1 Aydaad 5 - NABUWWA KEE MALIKWA

RUUBENIK RADE MARA

¹ Israayilik naharsi-baxi Ruuben deqsitak yen. Naharsi-baxi kaa'mmay, isi abbah barrat fido faxeemih sabbatah, naharsi-saqoolinna Yuusuf deqsite baxa kee kay xayloh tontocowweh ten. Tonna leemiik, Ruuben Israayilik naharsi-baxa loowimak mananna.

² Yuuda, toobokoh addal muxxo le numuk teneeh, dardaarinna le num kaak rade'mmay, naharsi-saqoolinna nagartem, Yuusufuk ten.

³ Israayilik naharsi-baxi Ruuben xale lab-xaylo, Canok kee Fallu kee Cesram kee Karmi deqsitak yenen.

⁴ Ayyuqel Samaqya xaleeh, Samaqyaay Goog xaleeh, Googuuy Simqi xaleeh,

⁵ Simqiiy Miika xaleeh, Miikaay Rayya xaleeh, Rayyaay Baqal xaleeh,

⁶ Baqalaay Beera xale. Beeraay Ruubenik rade marak saqalah yen numuuy; Tiglat-Fileeser deqsita numuy Assuuriyak malikih yenehiyya seewah kaa bee.

⁷ Ruubenik nasab elle yan kitaabal tunkuttube gulubuk abbobtih migooqa ah teeti: Yaqiiyal kee Zakariyya kee

⁸ Qadád-Belaq. Belaqak kaxxa-abba Samaq deqsite numuy Ayyuqel marak radek ten. Ta mari elle gacem, Qarooqer deqsita aracak xabba haanamaay Nabo kee Baqal-Maqon deqsitta aroocah amma 'yaanam takke baaxo.

⁹ Woo mari mango midir luk sugeemih sabbatah, Gilqad deqsitta baaxok ayrô-mawqa le kabul raqta bakarroytah tan baaxo amma 'yaanam fan elle gacen. Too bakarroytah tan baaxo Fuurat weeqaytu fan gufta.

¹⁰ Saawul dardaarak yen dabaanal, Ruubenik rade mari, Hagrih-yooboke-marat qeebi abeeh; ken qideenih, ken baaxoy Gilqad deqsita rasuk ayrô-mawqa le kabul geytimtahiyyal gacen.

GAADAK RADE MARA

¹¹ Gaad deqsitta kedo, Basan deqsitta baaxoy Salka deqsita aracah amma 'yaanam fan elle gacen. Too baaxo Ruuben-mari elle suge rasuk garit ten.

¹² Ayyuqel deqsita num ken kedoh abbah yeneeh; kaak gubal tenem, Safam deqsita numu. Wohuk kalah kaadu Yaqnay kee Saafat deqsita mari, kedoh abbobtih yenen.

¹³ Gaad deqsitta kedok raqte exxaaxih abbobti malciin tekkeeh; migaaqah Mikaayil kee Masullam kee Seeba kee Yooray kee Yaqkan kee Diqa kee Qeebar deqsitak yenen.

¹⁴ A mari inkih Cuurí-Abicayil deqsita numuk rade. Cuuri Yarowac deqsita numih baxaay, Yarowac Gilqad baxaay, Gilqad Mikaayil baxaay, Mikaayil Yasiisay baxaay, Yasiisay Yacdô baxaay, Yacdo Buux baxak ten.

¹⁵ Qabdiyél-Aci too marak abbah yen. Aci kaxxa-abba Guuna deqsitak yen.

¹⁶ Gaad deqsitta kedo elle sugtem, Gilqad kee Basan kee too rasuk dariifal tan baaxo kee, inkih tan Saron deqsitta baaxoy saq elle yaloolehiyya.

¹⁷ A marih migooqa kitaabal elle tunkuttube wakti, Yootam Yuudâ-malikih yen daban kee Yarobqam Israayil-malikih yen dabaana.

AYRÔ-MAWQA LE KABUT RAQTE KEDOODAH QASKARA

¹⁸ Ruuben kedo kee Gaad kedoh yooboke mara kee, Manassê-kedoh yooboke marak garabak tittat, morootom kee affara alfi kee malcina bool kee lactam qaskariitay gob kee seef kee gayse kee gaysê-baxat qeebi elle aban innah baritto nagay lehiyya luk yen.

¹⁹ Osonuuy Hagrih-yooboke-mara kee, Yatuur kee Nafis kee Noodabak rade marat qeebi aben.

²⁰ Too qeebih addat, «Nee cat» axcuk Yallal weeqen waqdi, Yalli ken cateh, Hagrih-yooboke-mara kee carbil ken catak yen marak qeebil ken yiysiiseh. Yallal aaminuk yeneenimih sabbatah, usuk ken kallaci yoobbe.

^21-22 Yalli, Hagrih yooboke mari a qeebil gacam looweh yeneemih sabbatah, keenik mango mara qeebih addat qideeniih; luk suggu 'yeenim dannabah keenik been. Dannabah beenim gaalak kontom alfi kee, illik namma bool kee kontom alfi kee, danoonak namma alfi. Tohuk kalah kaadu, sahdak bool alfi seewah been. Tohuk lakal Ruuben kee Gaad kee ayrô-mawqa le kabut raqta Manasseh kedoh yooboke mari ken baaxol gaceeniih; Assuuriyah mari seewah ken beyaanam fan tokkel sugen.

AYRÔ-MAWQA LE KABUT RAQTE MANASSEH KEDO

²³ Ayrô-mawqa le kabut raqte Manasseh kedoh yooboke mari manguk yeneeh; Basan deqsita rasuk Baqal Cermon kee Senir kee Cermon-qale deqsitta arooca amma 'yaanam fan elle sugen.

²⁴ Kedoh abbobti keenik migaaqah Qeefer kee Yisqi kee Alyel kee Qadriyel kee Ermiyaas kee Hodawya kee Yacadiyel deqsitak yenen. Oson inkih qande le qaskaray migaq-gexxo lehiyyak ten.

²⁵ Takkay immay Yallay ken kaxxa abbobti aqbuduk tenehiyyal dambi lem baaheeniih; kaa cabba heenih; oson yamaateenik naharal, woo baaxol suge maray Yalli baysehiyya aqbuduk suge duyyeeya yuqbuden.

²⁶ Tonna leemiik Israayil doore Dagelti, Assuuriya deqsitta baaxoh malikiy Ful deqsitahiyyat ken baysaamih fayxi hee. Woo malik kaadu Tiglat-Fileeser deqsita migaaqal amixxiguk yen. Too waqdi Ruuben-kedo kee Gaad kedoh yooboke mara kee Manassê-kedoh yooboke marak garab seewah beenih, Calac kee Cabor kee Haara kee Goodan deqsita weeqayti garil tan baaxol ken gacsen. A saaku fanah tokkel yanin.