1 Malikwa 1 - NABUWWA KEE MALIKWA

DAWUD IDOOLINNA

¹ Malik Dawud kaxxam bar yembeeh idoolinni kaat yemeete saaku, xagar kaak waacitak yeneeh, sara kaal haanamah kaah xiqtam luk mananna.

² Toh yublen waqdi, kay gubal taamitak yen mari kaak iyyemii, «Gexxa inneh baxuwwâ-baxay bikrit taniih amo kok wagittaah garit kok gactaah qaxah gacca 'teh xagar kok waacite kaltahiyya koh gorrisnu wayna» kaak iyyen.

³ Toh kaak inxicca 'yeeniih, sarrak inkih yan Israayil rasul qax-meqe baxuwwah goranat gacen. Qaxah oson faxan inna le baxuwwa Suunem deqsita aracal geen. Geen awká migaaqah Abiisag deqsitak ten. Malik fan tet baahen.

⁴ Awká nabam qax-muquk teneeh; malik garik gexak manannay, amo kaak wagitak ten. Takkay immay usuk fido teetit faxeh mananna.

QADOONA MALIK YAKKEM FAXE

^5-6 Dawud xaylok Absalaam ciggiltam, ina akak Caggit deqsitta barrah baxay Qadoona deqsitahiyyak ten. Qadoona kaxxa qax-maqaane luk yen. Kay abba usuk faxem abaamah, kaa assacakkuk mananna. Qadoona malik yakkem faxak yen. Tohuk gexxaamah faras-gaari kee mango faariisa kee kontom numuy dacayrih kaat gactu waytahiyya naharal elle bical haysiteh yen.

⁷ Mala Yowab kee Sek-Abiyataaral baaheeh, keenik iyyeemih, «Ahaysa malik anu akkem faxak, maca siinit celtaa?» iyye. Oson too mala yoobben waqdi kaak raabiteenih, «Faxxaamah ku xaqut nan» iyyen. Yowab-ina Xaruya deqsitta barrak ten.

⁸ Sek-Saaduk kee Yoyadáq-Banaaya kee Nabi-Naatan kee Simqi kee Reeqi kee Dawudut dacayrih ten qaskar a malat kaa'lih mananna.

⁹ Ayrok teena Qadoona, Qenrogel deqsita buyyih garil yen xaay Docelet deqsitahiyyal illiiy awurwa kee, nagay mulkuqusen rugaage sadgatah qide. Too sadgatah Suleemanak kalih tooboko kee, malik gubal taamita maray Yuudâ-rasuk yemeetehiyyah inkih seece.

¹⁰ Takkay immay nabi-Naatan kee Banaaya kee, malikit dacayrih ten qaskar kee, toobokoytah yen Suleemanah woo sadgatah maseecinnaay ken cabeh.

SULEEMAN MALIK YEKKE

¹¹ Toh yuble waqdi, Nabi Naatan, Suleeman inay migaaqah Batsabaq deqsittahiyya fan gexeh, teetik iyyeemih, «Qadoona, Malik Dawud aabbe'kal, isih malik is abem maabbitoo?» teetik iyye.

¹² «Taway is kee isi baxih rooci cattam faxxek, koo fayisu waa!

¹³ Ta waqdiik Malik Dawud fan gexxa xicay, ‹Yi malikow, yi lakal malik takku waytam ku baxa Suleeman, 'yaanamih qahdi yoh culte way, Qadoona malik elle yekkem manna?› kaak inxic.

¹⁴ Too waqdi atu too yaabat anih, anu amaateyyooh, atu intam numma kinnim kaah warseyyo» teetik iyye.

¹⁵ Too fayu kaak oggolteeh, malik fan gexxeh, xinti qari kaal culte. Too waqdi Malik Dawud kaxxam idooliteh yeneh; Suunem rasuk baahen Abiisag deqsita qax-meqe baxuwwa amo kaak wagitak kay garil sugte.

¹⁶ Batsabaq kay massakaxxah qununna 'te. Too waqdi malik, «Maca faxak temeete?» teetik iyye.

¹⁷ Is kaak inteemih, «Yi malikow, yi baxi ku lakal malik akkeleemih YALLAY ku Dagelta kinnihiyyah migaaqal xagana yoh culteh sugte.

¹⁸ Takkay immay Qadoona, atu aaxige'kal, away malik yekke.

¹⁹ Sadgatah awurwa kee nagay mulkuqusen rugaage kee mango illi qide. Too sadgatah ku xaylooy, sek Abiyataar kee qaskar abbah yan Yowabah seeceh immay, ku Suleemanah maseecinna.

²⁰ Malikow, Israayil mari yakkeenimiik atu isi lakal malik abtu wayta num ken taysixxigem kok faxan.

²¹ Ahat yaabe'kal Yallih amri kol yemeetek, yoo kee yi baxak umeyniti axceloonuuh; toh nel matamqa» axcuk,

²² too yaabat tan waqdi nabi Naatan yemeeteh.

²³ Malik Dawuduh nabi Naatan yemeetem warseeniih; Naatan addah kaal cule. Malik foocal kay massakaxxah qununna 'yeeh; sarrakaa,

²⁴ «Yi malikow, ‹Yi lakal malik takku waytam Qadoona› 'yaanam maay intee?» iyye. Sarrak kaadu qagseh iyyeemih,

²⁵ «Ta saakih ayro sadgatah awurwa kee nagay mulkuqusen rugaage kee mango illi qideeh, too sadgatah ku xayloh inkih seece. Qaskar abbah yan Yowab kee sek Abiyataarah edde seece. Too mari taway too sadgatih makum kee maqubut kaa'lih yaniih, ‹Malik Qadoona ani haay! Malik Qadoona ani haay!› axcuk yanin.

²⁶ Sadgatah yoo kee sek Saaduk kee Banaaya kee Suleemanah maseecinna.

²⁷ Hay, ku lakal malik yakku waa num, neey ku gubal taamitahiyyah warse'kal, aham takkay intem koo innaa?» iyye.

²⁸ Toh yoobbe waqdi Malik Dawud, «Gexay Batsabaqak uduuray addah cula inxica» iyye. Is temeete waqdi,

^29-30 teetik iyyemii, «Ku baxi Suleeman yi lakal malik akkeleemih, YALLAY Israayil doore Dagelta kinnihiyyah migaaqal abe xiiba, a saaku duuduseyyoomuh, YALLAY waaraah kulli gadaamak yoo yeyyeeqehiyyah migaaqal koh xiibita» teetik iyye.

³¹ Too waqdi Batsabaq kay massakaxxah qununna 'te. Sarrak, «Yi amoytih qumri yaxxeeray» kaak inte.

³² Tohuk lakal Malik Dawud, «Sek Saaduk kee nabi Naatan kee Yoyadáq-Banaaya yoh seeca» iyye. Too mari kaal yemeete waqdi,

³³ keenik iyyemii, «Cokmi abbobti isinni lih hayya haay, yi Suleeman yi bakilit korissi haay Gicoon buyyi fan kaa beya.

³⁴ Tokkel isin sek Saaduk kee nabi Naatanak, Israayil malik yakke'gidih, kaa uskuta. Tohuk gaba kaltan waqdi, *baanta uguraay anay fayya haay, ‹Malik Suleeman ani haay! Malik Suleeman ani haay!› inxica.

³⁵ Akke yi dardaarinnih korsil daffeya'gidih yamaate waqdi, kay lakat ama. Yi lakal malik takku waytam kaa. Israayil kee Yuudah ummattak malik yakke'gidih doorem kaa» iyye.

³⁶ Yoyadáq-Banaaya iyyeemih, «Yi malikow, atu intem abennok, YALLAY ku Dagelta kinni edde yangalay!

³⁷ YALLAY ko'lih sugehiyya kaadu Suleeman lih gacay. YALLI kay dardaarinni ku dardaarinnak kinni-way nabnah yaysiisay» iyye.

³⁸ Tohuk lakal sek Saaduk kee nabi Naatan kee Yoyadáq-Banaaya kee, Dawudut dacayrih tan qaskar, Suleeman Malik Dawud bakilil hayya heenih, isinnih lakat kaak gacca 'yeenih, Gicoon buyyi fan kaa been.

³⁹ Tokkel, Sek Saaduk, Yallih Nabnah-Siraqih addak mingilil baahe caxâ xaylok bicsen *zeytit (saliidit) malik yakke'gidih, Suleeman yuskute. Sarrak baanta yoogoreeniih, too waqdi tokkel suggu 'ye mari inkih anay fayya haak, «Malik Suleeman ani haay! Malik Suleeman ani haay!» iyyen.

⁴⁰ Tohuk lakal yakkeenimiik lakak kaa katayak, qililisakaay fooxima fooxisak, baaxo edde engeyya 'ta farcih africuk, Yarusalaam fan yuduuren.

⁴¹ Qadoona kee kay mara maaqok gaba elle kalte ikkel, a xongolo keenil radde. Yowab baantah anay yoobbeeh, «Sugay, a gideh xongolo magaalal akah raddam macaa?» iyyeh esserak suge waqdi,

⁴² Sek Abiyataar baxi Yonaatan yemeete. Qadoona kaa yuble waqdi, «Adda culey, meqe num kinnitooh meqe xaagu bahte kook» iyye.

⁴³ Yonaatan iyyemii, «Ee, meqe xaaguh baaham mayyu. Malik-Dawud Suleeman malik abeeh,

⁴⁴ Sek Saaduk kee nabi Naatan kee Yoyadáq-Banaaya kee kaat dacayrih tan qaskarak, ‹Kaa katayaay, Suleeman yi bakilih amol hay beya› iyye.

⁴⁵ Saaduk kee Naatanak, ‹Isin Gicoon buyyih garil kaa uskuta› 'yaanam iyye. Tohuk gaba kalen waqdi, too mari wallitakaay kayyiqtu edde haak magaala yemeeteenih; away aabbuk sugteenim too xongolo.

⁴⁶ Suleeman malik yekkeeh, away dardaarinni-korsil daffeya.

⁴⁷ Wohoysa kaadu doolat-abbobti Malik Dawud fan gexxeeh; too mari, ‹Ku Dagelti, Suleemanah kok tayse migaq-gexxo kee midir yacaay› kaak iyyen. Too waqdi Malik Dawud isi qarkaytoh amook, Yallih nabnah massakaxxah qununna 'yeh,

⁴⁸ sarrak dooqa abe. Dooqah iyyemii, ‹YALLAY Israayil doore Dagelta kinni faylisnay. Kaay anu addunyâ-bagul anih, yi sammok yooboke yi baxa yi lakal malik akkih abali yoo heehiyyah fayla taafay› 'yaanam iyye» keenik iyye.

⁴⁹ Toh yoobben waqdi, Qadoonah-sadgatah yemeeteh suge mari meysiteeh, yakkeenimiik ugutta 'yeenih, mariiy isi qaxal keenik gexe.

⁵⁰ Qadoona Suleemanak abeh yan meysik gexxaamah, Yallih Nabnah-Siraq fan gexxa 'yeeh, sadgat elle aban aracak affara ruknil tan gaysoosi gabah xabba hee.

⁵¹ Sarrak Malik Suleeman, Qadoona kay meysih too aracak gaysoosit kafimih yanih, «Malik Suleeman yoo qide waamah, yoh xiibite ikkal takkek mawqa» iyye 'yaanam yoobbe.

⁵² Too waqdi Suleeman iyyeemih, «Yaaminen num yekkek, gabah kaa xagtam matan. Yaaminen num akke week, rabi kaak raq mali» iyye.

⁵³ Sarrak Qadoona fan sinam ruubeeh, woo mari too aracak kaa kaleh. Qadoona Suleeman fan yemeete waqdi, massakaxxah qununna kaah iyye. Too waqdi malik kaak iyyeemih, «Ahaysa isi buxah gexxaasit» iyye.