1 Malikwa 16 - NABUWWA KEE MALIKWA

¹ YALLI, Canaani-baxa-Yaahu lih yaabeeh, Malik Baqsa iyyu waam farmoh kaal ruube.

² Nabi-Yaahu, too farmo kaal qideeh kaak iyyeemih, «YALLI kok iyyemii, ‹Tu'numuh masuginnitooy; inkih tan Israayil ummattay yi ummat kinnik abba koo abe. Tonna'mmay Yarobqamak kaxxih dambi le taamat asseeh, Israayil ummat dambi le taamat asisse. Oson aban dambih yot naqbi haak suge.

³ Tohuk gexxaamah koo kee ku buxah mara bayisaamat emeete. Nabát-Yarobqamak abba heem kok abeyyo.

⁴ Ku buxah marak magaalah addal rabinnaan numih raysa kuuta akmeleeh, barrih raqta baaxol rabinnaan numih raysa guma akmele› kok iyyah yan» kaak iyye.

⁵ Wohuk kalah taniimiy Baqsa abba heehiyya kee, luk yen agiiranni inkih Israayil-Malikwah-Aydaada deqsita kitaabih addal yan.

⁶ Baqsa rabeeh, Tirxâ magaalal kaa yoogoqen. Kay baxay migaaqah Eela deqsitak yenehiyya, kay lakal malik yekke.

⁷ Too farmo YALLI, nabi-Yaahû-gabat Baqsah akah ruubeemik naharsitto: YALLIH garil uma taamat asakaay, YALLIH naqabu isil oobisak sugeemih sabbata. Tonnal Yarobqam abak suggu 'ye umaane abak suge. Nammayhaak kaadu, YALLI a bis le umaane kaal akah baaheemik sabab, Yarobqam-buxah-mara qideeh saabo ken cabsiise.

EELA ISRAAYIL BAAXOL DARDAARE

⁸ Aasa Yuudâ-malik edde yekke labaatanna kee leceyhaytô sanatat Baqsa baxay migaaqah Eela deqsitak yenehiyya, Israayil-malik yekke. Dabqah Tirxâ magaalal gaceeh namma sanat malikih suge.

⁹ Dimri deqsita numuy malik luk yen faras-gaariirak garabak abbah yenehiyya kaa qidaamih malat gace. Ayrok teena Eela, Tirxâ-magaalal Axxa deqsita numuy malik-qarih abbah yenehiyya'lih, woo numih qaril kamri-maqabat yiskirem kaak yuble waqdi,

¹⁰ Dimri qari kaal culla 'yeh kaa qideeh; kay aracal isih malik yekke. Toh akah tekkem, Aasa Yuudâ-malik edde yekke labaatanna kee malcinhaytô sanatat yen saaku.

¹¹ Dimri malik akah yekke innaak Baqsâ-buxah-maral qidimih gexxa 'ye. Kaah ramad luk suge lab-mara kee, kay kataysiisih suge marak num macabinnay inkih selli hee.

¹² YALLI nabi-Yaahuk elle iyyeeh; nabi-Yaahu elle warissa hee innal, tekke.

¹³ YALLI annah tanim kaa kee kay buxah maral akah baahemii, Baqsa kee kay baxay Eela deqsite bahte dambih sabbata. Oson xeet kee coox aqbuduk sugeeniih, Israayil ummat kaadu dambit asisak sugeeniih, YALLAY Israayil doore Dagelta kinnihiyyah naqabu isinnil oobisen.

¹⁴ Wohuk kalah taniimiy Eela abba heehiyya inkih Israayil-Malikwah-Aydaada deqsita kitaabih addal geytinta.

DIMRI ISRAAYIL BAAXOL DARDAARE

¹⁵ Aasa Yuudâ-malik edde yekke labaatanna kee malcinhaytô sanatat Dimri Israayilik malik yekke. Dimri malikih malcina ayroh gide Tirxâ magaalal suge. Too saaku Israayil mari Gibbaton deqsitta Filistiin magaala yabbixeeni'gidih, tokkel yinfiddigeenih sugen.

¹⁶ Sarrak too mari Dimri malik qideemih xaagu geeniih, too waqdi Qomri deqsita numuy qaskar abbah keenik sugehiyya tokkel elle malikih dooren.

¹⁷ Sarrak Qomri kee kay qaskar Gibbaton cabteh gexxeeh, Tirxâ magaalat maro heen.

¹⁸ Dimri, magaala yibbixeenim yuble waqdi, malik elle gaca qarik iqiyat edde rebsiman golit culeeh qarit gira ruube. Too girat carareh edde rabe.

¹⁹ Too rabah akah rabem, isih abe dambi. Yarobqamay Israayil ummat dambit asisak sugehiyyah gita kataatak sugeeh, YALLIH garil dambi lem baahe.

²⁰ Tahak kalihimiy Dimri abba hee kee, malik qiduh abeh yan mala, Israayil-Malikwah-Aydaada deqsita kitaabih addal tan.

QOMRI ISRAAYIL BAAXOL DARDAARE

²¹ Tohuk lakal Israayil mari malikih haan numih dooriyyal titta weenih, namma'kkeh gaceeniih; marak garab keenik Ginat deqsita numih baxay Tibni migaq luk yenehiyya malikih haanam faxen. Aki garab keenik duma heenih sugen Qomri malikih yanay 'yaanam iyyen.

²² Ellecabol Qomri malikih haam faxa mari yeyseeh, Tibni qideenih. Qomri malik yekke.

²³ Soddom kee inikhayto sanatay Aasa Yuudâ-malik edde yekkehiyyat Qomri Israayil-malik yekkeeh, taban kee namma sanat abbootanal suge. Naharsi lica sanat Tirxâ magaalal ackumuk sugeeh,

²⁴ sarrak Samar deqsitak yen numuk lica alfih garsih kooma xaame. Woo koomat maro heeh sarrak tokkel magaala xise. Too magaalak migaaqah Samaariya iyyeeh; elle muggaaqisem, kooma akak xaame numuy Samar deqsitak yenehiyyak ten.

²⁵ Qomri YALLAL dambi lem baaheeh; kaak foocat sugte malikwak inkih lafita dambit asak suge.

²⁶ Kaak naharat malikih suge Nabát-Yarobqamak kaxxih abak suggu 'yem abeeh; Israayil mara xeet kee coox qibaadat asise. Tonnal YALLAY Israayil doore Dagelta kinnihiyyat naqabu culse.

²⁷ Tohuk kalah taniimiy Qomri abehiyya kee abinak edde assa 'yem Israayil-Malikwah-Aydaada deqsita kitaabih addal tan.

²⁸ Qomril Yallih amri yemeeteeh; Samaariyah magaalal kaa yoogoqen. Kay baxi Acab kay lakal malik yekke.

ACAB ISRAAYILIL DARDAARE

²⁹ Yuudâ-malikih yen malik Aasa reedeemih soddom kee bacarhaytô sanat gufe saaku, Qomri baxi Acab Israayil-malik yekke. Usuk Samaariyah magaalal labaatanna kee namma sanat reede.

³⁰ Usuk kaadu YALLIH garil dambi le taamat asak sugeeh, kaak naharat sugte amoytittek inkih lafita dambi abak suge.

³¹ Kaak dumal malikih suge Nabát-Yarobqam abak suge umaane kay garil inkinnah tuk masuginnaay, dambi abitto wohuk lafittam baahe. Etbaqal-deqsita-numuy Saydâ-marak-malikih yenehiyyak Idebal-deqsitta-baxá rihimih abite. Tohuk lakal Baqal akak iyyaanam diini-maleela Yallih aftok taqbudehiyyah qibaadat gace.

³² Too Baqal akak iyyaanamay Yallih innah yaqbudeenihiyyah qibaada bicse qaril sadgat-arac bicse. Tohum elle abem, Samaariyah magaalak ten.

³³ Tohut maadayinnay qagseh Aseera migaq le say-yalla akak iyyaanam elle yaqbudoonuh gurmudda hee. Tonnah abak YALLAY Israayil doore Dagelta kinnihiyyah bagcarra bahta uma taamat asak suge. Too gital kaak duma sugte Israayil-malikwak inkih fula le umaane usuk abak suge.

³⁴ Acab malikih yen saaku, Beetalal yooboke Ciyel Yerikô-magaala nammeyhaak xise. YALLI Nuún-Yoosuwak elle inxicca iyye'nnal, Ciyel Yerikô-magaala nammeyhaak bicsa'gidih rakiibo akah hee saaku, naharsi-baxi kaak rabe. Too baxi migaaqah Abiiram deqsitak yen. Aki baxay barah kay xaylok inkih wadirit yenehiyya, woo magaala akak culan afah bicsat yan saaku kaak rabe. Too baxi migaaqah Sagub deqsitak yen.