1 Aydaad 4 - NABUWWA KEE MALIKWA

YUUDAK RADE MARA

¹ Fares kee Cesramaay, Karmi kee Cuur kee Sobal, Yuudak rade marak ten.

² Sobal Rayya xale. Rayya Yacat xaleeh, Yacat Acuumay kee Lahad xale. Xorqa deqsita gulub keenik rade.

³ Qetam lab-xaylo, Yidraqel kee Yisma kee Yidbas deqsitak yeneeniih; maqanxá keenik Haxxalfooni deqsitak ten.

⁴ Gadorik abba Fanyel deqsitak yen. Cuusak abba Qader deqsitak yen. A mari Cuuruk rade maraay; Cuur, Efrata xalte naharsi-baxay Beetlacamak abbah yenehiyyak ten.

⁵ Takooqah-abbah yen Ascur, Cela kee Naqra deqsitta namma barra luk yen.

⁶ Naqra kaah xaltem, Acuddam kee Ceefaraay, Temni kee Hacastari.

⁷ Cela kaah xaltem, Xeret kee Xocar kee Etnan deqsitta lab-xaylo.

⁸ Koox deqsita num Qanub kee Xobeeba xaleeh; kaadu Harúm-Acarcelik radde gulubwak kaxxa abbah yen.

⁹ Yaabex deqsita num isi toobokok fula le massakaxxa gee numuk teneeh; kay ina migaaqah Yaabex akah intem, kaa xalte waqdi uma'nnah tet biyaakisak yen.

¹⁰ Yaabex dooqa abeh iyyemii, «Israayil doore Dageltaw, barkat yot haay baaxo farakka yoh hayis! Ku gabat umaane kee biyaakak yoo cateey» 'yaanamah dooqa abe. Yalli kaadu usuk kaa akah kallacem abe.

¹¹ Sucak toobokoytah yen Kalub Macir xaleeh, Macir Eston xale.

¹² Eston Beet-Raafa kee Faseeyac kee Tacinna xale. Tacinna Qirnacas xale. A mari inkih Reekâ-magaalal daffeyak yen.

¹³ Kenad, Qotniyel kee Seraaya xale. Qotniyeliiy Catat kee Maqonootay xale.

¹⁴ Maqonootay Qofra xale. Seraaya Yowab xale. Yowaabaay Gabâ-naggarinna deqsitta golol yan marak abbah suge. Gabâ-naggarinna nagay yaaxige mari too aracal daffeyak yen.

¹⁵ Yafunné-Kaalib lab-xaylok sidoc xaleeh; Qiru kee Eela kee Naqam deqsitak yenen. Eelaay Kanad xale.

¹⁶ Yacalalel xalem, Diif kee Diifa kee Tirya kee Asareli.

^17-18 Qedra xale lab-xaylo, Yeter kee Mared kee Qeefer kee Yaalon deqsitak yenen. Mared Masri-malikih-baxáy Bitya deqsittal digibe. Is Miriyam kee Sammay kee Yisba kaah xalte. Yisba Estamowaqak abbah yen. Mared kaadu Yuudah tooboke barra luk yen. Is Gadorak abbah yen Yered kee, Sookok abbah yen Ceebar kee, Danowacak abbah yen Yakutyel kaah xalte.

¹⁹ Hoodiya, Nacam-maqanxál digibe. Keenik rade mari, Garmi deqsita gulubuy Kaqiila deqsita aracal daffeyak yenehiyya kee, Maqka deqsita gulubuy Estamowaqal daffeyak yenehiyya.

²⁰ Simon xale lab-xaylo, Amnon kee Rinna kee Bencanan kee Tiilon deqsitak ten. Yisqi deqsita num, Doocet kee Bendocet xale.

²¹ Yuudâ-baxi Saalecik rade mari ah keeni. Leekak abbah yen numuy Qeer deqsita kee, Mareesak abbah yen numuy Laqda deqsitahiyya kee, *baftak bicsen meqe sartan elle bicsan innih ixxiga le maray Beet-Asbeqa deqsita aracal elle taamitaanahiyya.

²² Saalecik raddem kaadu, Yookim deqsita num kee, Kodeeba deqsita aracal daffeya maraay, wohuk kalah kaadu, Yooqas kee Saraaf deqsitta namma numuy Mooyaabah yooboke agabu abitte. Sarra Beetlacamal gacen. Aham inkih dumî-dabaanal tunkuttube.

²³ A marak rade mari, Nataqim kee Gadeerot deqsitta magaaloolil gaceeniih; malikih taamitak, buutitte bicisak yen marak ten.

SIMQAANAK RADE MARA

²⁴ Simqaan xale lab-xaylo, Namwil kee Yaaminiiy, Yaarib kee Dara kee Saawul deqsitak yenen.

²⁵ Saawuluuy Sallum xaleeh, Sallumuuy Mibsam xaleeh, Mibsamaay Mismaq xale.

²⁶ Mismaqaay Cammuwel xale; Cammuweliiy Dakkur xale; Dakkuruuy Simqi xale.

²⁷ Simqi lab-xaylok taban kee lecey xaleeh; say-xaylok kaadu lecey xale. Takkay immay kay tooboko mango xaylo maxalinna. Tonna leemiik Simqaanak rade mari, Yuudak rade marak daguk yen.

^28-31 Dawud dardaare waktik duma, Simqaanak rade mari elle gacem, Bersabaq kee Moladaay, Caxar-Suqal kee Bilhaay, Qexem kee Tooladaay Betwel kee Cormaay, Xiklag kee Beet-Markabotuuy, Haxar-Susim kee Beet-Biri kee Saqrayim deqsitta magaalooli.

³² Wohuk kalah kaadu elle gaceenim, Qetam kee Qayiniiy Rimmon kee Tooken kee Qasan deqsitta koona magaala kee,

³³ too magaaloolik dariifal sugte gaandoodi Baqalat deqsita aracah amma 'yaanam fan elle gaceenih yenen. Ken baaxo too gideey; kaadu akak raden marih migaq keenik aktubuk yenen.

³⁴ Guluubah abbobtih migaq ah kaana. Masoobab kee Yamlek kee Amaxyá-Yoosa kee

³⁵ Ayyuqel kee Yosibyá-Yaahu. (Yaahuk kaxxa-abba Seraaya deqsitak yeneeh; kay abba Qasyeli.)

³⁶ Wohuk kalah kaadu, Elyoqeenay kee Yaqkoba kee Yasocaaya kee Qasaaya kee Qadiyel kee Yasimyel kee Banaaya kee,

³⁷ Sifqí-Diida, Semaqyâ gulubih abbah yen. (Sifqi Allon deqsita numih baxaay, Allon Yadaqyâ baxaay, Yadaqya Simri-baxaay, Simri Semaqyâ baxak ten.)

^38-39 Woo marak rade mari amagguk yemegge waqdi, Gador deqsitta magaala elle tan golok ayrô-mawqa le kabu raqta baaxoh amma 'yaanam fan, illi elle yaloole aracay qayso lehiyya gorrisak gexen.

⁴⁰ Too baaxo akadah (agdah) tan baaxoy meqe qayso luk sugtehiyyak ten. Baaxo kaadu kaxxa baaxoy amaan kee wagari lehiyyak ten. Duma Caamak rade mari too baaxol suge.

⁴¹ Ciskiyyaahu Yuudâ-malikih yen dabaanal, Simqaan-kedoh-abbobti too baaxo temeeteeh; Caamak rade maray isi siraaqat elle sugeenihiyyat qeebi aben. Maquunim deqsitak yen marat kaadu qeebi aben. A saaku fanah elle tablen innah, too mara inkih selli heen. Sarra too baaxo meqe qayso luk sugteemih sabbatah tokkel gacen.

⁴² Simqaanak rade marak koona boolih num kaadu, Edom rasuy qaleela lehiyya wararen. Keenik saqoltih tenem, Yisqi-xayloy Falatya kee Naqarya kee Rafaaya kee Quddiyeel deqsitta.

⁴³ Oson Qamaalekih yooboke maray too qaleela le baaxo fan kudehiyya inkih qideenih, a saaku fanah too baaxol elle yanin.