruuy xeet kee boco inkih cararisseh, baaxok bisu korisseh woo af qunxa boodooday leek kibbinteh sugtehiyya woo gira kafisseh.

³⁹ Ummatta ah tuble waqdi baaxol gommoh raddeeh, «YALLIIY Yalla kinnih! Yalli dibuk kaa» iyyen.

⁴⁰ Eliyyas too waqdi, «Baqal-nabuwwa ibbixaay baaha. Num keenik gexe kalay ken baaha» iyye. Ummatta woo nabuwwa inkih tibbixeeh; too waqdi Eliyyas, Kisyon-weeqaytu fan beyya ken heeh, weeqayti-garil ken qidsiise.

ROB YAMAATE

⁴¹ Tohuk gaba kale waqdi, Eliyyas Malik Acabak iyyemii, «Ahaysa gexay maaqo xag; roobuk angad aabbeh anik» iyye.

⁴² Acab maaqo xaga'gidih gexe waqdi, Eliyyas Karmel qaleh amo yewqe. Tokkel qununna 'yeh moyya isik namma gulubih fanat hayya heeh,

⁴³ kaa'lih yan kay taamat yan numuk, «Gexay bad fan wagit» iyye. Taamâ-num gexeeh yuduure waqdi, «Tu maballiyo» axcuk yuduure. Eliyyas malcina adda qagamqagisak, «Gexay wagitay am» kaak iyye.

⁴⁴ Malcinhaytoh adda gexay gacak suge waqdi, «Qunxa qamburrê-baxay nabnah sahdayti gabak ayse waytahiyya badak addak awaqih uble» kaak iyye. Too waqdi Eliyyas woo numuk, «Malik Acab fan gexay, ‹Rob radam faxaah sarrak gexi koo mahaak; a waqdiik faras-gaarit koray buxah uduur› kaak inxic» iyye.

⁴⁵ Dago waktih addat data qamburre qaran bulteeh, kaxxa caacay yemeeteeh. too waqdi kaxxa rob rade. Acab isi gaarih amot gacca 'yeh Yidraqel fan yuduure.

⁴⁶ YALLIH qande Eliyyasal gacte. Too waqdi Eliyyas saro isik axcal kariqqa heeh, Acab-gaarik-foocat Yidraqel magaala fan yerde.