1 Malikwa 17 - NABUWWA KEE MALIKWA

NABI ELIYYAS QULUL RADELE IYYE

¹ Eliyyas deqsita nabiy Gilqad deqsita rasuk Tisba deqsitta magaalal yenehiyya malik-Acab fan yemeeteeh kaak iyyemii, «YALLAY waaraah Israayil doore Dageltah yanihiyyay anu naqasuh akak anihiyyah migaaqal xiibitah ani immay, anu ahaysa, rob amaatele siinik axceemik dumal, namma sanat akkiiy sidooca sanat akki guffa haam fanah baaxol naafi magaca; rob marada» kaak iyye.

² Tohuk lakal nabi Eliyyasal YALLIH qangara obteeh kaak iyyeemiih,

³ «Ama arac cabay Karit-buyyiy Ordon weeqaytuk ayrô-mawqa le kabut raaqahiyyah garil ombooqor.

⁴ Lee woo buyyik aaqubettooh; maaqo kuranwak, koh baaha exceh aniih, kuranwa koh baahele» kaak iyye.

⁵ Eliyyas YALLI aba kaak iyyem oggoleeh gexxa 'yeh Karit-buyyih garil gace.

⁶ Leek woo buyyik yooqobeeh; kuranwa kulli bar kee laqo gaqambo kee cado kaah baahak sugte.

⁷ Waqlak wadir robti waytik gexxaamah woo buyyi kafeh.

ELIYYAS KEE GUBNA GEYTEEMI

⁸ Sarrak YALLIH qangara kaal obteh, kaak iyyemii,

⁹ «Saydâ rasul tan Xarafat deqsitta magaala fan gexay wokkel elle idiy. Wokkel tan gubnah tan barrak maaqo koo oskoma yaanam exceh anik, tokke gex» kaak iyye.

¹⁰ Too waqdi Eliyyas Xarafat magaala fanah gexeeh; magaalak afa yemeete waqdi, boco gaabossa gubna kaah sugte. Sarrak usuk woo barrak, «Ku maganah yaaquben leeh tu maay lito?» teetik iyye.

¹¹ A barra lee kaah bahta'gidih gexxa 'te waqdi, teetih seeceh iyyemii, «Gaqamboyta kaadu luk yoh am» teetik iyye.

¹² «Gaqamboyta alle waamah YALLAY waaraah ku Dageltah yanihiyyah migaaqal xiibita. Takkay immay riyen darok gaba-kibba-haytah-gide sacnil liyooh, zeytik (saliidik) tu'baxa kaadu gaanul liyo. Akke akah emeetem, gira-elle-urusa-bocoy gaabossa heeh buxah aduure waqdi, inni kee inni baxah maaqo bicsa'gidih emeete. Maaqok linom too gideey; tohuk lakal nee qambaltam qulul kee raba» kaak inte.

¹³ Too waqdi Eliyyas teetik iyyemii, «Wohuh macisabbootinay bicissam faxak sugte maaqo bicis. Takkay immay naharak yoh ama-litoomuk qunxa gaqamboytâ-baxa bicisaay; raqteemit is kee isi baxah gaqambo bicis.

¹⁴ Woh akah axcem, YALLAY Israayil doore Dageltah yanihiyya iyyamaa, ‹Anu rob edde ruubu waa ayrok naharat, sacni addal yan bulul mayambaxaay, gaani addal yan zeyti (saliid) mayambaxak› iyyeh, macisabbootin» 'yaanam teetik iyye.

¹⁵ Too waqdi too gubna gexxa 'teeh Eliyyas teetik ab iyyem abte. Tohuk wadir kulli ayro, kaa kee teetiiy tet buxah mara dudda hayta maaqo luk yenen.

¹⁶ YALLI Eliyyasah afat xagana elle cule innal, sacnik daro mambaxinnay gaanuk zeyti mambaxinna.

¹⁷ Ayrok teena taaxige gubnâ-baxi lakmisak maacise. A lakimi lafak kaa lafeeh; sarrak edde rabe.

¹⁸ Too waqdi is Eliyyasak intemii, «Yallih numow, annah tanim macah yok abte? Akke akah temeetem, anu abeh an dambi Yalla kassisseh baxa yok qidsissa'gidii?» kaak inte.

¹⁹ Too waqdi Eliyyas, «Awka yol baahey» teetik iyyeeh, sarrak awka teetik gabak beyya heeh elle suge qarih amo kaa yeyyeeqe. Wokkel qarkaytô-bagul deerih kaa hee.

²⁰ Tohuk lakal anay fayya heeh dooqa abe. Dooqah iyyemii, «YALLAW yi Dageltaw, annah tan umaane a gubnal macah bahtee? A barray yoh muquk sugteeh amo yok wagitak sugtehiyyah baxa macah qiddee?» iyye.

²¹ Sarrak awkak bagul sidiica adda iba kee gaba rubbu heeh, YALLAK annah iyye, «YALLAW yi Dageltaw, a awkal rooci gacis» iyye.

²² YALLI Eliyyas abe dooqa oggoleeh, too waqdi awkal ufuy yuduureeh rabak yunuwweh.

²³ Sarrak Eliyyas qari amook awka gabat hayya heeh ina fanah luk oobe. Teetik iyyemii, «Ku baxi ah kaa; yunuwweh!» teetik iyye.

²⁴ Is too waqdi, «Yallih num kinnitom ta way kok ismiteeh; YALLIH qangaray atu yabta numma kinnim eexegeh» kaak inte.