1 Malikwa 14 - NABUWWA KEE MALIKWA

YAROBQAM BAXI ELLE RABE'NNA

¹ Too saaku Yarobqam baxi lakmise. Usuk Abiyya deqsitak yen.

² Abba toh yuble waqdi isi barrak iyyemii, «Koo elle aaxige waan sartanat gacca 'xicay Siilo fan gex. Aciiya deqsita nabiy duma Israayil malik akketto 'yaanam yok iyyeh sugehiyya tokkel koh sugelek, kaal gexetto.

³ Tabna gaqamboyta kee gasiita kee malabak-buuti gabat kaah bey. Sarrak baxi nek lakmisam kaah warisaay; qaffootam keh kaa esseray am. Takku waytam koh warselek» teetik iyye.

⁴ Kay barra tonnah abteeh, Aciiyâ-buxay Siilol tenehiyya fan gexxe. Aciiya idoolinnah namma inti weeh yen.

⁵ YALLI kaak iyyeemih, «Yarobqam barra, baxay lakmisahiyyah caagid koo esserta'gidih tamaateh tan» kaak iyyeeh, teetik iyyu waam kaadu kaah warse. Is sarrak gersi sahdaytoh weelot gacca 'teh kaal temeete.

⁶ Aciiya qarik afak cultaamih karbaaca teetik yoobbe waqdi teetik iyyeemih, «Annah culey, Yarobqam barra kinnitom kok aaxigehik, aki weelot akah gacteh temeetem macaa? Cul annah am; saaha sinni xaagu koh abbixek.

⁷ Yarobqamak intu waytam koh warisu waak am» teetik iyye. Qari kaal culte waqdi, «YALLAY Israayil doore Dageltah yani, ‹Ummat addak doorru koo heeh, Israayil ummatay yi marah yanik malik koo abe.

⁸ Dardaarinna Dawuduk rade marak beyya heeh koh ecee. Takkay immay Dawuduy yi naqasuh yeneeh anu aba exceemik sah gersim abe waak yi amri afqadook duudusak yenehiyya makkinnito.

⁹ Kok duma suge marak gaca dambit assa. Yoo cinna hayteh, coox kee xeetiiy, dahabaay, lakqo kee nacaasak isi gabak bicisse duyyey yalla akak intahiyya hayte. Yot naqabu culusinnaanimit asseeh, darre yot cabte.

¹⁰ Tohuk gexxaamah ku dardaarinnal bala oobiseyyo. Kok radda labhak baacoytit takkuu, gaddaloola takku, inkih ken qideyyo; buxâ-mara kok bayseyyo. Saqi-dacah innah baaxot ken qidelon.

¹¹ Ku-buxah-marak magaalah addal rabinnaan numih raysa kuuta akmeleeh, barrih raqta baaxol rabinnaan numih raysa guma akmele. Tamahat yabtam, yoo YALLA, kok iyyeh yan› kaak inxic» teetik iyye.

¹² Aciiya yab ahat mayseedeyinnay qagseeh iyyeemih, «Away is buxah uduuraay; lakmisak kok raaqe baxi magaala culla 'ta way, kok rabele.

¹³ Israayil mari inkih kay rabah rookitele. Meqe magaqah kaa aaguqelon. Yarobqam buxah marak meqe magaqah tamoogoqu waytam, dibuk too awka. Macaay intek, YALLAY Israayil doore Dagelta kinnihiyya ken addak maqaane edde yublem dibuk kaa.

¹⁴ YALLI Israayilik abba yakku waa malik reedisele. Too malik, Yarobqam luk suge dardaarinna inkitanuuk baysele. Toh xayih akkelem ixig!

¹⁵ YALLI Israayil digaalele. Israayil mari dori-qaxal tooboke bayrey caacay kabuk kabul yasgayyeh innah gacelon. Duma ken kaxxa abbobtih ikoytah yecee baaxoy away elle yaniinihiyyak ken ayyaaqele. Fuurat weeqaytuk woo kabul ken fixixisele. Toh keenik akah abu waam macaay intek, YALLAT naqabu culseeniih, Aseera deqsittaamay yaqbudeenihiyyah astah heenih sugen gurumuuda soolisen.

¹⁶ YALLI Israayil ummatat darre cabele. Toh macaay intek, Yarobqam edde ase dambi kee, Israayil mara edde asise dambih sabbata» teetik iyye.

¹⁷ Nabi too yaabak gaba kale waqdi, malik barra isi buxay Tirxâ-magaalal teneh tuduure. Awki, is isi qarih afa guffa inte waqdi, rabe.

¹⁸ Israayil mari too awkih rabah rookiteeh; YALLI nabi-Aciiyay kay naqasuh yenek elle iyye innal, meqe magaqah kaa yoogoqen.

YAROBQAM RABE

¹⁹ Wohuk kalah taniimiy Malik-Yarobqam abehiyya kee, usuk carbik abeh gideey, sahda elle xiinisak suge'nna, Israayil-Malikwah-Aydaada deqsita kitaabih addal tan.

²⁰ Yarobqam labaatanna kee namma karmah malikih suge. Usuk rabeeh kay baxi kay arac ciggiile. Kay baxi migaaqah Nadab deqsitak yen.

SULEEMAN BAXI RACABQAM YUUDA ELLE DARDAARE'NNA

²¹ Suleeman baxi Racabqam, Yuudâ-malik yekke saaku, morootom kee inki karmat yen. Yarusalaam magaalay YALLI Israayil magaalak inkih isi qibaadah abittoh doorehiyyal, taban kee malcina karma malikih suge. Racabqam ina Naqma deqsitta barrak teneeh, Qammon deqsita marah aabakuk ten.

²² Yuudâ-mari dambi-lem YALLAL baahe. Ken kaxxa abbobtik fula YALLIH naqabu isinnil oobisen. Uma-taamat asen.

²³ Kulli qaleh amo kee silal le cooxih gubal, duyye elle yaqbuden arooca xiseeniih, taahirik tan qamidwa akak iyyan qamidway xeetik bicseenihiyya sooliseenih, Aseera deqsittaamay yaqbudeenihiyyah astah heenih sugen gurumuuda soolisen.

²⁴ Wohuk gactaamah abeenimih, woo duyye elle yaqbuden aroocal xiiqareh-xiinak-labim tokkel heen! Yuudâ-mariiy, Israayil-mari yamaateemik naharal woo baaxol suge maray YALLI yeyyeeqehiyya edde asak sugen umâ-yabulih-tan-taamat inkih gacen.

²⁵ Racabqam malik edde yekke konoyhaytô sanat gufe saaku, Masri-malikiy migaaqah Sisak deqsitak yenehiyya Yarusalaamat qeebi abeeh tet yibbixeh.

²⁶ Too saaku YALLIH Qibaadah-Qarik duyye elle daanisan aracal sugga 'te duyye kee, malik qaril sugte duyyek Suleemanak-raqte-goobway dahabak bicseenihiyyah agantah inkih bee.

²⁷ Malik Racabqam woo goobwah aftok nacaasak bicsen goobwa bicissa heeh; sarrak malik qarih afal dacayrih yan maral amaanatah yecee.

²⁸ Malik YALLIH Qibaadah-Qari fan gexa waqdi, quukah tokke fan baahak yeneeniih; usuk wokkek yaduure waqdi, daanah elle yabbixen malik qari fan gacisak yenen.

²⁹ Wohuk kalah taniimiy Racabqam abba heehiyya Yuudâ-Malikwah-Aydaada deqsita kitaabih addal tan.

³⁰ Racabqam kee Yarobqam abbootanal sugga iyyen dabaanal carbi tittat abak sugen.

³¹ Racabqam rabeeh; Dawud-Magaala deqsita caafatal malikwâ-buxah mara edde yoogoqen kabrit kaa yoogoqen. Racabqam ina Naqma deqsitta barrak teneeh, Qammon deqsita marah aabakuk ten. Kay lakal kay baxi malik yekke. Migaaqah Abiyya kaak axcuk yenen.