1 Malikwa 13 - NABUWWA KEE MALIKWA

YALLI TOO QIBAADA YESSECEKKE

¹ Malik-Yarobqam, Beetal deqsitta magaalal sadgat-elle-aban-aracal qaydarus qeerisa'gidih soolol yan waqdi, Yuudâ-baaxok-yemeete-nabi, YALLI kaak elle iyye innal, yemeete.

² Too-nabi, YALLI kaak inxica elle iyye innal, iyyemii, «Sadgat-aracaw, sadgat-aracaw, kok axcem oobbey! YALLI kok inxicca iyyem kok axcu waa. Dawuduk radu waa marak Yoosiyaahu deqsita awki aabukele. Too awki yanabu waa saaku, qibaada-elle-aban-aroocay fayyat raqtahiyyal seekâ-gurral taamita maray ku gari sadgatah qaydarus qeerisaanahiyya qideleeh, ku bagul ken carrisele. Sahdayti-lafa ku bagul carriselon» iyye.

³ Tohut macabinnay qagseh iyyeemih, «A sadgatih-arac addigillele. Bagul akak yan gombod caxitele. Too waqdi anu away edde yaaba yab YALLIH yab kinnim aaxigetton» iyye.

⁴ Malik-Yarobqam toh yoobbe waqdi, «Ama num ibbixa» iyyeeh, gaba kaa fan yescesse. Nabi-fanah-ruube-gaba too waqdiik kaffa kaak inteeh xambaqime cinteh.

⁵ Woo sadgatih-arac kaadu garciik baaxol radeeh, sadgat-aracih amol suge gombod baaxol caxite. YALLIH migaaqal nabi iyyem tonnal tekke.

⁶ Too waqdi Yarobqam nabik iyyeemih, «Ku maganah, gaba yok akah sugte'nnah gacta'gidih, YALLAY ku Dagelta kinni yoh kallac» kaak iyye. Nabi YALLA kaah kallaceeh, too waqdi malik gaba akah sugga 'te innah gacte.

⁷ Sarrak malik kaak iyyeemih, «Yoh abte maqaaneh galto koh gacseyyok, buxa nee bey, maaqo xagta'gidih» kaak iyye.

⁸ Nabi tohuk kaal gacsemii, «Isih lito gaddaliinok garab yoh teceemih ku buxal ko'lih magexa; akkel leek maaqo maxaga.

⁹ YALLI, ‹Too aracal tu maxagin; tu maaqabin. Isi buxah taduure waqdi, akak temeete gita hinna'mmay, aki gitak gacca xicay gex› 'yaanam yok iyye ikkal, ku buxah magexa» kaak iyye.

¹⁰ Tohuksa usuk isi buxa yaduure'gidih, akak yemeete gitak magacinna.

TOO NABI YALLI KAAK IYYEM CINE

¹¹ Too dabaanal, too-aracal-dabqah-yen-nabiy barak idaltuh yanihiyya suge. Too ayroy tonnah tanim tekkehiyya kay xaylo kaal temeeteeh; Yuudâ-baaxok yemeete nabi too ayro Beetalal abeh cabem kee Yarobqamak iyyem kaah warsen.

¹² Too waqdi a nabi xaylok iyyeemih, «Hay yi xayloy, gitah gace'kke maay taaxigen?» keenik iyye. Kay xaylo nabi gitah gace'kke kaa tescesseh.

¹³ Too waqdi, «Dananal koori yoh haa» keenik iyye. Dananal koori kaah heen waqdi,

¹⁴ gitak adda nabik lakat oobe. Sarrak taaxige Yuudâ-baaxok yemeete nabi kaxxa-caxah-gubal daffeyak kaah suge. Kaa yuble waqdi, «Yuudâ-baaxok yemeete nabi koo maay kinni?» kaak iyye. Yuudâ-baaxok yemeete nabi, «Yoo kinnih» iyye.

¹⁵ Too waqdi idaltuh yan nabi, «Am hay, buxal suginnaanim xagta'gidih, buxah koo beyu waak» kaak iyye.

¹⁶ Yuudâ-rasuk yemeete nabi, «Aleey, qibnaytiinoh buxa ko'lih magexa; akkel kaadu tu ko'lih makmaay maaquba.

¹⁷ YALLI, ‹Tu makminaay tu maqaabin. Buxah taduure waqdi akak temeete gitak magacin› 'yaanam yok iyye ikkal, ko'lih magexa» kaak iyye.

¹⁸ Beetal rasul suge idaltuh yan nabi diraabah kaak iyyeemih, «Anu innih kok kaxxih nabi kinniyooh; YALLII, malaykattu yol ruubeeh; too malaykatti yok iyyeemih, ‹YALLI, Tama-nabi buxah beyaay qibnaytiino kaah ab, kok iyyah yan› 'yaanam yok iyyeeh; koo beyu waa» kaak iyye.

^19-20 Too waqdi Yuudâ-rasuk yemeete nabi, kay buxa kaa'lih gexe. Buxal maaqo kaa'lih akamuk suge waqdi, YALLIH qangara idaltuh yan nabil obte.

^21-22 Too waqdi idaltuh yan nabi, Yuudâ-baaxok yemeete nabik, anay fayya haak iyyeemih, «YALLI kok iyyaamah, ‹Yi amri cinteeh anu kok aba excem cabba hayteh, maaqo makminay lee maaqubin kok elle exce ikkel, tokmeh, tooqube. Tohuk gexxaamah rabettooh; lafa kok ku buxah marih lafa lih kok matamoogoqa› kok iyyah yan» kaak iyye.

²³ Maaqok gaba kalen waqdi, idaltuh yan nabi Yuudâ-rasuk yemeete nabih dananal koori hee.

²⁴ Yuudâ-rasuk yemeete nabi tohuk lakal isi gexoh gexak suge waqdi, gital lubak matarra kaa iyyeh kaa qide. Lafa kaak gitak addal qangalayluh raqte. Kay-raysih-garil danan kee lubak namma kabul soolak sugte.

²⁵ Tokkek gitah gace mari lafa kaak gita addal yubleeniih, lafak garil lubak soolah yublen. Too mari Beetal fan gexak sugeeh, Beetal gufen waqdi yubleenim magaalâ-marah warsen.

²⁶ Taaxige idaltuh yan nabi toh yoobbe waqdi iyyeemih, «Tohum YALLIH yab cine nabik tanih tan. YALLI akah iyye innah kaak abeh yan. Lubak kaat ruubeeh too lubak kaa qide» iyye.

²⁷ Sarrak isi xaylok, «Gexay dananal koori yoh haa» iyye. Kay xaylo dananal koori kaah hayteh.

²⁸ Tokkeek gexe waqdi, taaxige Yuudâ-baaxok yemeete nabih lafay gitak addal taniih lubak kee danan garil akak soolahiyyat fellaqqa 'ye. Too lubak nabik raysa maxaginnaay; dananay kaa'lih soolak sugehiyya kaadu xage'kal, tokkel elle soolak kaah sugen.

²⁹ Taaxige idaltuh yan nabi lafa kaak aracak ugseeh, dananal hayya heeh, Beetal gacse. Tokkel kaah rookitak suggu 'yeh, sarrak kaa yoogoqeh.

³⁰ Kaa edde yoogoqem, isi buxah marih *kabrih addak ten. Kaa yoogoqek sarra, kaa kee kay xaylo kaah rookitteh. Nabi weeqeeh, «Woyyow, yi toobokoytaw. Boogeew, toobokoyti yok rabe» iyye.

³¹ Sarrak isi xaylok iyyeemih, «Anu rabu waa saaku kaa'lih a kabrit yoo uguqa. Ginaada yok kay gariik haa.

³² Usuk Beetal elle yan sadgat-arac kee Samaariyah baaxol geytinta magaaloolil qibaada elle aban aroocay fayyat raqtahiyyah qaadak edde yaabe yaabay YALLI kaak inxica iyyehiyya nummak maacisele» iyye.

³³ Nabi takku waytam kaah warseh immay, Yarobqam abak suge dambi le abtok akah maadayinna. Seekâ-gurral qibaada sinam absiisa mara doorru heeh qibaada-elle-aban-aroocay fayyat raqtahiyyal hee. Tohuk kalah, too aroocal too taamat gacam faxinnaan num elle haak yen.

³⁴ Too umaaney usuk abak sugehiyya ellecabol kaa kee kay dardaarinna baati kee qaasir-umaane xalte.