1 Malikwa 15 - NABUWWA KEE MALIKWA

ABIYYA DEQSITE YUUDÂ-MALIKI

¹ Yarobqam Israayil malik edde yekke taban kee bacarhaytô sanatat, Abiyya Yuudâ-malik yekke.

² Yarusalaamal sidooca sanat malikih suge. Kaak ina Maqka deqsitak teneeh; Abisalaamak baxák ten.

³ Usuk isi-abba-edde-asak-suge-dambit kaak kaxxih aseh sugeeh, YALLAY kay Dagelta kinnihiyyah garil yeemene numuk mananna. Akak rade Dawud bis le numuk mananna.

⁴ Takkay immay YALLI, kay-kaxxa-abba Dawud taagah lab-baxay malik yakku waa kaah yeceeh; tonnah kaadu Yarusalaam saayah xiinise.

⁵ YALLI ah akah abemii, Dawud kaa ruffa haytam abak sugeeh; YALLI aba iyyeemik, Ciitah-yooboke-Uriyya-deqsita-numul-baaheemiik kalihimik, YALLI inxicca 'yem inkih abak suge.

⁶ Abiyya dardaarinna geemih kaa kee Yarobqam qeebi tittat abak sugte.

⁷ Wohuk kalah taniimiy Abiyya abba heehiyya inkih, ‹Yuudâ-Malikwah-Aydaada› deqsita kitaabih addal tan.

⁸ Abiyya elle rabeeh elle yamoogoqem, Yarusalaam magaalak Dawud-Magaala deqsita caafata. Kay baxay migaaqah Aasa deqsitak yenehiyya kay lakal malik yekke.

AASA YUUDAL DARDAARE

⁹ Israayil malikih yen Yarobqam malik yekkeemih labaatanni sanat yekkek sarra, Aasa Yuudak malik yekke.

¹⁰ Aasa morootom kee inki sanat Yarusalaamal malikih suge. Kay aboyya migaaqah Maqka deqsitak teneeh abbak Abisalaam baxak ten.

¹¹ Aasa kay kaxxa abba Dawuduk kaxxih, YALLI kicnam abak yen.

¹² Xiiqareh-xiinak lab-maray coox-kee-xeet elle yaqbuden aroocal sugehiyya wokkek xiiriyeeh; kaak duma suge mari heeh suge gabak bicsen duyyey aqbuduk sugeenihiyya bayseh.

¹³ Isi aboyyay migaaqah Maqka deqsittaah, ‹Inah tan maliká› 'yaanam akah axcuk sugeenihiyya woo abbootanak kaleh. Tet abbootanak akah kalem, say-yalla akak iyyan duyyey migaaqah Aseera akah iyyaanahiyyah gurmudday umâ-yabulih-tani soolisseh sugte. Aasa too gurmudda kalla heeh Kidroon migaq le goloh addal carrise.

¹⁴ Aasa kaak duma sugga 'te qibaada elle aban aroocay fayyat raqtahiyya inkih mabaysinna'mmay, YALLAL le imaan kaak digga luk yeneeh, rabba 'yam fanah imaan kaak digga luk suge.

¹⁵ Kay abba kaak dumal YALLIH qibaadah orobta'gidih heeh suge duyye kee, usuk isih YALLIH qibaadah taamat asisa'gidih rikeek heeh suge dahab kee lakqo kee gersi duyye bahha heeh, YALLIH Qibaadah-Qarih addal hee.

¹⁶ Kaa kee Israayil malikih yen Baqsa deqsita num abbootanal suggu 'yen sanat inkih, qeebi tittat abak sugen.

¹⁷ Malik Baqsa Yuudâ-rasu warareeh; sinam Yuudâ-rasu awqe waytaah afak akah cule wayta innah, Raama deqsitta magaalat maro teetit haam qimbise.

¹⁸ Toh yuble waqdi, Aasa YALLIH Qibaadah-Qarih adda kee, isi buxak duyye elle daanisan aracal dahab kee lakqok sugga 'tem weerra heeh beeh, kay gubal doolatat abbootan luk yen marih gabal, Damaskoh magaalal Suuriyah malikih yen Banihadad deqsita malikih acwah ruube. Banihadad Tabrimmon deqsita numuk baxak teneeh; Cedyon deqsita numuk kaadu baxi baxak ten.

¹⁹ Afti farmoh ruubeemiih, «Duma ni abbobti qalla luk sugteeh; tonna'mmay ahaysa koo kee yoo ni abbobtik kaxxih qalla haysinnaama. Ama dahab kee lakqo mattacoh koh ruubah an. Tonna'mmay, Malik-Baqsay Israayil malikih yanihiyyah qaskar yi baaxok akah tawqe innah, kaa'lih lito qalla kaak targiqeemi» 'yaanam farmoh kaah ruube.

²⁰ Malik Banihadad too yab oggoleeh; sarrak Israayil magaalooli yabbixeeni'gidih, qaskar abbobti kee qaskar kaah ruube. Too qaskar Qiyon kee Daan kee Aabil-Beet-Maqka kee, Galiil badih dariifal ten magaalooli kee, Naftaali rakaakay inkih yibbixen.

²¹ Malik Baqsa tekkem yoobbe waqdi, Raamâ dariifat maro haanam cabeh Tirxa fan yuduure.

²² Tohuk lakal Aasa, inkih yan Yuudah rasul tan ummatak num raaqe'kal, «Baqsa, Raamat maro haa'gidih baaheh suge coox kee xeet wokkek kala» 'yaanam iyyeeh; too xeet kee coox tokkek kaleenih. Too duyyet Benyam rasul ten namma magaalay Mixfa kee Gabaq deqsitahiyya edde maren.

²³ Tohuk kalah kaadu, Aasa abeemik kay agiiranna kee, usuk maro edde hee magaalooliiy, kay aydaad inkih Yuudâ-Malikwah-Aydaada deqsita kitaabih addal tan. Sarrak idoolite saaku ibak kaxxa biyaakah biyaakiteeh ellecabol yangayyem gidibuk kaal ten.

²⁴ Rabe saaku Dawud-Magaala deqsita caafatal malik-buxah-mara edde yaaguqen *kabrit kaa yoogoqen. Kay baxi Yacoosafat kay lakal malik yekke.

NADAB ISRAAYILIL DARDAARE

²⁵ Malik Aasa Yuudâ-malik edde yekke nammayhaytô sanatat, malik Yarobqam baxi Nadab Israayil malikih gace. Namma sanatah malikih suge.

²⁶ YALLAL dambi lem baaheeh, kay abba Israayil dambit akah asisak suge'nnah, usuk kaadu dambit ken asise.

²⁷ Issakar-kedoh yooboke Aciiya baxi Baqsa, Nadab kee kay qaskar Filistiin rasul Gibbaton deqsitta magaala yabbixeeni'gidih maro haak sugen waqdi, raarisak amma 'yeh kaa qide.

²⁸ Taham edde tekkem, Aasa Yuudâ-malik edde yekke sidochaytô sanatak ten. Sarrak Baqsa kay aracal isih malikih gace.

²⁹ Too waqdiik Yarobqam-buxah-marih qidimit gaba hee. Aciiya deqsita nabiy Siilol yoobokehiyya Yallih afak yoobbe farmo baahe saaku elle iyye innal, Yarobqam-buxah-mara qideeh, num keenik macabinna.

³⁰ Toh Yarobqam kee kay buxah marat akah tekkem, isih dambit asakaay, Israayil ummat kaadu dambit asisak, YALLAY Israayil doore Dagelta kinnihiyyah naqabu isil oobiseemih sabbatah kaat tekke.

³¹ Wohuk kalah taniimiy Nadab abba heehiyya inkih, Israayil-Malikwah-Aydaada deqsita kitaabih addal tan.

³² Malik Aasa kee malik Baqsa abbootanal sugga 'tem qeebi tittat abak sugen.

BAQSA ISRAAYILIL DARDAARE

³³ Malik Aasa edde reede sidochaytô sanatat Aciiya baxi Baqsa Israayil malik yekke. Dabqah Tirxâ magaalal gaceeh; labaatanna kee affara sanat malikih suge.

³⁴ YALLAL dambi lem baaheeh; kaak duma suge Yarobqam Israayil dambit akah asisak suge'nnah, usuk kaadu woo dambit ken asise.