1 Malikwa 10 - NABUWWA KEE MALIKWA

SABA DEQSITTA BAAXOH MALIKÁ SULEEMANAL TEMEETE

¹ Saba deqsitta baaxoh maliká, Suleeman le migaq-gexxo toobbe waqdi, kinni num kaak tabaluuy, gibdi esseroorak mangom kaa essertuh, kaa fan gexxe.

² Mango mara wakalih is lih hayyaay, gaalal caxâ-sifaay bilqah haan xeetiy limo gibdihiyya kee, kaxxam mango dahabak eerra hayteh gexxe. Usuk elle yan Yarusalaam fan temeete waqdi, kaa essertam faxak sugte esseroy niyat luk sugtehiyya kaa esserteh.

³ Too esseroy is kaa essertehiyya tiya-tiyah teetih gacse. Usuk gacsa akah waa esserok masuginna.

⁴ Too waqdi Sabâ-Maliká, Suleeman kas tubleeh; usuk xise qariiy,

⁵ miizil heenih yanin kay maaqooy, kay doolat abbobti elle daffeyta gurraay, kay buxal kay taamat yan mari missal elle soola inna kee, kay taamah mari edde yan sartan tubleh. Usuk yakme way elle-yaaqube kobbaayiy-kaah-baaha-mari elle yani'nna kee, YALLIH Qibaadah-Qaril abah yan sadgataay; tah inkih tuble waqdi qagabsitteh hagga-inte.

⁶ Too waqdi Suleemanak intemii, «Anu inni baaxoh addal atu abba haytem kee lito kasak mangom oobbeh; oobba heem inkih numma kinnim away ableh an.

⁷ Atu lito midir kee kas elle oobbe'nnak fula lem, away ableh an. Awayaay kinni, sahda yoh warissem ahak garaba. Taway inni namma intih ubulla haam fanah, ku giddinaamak sinam yoh warissem innih numma akkaluk masuginniyo. Kas kee midirih bagi cubbi oobbeemik fula litoh tan.

⁸ Ku mari maxaqan le nasiib geeh yan! Ko'lih taamita mari kamba nasiib leh yan. Kulli way ko'lih yaniiniih ku afak tawqe tuxxiq le maxco yaabbeenih.

⁹ YALLAY ku Dagelta kinni fayla taafay. Yalli isi mara xiinisa malikih koo doore waqdi, kot ruffa iyyem yuybulleeh. Toh akah abem, isi ummatta Israayil kulli way kicnaamih taagah, atu qadli kee cakkit ken xiinissa'gidi» inte.

¹⁰ Is sarrak Malik Suleemanah gabat bahte mattaco kaah teceeh; affara alfih kiilo yakke dahabaay, mango caxâ-sifa kee bilqah haan xeetiy limo gibdihiyya kaah tecee. Caxâ-sifa, kaxxam mango caxâ-sifay ahaydumah Yarusalaam baaxol numuh antacawwime wayteh teneeh sarrah antacawwime waytehiyya.

¹¹ Curam maraakibit taamita mari, Oofir deqsita rasuk dahab kaah baahen. Too mari tohuk kalah duyyê-xisoh meqe mango coox kee bilqah haan xeetiy limo gibdihiyya baahen.

¹² Suleeman too coox YALLIH Qibaadah-Qari kee isi qarit hayu waa gutqeyna hee. Gad abeenitih kaadu *begena kee kirar akak bicsaana'gidih hee. Too xaqan le coox Israayil baaxo baaheenih masuginnon. Sarrah baahak maraaqinnon.

¹³ Malik Suleeman Sabâ-Malikáh is le kabuk mango mattaco yecee. Toh lih kaadu kaa esserra haytem inkih teetih yecee. Sarrak tet kee tet lih yemeete mari isi baaxoy akak yemeetehiyyah fanah yuduuren.

SULEEMAN LUK SUGE MIDIRI

¹⁴ Malik Suleemanah kulli sanatal dahabak labaatanna kee sidiica alfih kiilo takkem baahak yenen.

¹⁵ Tohuk kalah kaadu, duyyê-xaamak beya qusuur kee tellemmô-mari yecee qusuur kee, Qarab baaxoh malikwa tecee gabbara kee, tonnah kaadu, Israayil-rasul tan rakaakay-abbobti tecee gabbara geyak yen.

¹⁶ Suleeman kaxxam naba goobwak namma bool takkem galbabbaqisen dahabak bicseeh, kulli gob malciina kiilo yakke dahabak bicse.

¹⁷ Wohuk kalah kaadu, qunxa goobwak sidooca boolih gide takkem galbabbaqisen dahabak bicse. Too sidooca boolih goobwak kulli gob namma kiilo yakke dahabak bicse. Too goobwa inkih elle abbaxuk yenem, ‹Lubnaan Garboh Kaxxa Goli› deqsita aracih addak ten.

¹⁸ Tohuk kalah kaxxam naba dardaarinni-korsi luk yen. Woo korsi dakni-qaagak bicseenih, agle sinni dahabak exfen.

^19-20 Suleeman woo korsil gacam faxa waqdi, naharak laca maaqatta takke mawqeenak elle awaquk yen. Too mawqeena namma kabut inkih, lubak ceeloy gabak bicseenihiyyak leceey-leceey luk ten. Tittat taban kee namma lubaakih ceelo akkuk ten. Korsik-darre abur-moyyah innal ten. Too korsi namma gaba elle haan arac luk sugteeh, teetik namma tattabak lubak ceelo ten. Tonnah tanim, kalah tan doolatih dardaarinnih-korsil ahaydumal mabicsinnon.

²¹ Malik Suleeman elle yaaqube kobbaayiy inkih dahabak ten. «Lubnaan Garboh kaxxa Goli» deqsita aracih addal ten mingilwa kaadu akak bicseenim saafik yan dahabak ten. Suleeman dabaanal lakqok bicsen duyye hebeltô-tu'xiq luk mananna. Tonna-leemik kay buxal lakqok bicsen duyye masuginna.

²² Badal gexa maraakibik butta luk yen. Kay maraakib Curam maraakib lih gexak yen. Too maraakibit yan mari sidooca sanatal inki adda dahab kee lakqooy dakni-qaag kee wagaqwa kee qaxa le kaxxa kimbir eerra heenih baahak yenen.

²³ Gaddaliino kee kasah Malik Suleeman innah yan malik baadal mananna.

²⁴ Baadal tan ummatta, Yalli kaah yecee kas kaak raqsitaanam faxak yenen.

²⁵ Kaa fan amaatinnaan num mattacoh gabat dahab kee lakqok bicsen duyyeey, xer-sarooy, silacaay, caxâ-sifaay, faaris kee baakil kaah baahak yenen. Kulli sanatal kaal yamaate mari taham abak suge.

²⁶ Suleeman alfi kee affara bool takke gaariiray faaris beyta kee, taban kee namma alfih farasay qeebi abtahiyya gaabossa hee. Tohuk tu takkem Yarusalaamal abbaxuk yeneeh; wohuk kalihim mango magaaloolil kaak ten.

²⁷ Suleeman dabaanal lakqo xeet manga luk teneeh; sariidâ coox kaadu, mango-koomaami le baaxol tan *sublah innah qadad cabeh yen.

²⁸ Malik afak yen mari faariisa akak xaamak yenem, Masri baaxo kee Kiiwu deqsita aracak ten.

²⁹ Faaris-gaariira kaadu Masrik baahak yenen. Inki gaari lica boolih garsih keenik xaamakaay, faras kaadu bool kee kontom garsih keenik xaamak yenen. A mari sarrak, Ciita kee Suuriyah malikwal inkih, a duyye aylammuk yenen.