1 Malikwa 11 - NABUWWA KEE MALIKWA

SULEEMAN YALLAK YEXXEEREH!

¹ Suleeman gersi baaxoh agabuk mangom yikcine. Masri malikih baxá abiteeh, kalah kaadu Ciitaay Mooyabaay Qammonuy Edom kee Sayda deqsitak yen marih agabul digibe.

² YALLI dumaak, ‹Israayil ummatey, tama marak madigibina. Rihimten sin tekkek, imaan siinik boolayseloonuuh, yalla akke sinniimih qibaadat sin asiselon› keenik iyyeh suge'mmay, tohuh Suleeman too marih xayloh rihimik mawaasiminna.

³ Suleeman malikwâ-xaylok malcina bool takkem abiteh yen. Kalah kaadu, sidiica boolih barray caggô-gubih caggoh nikaacat yabbixehiyya luk yen. Too agbi Yallak kaa yeyxeereh.

⁴ Suleeman idoolite saaku, kay agbi YALLAY kay Dagelta kinnihiyyak kalah kaadu akiimiy Yallih innah yaqbudeeni ken lih yaqbudem kaal esseren. Tokkel usuk YALLAL luk suge imaanat sakki kaak cule. Kay abba Dawud elle suge gitak hoxxiimeh.

⁵ Qastarot deqsittaamay Saydâ mari say yalla axcuk Yallih aftok yaqbudehiyya ken lih yuqbude. Tohuk kalah kaadu, Qammon mari yallah luk yen Milkom deqsittaamay umam yabulih tanihiyya ken lih aqbuduk yen.

⁶ YALLAL dambi lem baaheeh; kay abba Dawud baguuk YALLIH gita elle katayak yen innal, kaa makatayinna.

⁷ Yarusalaamak ayrô-mawqa le kabu raqta qalel, Kamos deqsitta umâ-yabulih tan duyyey Mooyab mari Yallih aftok aqbuduk sugehiyya elle yaqbudeeni'gidih arac keenih bicse. Tonnah kaadu, Qammon mari yallah le Milkom deqsittaamay umâ-yabulih tanihiyya elle yaqbudeeni'gidih arac keenih bicse.

⁸ Toh lih kaadu, allî-baaxoh agabuy ginnaaqot luk sugehiyyah, yallah lon duyyeeyah qibaada elle abaanaah, qaydarus elle qeerisaanaah sadgat elle aban arooca keenik bicse.

^9-10 YALLAY Israayil doore Dagelta kinnihiyya namma adda Suleemanah yumbulleeh, «Aki mari Yalla iyyeh yaqbudem maqbudin» kaak iyyeh sugeh immay, Suleeman YALLIH amri moggolinnaay Yallak yexxeereh. Tonnah leemik YALLI Suleeman yinqibeeh,

¹¹ kaak iyyeemih, «Atu makkook itta lih haysinne bicih bagul geytime wayteeh, yi amri oggole wayteemih sabbatah, away lito malaakinna kok beyya heeh kok gubal yan numuh acee liyom koh warsah an.

¹² Takkay immay ku abbah taagah addunyal tanim fanah aham kok maaba'mmay, ku baxih dabaanal abeyyo.

¹³ Tonna'mmay elle dardaara baaxo inkih kaak mabeya. Usuk amol akak dardaaru waa inki kedo kaah cabeyyo. Toh akah abu waam, Dawuduy yi naqasuh yenehiyya kee Yarusalaam magaalay innim abehiyyah taaga» 'yaanam iyye.

SULEEMAN NAQBOYTITTE

¹⁴ YALLI, Hadad deqsita numuy Edom dardaarah mare luk yenehiyya Suleemanak naqboyta abe.

^15-16 Ah takkeemik naharal Dawud Edom marak qeebil yeyse saaku, kay qaskarak-abbah-yen-Yowab rabe-mara yaaguqe'gidih, wokke gexeh yen. Too saaku kaa kee kay mara Edom rasul laca alsa sugeeniih; sugga 'yaanam fan Edom rasul labhak sugga 'tem selli heen.

¹⁷ Takkay immay Hadad kee kay abbah gubal taamitta abbobtiy saaboh raqtehiyyak tu takkem Masri fan kudde. Too saaku Hadad qunxa awkah yeneeh ken lih gexe.

¹⁸ Miidiyan rasu cabeenih Faaran rasu fan gexen. Tokkel wakalih sinam geen. Ken kee too maraa, wokkek Masri fan gexeeniih, Masri gufen waqdi Masri-malikil yemeeten. Masri-malik, Hadadah baaxo yeceeh, buxah elle gacuh qari kaah yecee. Yakamu waa maaqo kaadu kaah yecee.

¹⁹ Masri-malik kaxxam kaa yikcineeh, digibih isi barrah maqanxá kaah abe. Isi barray Tacfancis deqsittahiyyah maqanxá rihimih kaah abe.

²⁰ Tacfancis-maqanxá lab-baxa kaah xalte. Woo baxi migaaqah Genubat deqsitak yen. Malik-barra too awka malik-buxal isi xaylo luk teynebe.

²¹ Hadad, Malik-Dawud kee Yowab rabtem yoobbe waqdi, Masri-malikik, «Ahaysa anu inni baaxoh aduuru waa» iyye.

²² Malikiiy, «Kee macaa! Akkel maca wayteeh isi baaxo akah gexxam macaa?» kaak iyye. Hadad kaal gacseemih, «Anu bas, innih gexam faxa ikkalah, weem mayyu» kaak iyye. Sarrak isi baaxo fan tonnal yuduure.

²³ Yalli kaadu Elyadaq baxa Radon, Suleemanak naqboyta abe. Radon lih taamitak yen malikiy Hadad-Qeder deqsitahiyyak kudeh gexe. Hadad-Qeder Xooba deqsita rasih malikik ten.

²⁴ Sarrak butta takke gaadileh abba yekke. Annah tanim tekkem, Dawud Hadad-Qeder qeebil yeyseeh kay qaxat yen Suuriyah mara selek sarrak ten. Radon kee kay mara gexxeeh, Damaskoh magaalal gacen. Tokkel, kay mari Suuriyah-malik kaa abe.

²⁵ Too num Israayil mara yinqibeeh, Suleeman rabba 'yam fanah naqboytah kaak sugeeh; Hadad innah kaa taqbisak yen.

²⁶ Tohuk kalah kaadu, Nabát-Yarobqam deqsita numuy kay gubal doolat taamat yenehiyya kaadu Suleemanak naqboyta yekke. Yarobqam Efrayim kedoh aabakuk yeneeh; elle catem, Dareeda deqsitta magaalak ten. Kay ina Xaruqa deqsitak teneeh; gubnah ten.

YALLI YAROBQAMAH XAGANA CULE

²⁷ Suleeman kee too numih fanih umaane naharak elle uguttem annak ten. Suleeman Yarusalaam magaalak ayrô-mawqa le kabut raqta exxa fayyak ramma cabsiisa'gidih, bullaaqek kibakaay magaalat maroh tan gasok tiddigille exxaaxi elle bicsiisak suge'kkel,

²⁸ Yarobqam furraynuy taamak taqabe sinnih sinaamak addak inti edde raddahiyya kinnim yuble. Too waqdi Manasse kee Efrayim kedoh rasul, tamsissa haan marak inkih abba kaa abe.

^29-30 Ayrok teena Yarobqam, Yarusalaam magaalaak gersi arac fan gexak suge waqdi, Aciiya deqsita nabi dibuk yan gital kaat garaye. Aciiya, Siila deqsitta magaalah numuk yeneeh; qusba-sartan xagarat luk suge. Ta nabi xagarat luk suge sartan isik kalla heeh taban kee namma ikkel qanxise.

³¹ Too waqdi Yarobqamak iyyeemih, «YALLAY Israayil doore Dageltah yani, ‹Suleeman le dardaarinna kaak beeyyooh, usuk amok akak suge kedok tabna af koh akak aceeyyo› kok iyye» 'yaanam kaak iyye. Sarrak, «Away a saroy qanxisehiyyak tabna af gabat bet» kaak iyye.

³² Sarrak kaadu qagissa heeh, kaak iyyeemih, «Yalli iyyemii, ‹Dawuduy yi naqasuh yenehiyya kee, Yarusalaam magaalay inkih tan Israayil addak inni magaala abehiyyah taagah, Suleemanah inki kedo cabeyyo.

³³ Toh kaal akah baahu waam, Suleeman yoo cinna heeh gersi baaxoh mari yaqbude duyye yaqbudem baaheeh; yoo yaqbudem cabba hee. Qastarot deqsittaamay Saydâ marih say yalla axcuk too mari yi aftok yaqbudehiyya kee, Mooyab mari yaqbude Kamos deqsittaamay Mooyab mari kaadu yallah lehiyya kee, Milkom akak iyyaanamay Qammon mari yallah lehiyya yaqbudeemit gace. Kay abba Dawud yi gita katayak yeneeh, anu oobise xinto kee amri oggolak sugeh immay, usuk oggolaanam cineh. Suleeman yi gita cabba heeh ceele waytut ase.

³⁴ Tonna'mmay, tohuh, luk suge reedak inkitanuuk kaa moobisaay, yanim fanah luk suge dardaarinnih qarkaytol yanay kaa axceyyo. Toh akah abu waam, kay maqaane hinna'mmay, yi naqasuh yen Dawuduy anu doorey anu amrisem abak yeneeh, anu oobise xintol tanim kee anu aba axcem duudusak yenehiyyah taaga.

³⁵ Takkay immay Suleemanak raaqu waa baxak dardaarinna beyya heeh, taban takke kedoh abbootan koh akak aceeyyo.

³⁶ Yoo elle yaqbudoonuh anu innih doore Yarusalaam magaalal, sarrî dabaanal Dawud ramadak numuk teeni abba yakke'gidih, Suleeman baxah inki kedo cabeyyo.

³⁷ Yarobqamow! Koo Israayil malik abeyyooh, isih faxxa hayte rasul inkih abba koo abeyyo.

³⁸ Yi naqasuh yen Dawud akah abak suge innah, anu kok aba axceemik tu cabe'kal duudusseeh, anu oobise xinto aba intam abteeh, anu koo akah amrisam abak, yi garil cakkik tan taamat ase koo tekkek, kulli way ku qaxat gaceyyo. Israayil malik koo abeyyooh, Dawuduh akah abe innah, ku lakal kok radu waa marak numuk teena reediseyyo.

³⁹ Suleeman abe dambih, Dawuduk radu waa mara digaaleyyo. Takkay immay amurruqe wayta digaalah ken madigaala› » 'yaanam too nabi kaak iyye.

⁴⁰ Toh yoobbe waqdi, Suleeman Yarobqam qidam faxeeh; takkay immay Masri malikiy migaaqah Sisak deqsitak yenehiyya fan kaak aleelite. Suleeman rabba 'yam fan tokkel suge.

SULEEMANAL YALLIH CAKKI YEMEETE.

⁴¹ Taway edde yabba inneemik kalihimiy Suleeman abba heehiyya kee, kay mano elle tene'nnaay, usuk kasak luk yeneh gideh agantah, ‹Suleeman Aydaada› deqsita buukul geytinta.

⁴² Suleeman morootom sanatih gide inkih yan Israayilil malikih suge.

⁴³ Tohuk lakal rabeeh Yarusalaamal Dawud-Magaala deqsita caafatal kaa yoogoqen. Kay baxay Racabqam deqsitahiyya kay lakal malik yekke.