1 Malikwa 12 - NABUWWA KEE MALIKWA

KILBAT LE KABUT RAQTA KEDO YUUDAT UGUTTE

¹ Racabqam kiblat le kabut raaqa Israayil mari malik kaa aba'gidih, elle mododeh suge Seekem deqsitta magaala fan gexe.

² Nabát-Yarobqam duma Malik-Suleeman-meysih megloh Masri fanah kudeh sugeeh; ta xaagu yoobbe waqdi Masril elle suge.

³ Guubuh kilbat le kabut raqqa 'ta kedooda farmo Nabát-Yarobqam fan rubteeh; usuk tokke yemeete waqdi, Racabqam fan gexeenih kaak iyyeenimih,

⁴ «Ku abba Suleeman duma uma xinto kee kaxxa gibdaabinat nee abbaxuk suge. Usuk nee edde abbaxuk suge gibdaabina nel sahhilossu waytek, ku xintot xiinenno» kaak iyyen.

⁵ Racabqam keenil gacseemih, «Inkiimihiiy esserteenimih adda cubbussa heeh, siinil gacsa'gidih, sidiica ayro yoh ucuyaay, tohuk wadir yol uduura» iyye. Too waqdi too mari gexeh.

⁶ Malik Racabqam kay abbah taamat sugte idoolay kay abba fayu elle esserak sugehiyya fan fayu essera'gidih gexeeh, «A mari yok iyyeemik maca keenil gacsam tayseeh?» axcuk fayu keenil essere.

⁷ Too idoola kaak intemii, «Meqe'nnal ken xiinissam faxxek, meqem keenil gacisaay; tonnal kulli way ku taamat gaceloonuh koo mamakan» 'yaanam kaak iyyen.

⁸ Takkay immay oson kaah yeceen fayu cabba heeh, kay fiqmay kaa'lih tembeeh fayu kaah taceehiyya fan gexeeh;

⁹ «Taway ta marak maca axcem taysee? ‹Ku abba nee edde abbaxuk suge gibdaabina nel sahhilos› 'yaanam yok iyyeenik, too tiyal maca keenil gacsoo?» keenik iyye.

¹⁰ Too qunxaaneyti fayuh kaak iyyeenimih, «Y'abbah axcak yi qunxa feera nabaah;

¹¹ y'abba qilsa-le-quuka fillat siinik abbaxuk suge'mmay, anuuy wohuuk gibdim siinil baaheyyo. Usuk qunxa keetalat sin aagaruk suge'mmay, anu faaris edde yaaguren keetalat sin aagureyyo› 'yaanam keenik inxic» iyyen.

¹² Sidooca ayrok lakal, Yarobqam kee inkih tan ummatta, usuk «Yol uduura» keenik elle iyye ayrol, malik Racabqam fan yemeeten.

^13-14 Malik idoola fayu cinna heeh, furrayna kaa fayisse ceele waa uma yaabat ummatta lih yaabeh, iyyeemih, «Y'abba qilsa-le-quuka fillat siinik abbaxuk suge'mmay, anuuy wohuuk gibdim siinil baaheyyo. Usuk qunxa-keetalat sin aagaruk suge'mmay, anu faaris edde yaaguren keetalat sin aagureyyo» 'yaanam keenik iyye.

¹⁵ Aham duma akkelem YALLI, nabi-Aciiyah-afat Yarobqamah warseh sugeeh; tohuk gexxaamah Racobqam ummatta faxxam abam cineh. Siilol yoobokeh yen Aciiya deqsita nabi iyyem nummak maacisse.

¹⁶ Yemeete mari, malik yab keenik aabbe cinem yublen waqdi, «Ah maca neh xiqee, Dawud kee Dawuduk rade mara? Nee kee keenik maca tangalee? Kata labhay, nee beya! Racabqam ahaysa isih faxem abbaasitay» iyyen. Tohuk wadir Israayil mari woo xintol saduh gacen.

¹⁷ Tohih sabbatah Racabqam dibuk Yuudâ-rasul dabaaqah suge marih abbootan luk raaqe.

¹⁸ Toh yuble waqdi Racabqam, farmoh Adoniiram deqsita numuy dirkisak tamsiisan marih abbah yenehiyya Israayil mara fan ruube. Too mari too numut xeet heeh edde kaa qiden. Racabqam toh yoobbe waqdi, sissikuk faras-gaarit koreeh Yarusalaam fan kude.

¹⁹ Too ayrok wadir, Israayil rasuk kilbat le qaxat raqta ummatta inkih Dawuduk raaqe dardaarinnal saduh gacen.

²⁰ Israayil mari Yarobqam Masrik yuduurem yoobben waqdi, elle kobxeenih sugen arac fan yamaate'gidih, kaah seeceeniih; tokke yemeete waqdi malik kaa aben. Yuudah yooboke mari dibuk Dawuduk rade marih gubat raaqe.

SAMAQYA YALLIH YAB BAAHE

²¹ Racabqam Yarusalaam yemeete waqdi, Yuudah yooboke mara kee Benyam kedok bool kee bacra-tabanih-alfih qaskariitay dooro lehiyyah seeco abe. Too seeco too qaskarah akah abem, Israayil rasuk kilbat le kabut raqta Israayil ummattat qeebi abba heeh isi gubat ken haa'gidik ten.

²² Takkay immay too qaskar qeebih ruubaamak dumal, Yalli nabi-Samaqya lih yaabeeh,

²³ Malik-Racabqam kee, Yuuda kee Benyaamah yooboke marah farmo ruube.

²⁴ «Keenik intaamah, ‹Israayil mari sin tooboko'mmay, qeebi keenit maabina. Away tikka 'tem inkih yi fayxik tekkeemi'mmay, takkeenimik inkih isinni buxah uduura› keenik inxic» iyye. Too mari YALLIH amri oggoleenih; yakkeenimik isinni buxah yuduuren.

YAROBQAM YALLAK YEXXEERE

²⁵ Israayil malikih yen Yarobqam, Efrayim kedoh qaleela mango aracal ten Seekem deqsitta magaalat maroh gaso heeh, sarrak dago gide wokkel suge. Waqlak wadir wokke cabeh gexeeh, Fanyel magaalat maroh gaso hee.

^26-27 Too waqdi isi bagul yucsubeemih, «Away tu elle tani'nnak yi mari Yarusalaam fan gexeeh, wokkel Qibaadâ-Qaril YALLIH migaaqal sadgat aben ken tekkek, malik Racabqam mara akkeloonuuh, tonnal yoo qidelon» 'yaanam yucsube.

²⁸ Toh cisaabisak suggu 'yeh sinaamal fayu essereeh; sarrak dahabak namma daheltih ceelo bicse. Tohuk lakal isi marak iyyeemih, «Akkeek, Yarusalaam magaala fan gexxaanam xexxaarah duuduntam hinnak, ahaysa Masrik sin yeyyeeqe sin Dagelti ah kaana; akkel yaniih, wokke akah taqabtaanam manton» keenik iyye.

²⁹ Too namma daheltih ceeloy bicsehiyyak tiyak teena Beetal deqsita aracal heeh, akittu Daan deqsita aracal hee.

³⁰ Ummatta too daheela taqbude'gidih, too arooca gexxeeh dambit asen.

³¹ Tohuk kalah qibaada elle aban aroocay fayyat raqtahiyyal qarwa xiseeh, woo aroocah seeka yakku waa maray Leewi-kedoh aabuke weehiyya hee.

³² Too maray seeka akak iyyaanahiyya kaadu Beetal-magaalal hee. Yuudâ-rasul abak sugen qiidih gurral, sanatak bacarhaytoh alsak taban kee konoyhaytoh ayrot qiidih edde asan ayro doore. Beetal deqsita aracal isih bicse daheltih ceeloh, sadgat-arac bicissa heeh, sadgat akah abe.

³³ Tonnal, sanatak bacarhaytoh alsak taban kee konoyhaytoh ayro qiidih edde asan ayro abeh; too ayrot Beetal deqsita arac gexxa 'yeh, Israayil marah woo qiidih ayro sadgat elle abuh bicse aracal sadgat abe.