1 Aydaad 29 - NABUWWA KEE MALIKWA

UMMATTA TECEE MATTACO

¹ Malik Dawud inkih tan ummatak iyyeemih, «Yalli malikih siinih doorem, yi baxa Suleemana. Takkay immay usuk ahayduma qunxa numuuy; taama elle aban innih ixxiga mali. Away xisneh kaa qambaltam, malik-qari hinnaay, Dageltah yan YALLIH Qibaadah-Qari. Tonna-kinnuk mango taama faxxiimele.

² Qari-xisne kee, sarra Yallih qibaada elle aban saaku, faxxinta duyye naharal elle missoyseh cabah an. Toh maa duyyeey inteenik, faxximtam akak bicsaana'gidih, dahabaay lakqooy nacaasaay biriita kee yirgiqen coox cabah an. Tohuk kalah kaadu, limo gibdi xeetiiy, bilqah haan qaxmeqe xeetiy mango bisu lehiyya kee, qado-xeetik mangom cabah an.

³ Taham inkih ta Qibaadah-Qari bicsaana'gidih gaabossa heeh; tahak kalah kaadu, a Qibaadah-Qarih liyoh an kacanuk gexxaamah, inni buxal liyo dahab kee lakqo edde aceeh an.

⁴ Tohum, agle sinni dahabak bool alfih kiilok fula takkem eceeh, tonnah kaadu, saafik tan lakqok namma bool kee morootom alfih kiiloh gide ecee. Ta duyye akah eceem, Yallih Qibaadah-Qarih gidaar edde bilqisaana'gidiiy,

⁵ a Qibaadah-Qarih faxxinta mansafwa gabâ-naggaarinna le mari akak bicsa'gidi. Anu tah abek, taway ta qarih xisneh mattaco yaceem faxa mari siinik iyyaa?» iyye.

⁶ Malik Dawud toh keenik iyye waqdi, kedoh abbobti kee doolat kabuk kedoh abbobtih yan mara kee, alfi-alfi kee bool-boolul kurrunte qaskarak abbobtih yan mara kee, malik taamah abbobtih yan mari inkih, «Meqeh, aceenno» 'yaanam iyyen.

⁷ Too mari tittat yecee duyye; dahabak bool kee malcina-tabanih alfih kiilok fula takkem kee, lakqok kaadu sidooca bool kee morootom alfih kiilok fula takkem kee, nacaasak laca boolih alfi kee labaatanni kiilo takkem kee, biriitak kaadu sidiica malyoon kee affara alfih kiilok fula yeceen.

⁸ Limo gibdi xeet le mari kaadu too xeet mattacoh Qibaadâ-Qarih yecee. Sarra too qarih abbootan le Yaciyel deqsita numuy Gerson gulubut raaqehiyyah gabal yeceen.

⁹ Ummat isi fayxiik, num ken dirkise'kkal, mango duyye yeceeniih; mango duyye YALLAH tontocowweemih kaadu tassa iyyen. Malik Dawud tah yuble waqdi, kaadu ruffu iyye.

DAWUD ABE FAYLA KEE DOOQA

¹⁰ Tokkel inkih tan ummat elle gaabowte aracal Malik Dawud YALLA faylise. YALLIH faylah iyyeemih, «YALLAW, nanu akak radne Israayil doore Dageltaw, ku migaq kulli way fayla le.

¹¹ Qaran kee baaxol tanim inkih kuumu. Nabna leeh diifu lem kooy; qande kee nasri lem kooy; hayba dibuk lem koo. YALLAW, abbootan lem koo; kulliimik fula leeh daga raaqa dardar koo.

¹² Gaddaliino kee midir akak temeetem koo; mulki lem koo; kullim inkih isi cayla kee qandet xiinissa. Sahdaytu kaxxa num abtah, celem abtam koo.

¹³ Tonna leemiik, ni Dageltaw, candu koh gacisna. Ku migaaqay kulsa le faylisna.

¹⁴ «Yi Dageltaw, yoo kee yi mara a axxul le maqaane geynam caddik le mara hinnino. Acwah koh naceem mannuuy; linom, kok geyne ku maqaaney wadir koh gacisnahiyya.

¹⁵ YALLAW, ni kaxxa abbobtik kaxxih, addunyal nan way, marin baaxol baaxo-maleelah sugna. A saaku nanim cellaamah, sahdayti mano saakih iraawih gideey rabah yan mara kinnino.

¹⁶ YALLAW, ni Dageltaw, a saaku a gid takke duyye bahneeh, gaabosne. Akah bahnem, kooy *kudduusuk yanihiyyah migaaqih nabnah qari xisna'gidi. Takkay immay a duyye neh teceem kooy; akak geynem koo.

¹⁷ Yi Dageltaw, kulli numuk afqado tagirribem kok aaxigeh; afqado akak digga le num table waqdi ruffu iyya Dagelta kinnitom kok aaxigeh. A duyyey anu inni le kabuk eceehiyya qado-baguuk eceeh inni fayxiik kaadu tet ecee. Tonnah kaadu, ku maray a duyye akke baahehiyya isi fayxiik bagu edde emeqqa 'yeenih baaheenim keenik ubleh an.

¹⁸ YALLAW, ni kaxxa abbobtih yen Abraahim kee Iscaak kee Israayil elle aamanuk sugte Dageltaw, a saaku lino meqe niya kulli way isi marih afqadot haay. Ken afqado koo fan hayisay.

¹⁹ Yi baxa Suleeman ku xinto kee amriiy atu intem baguuk aba'gidih, fayxi kaah ucuyaay; a Qibaadah-Qariy xisnê-duyye akah eceehiyya xisa'gidih, fayxi kaah ucuy» 'yaanam axcuk Yalla luk yaabe.

²⁰ Too yaabak gaba kale waqdi ummatak, «YALLAY sin Dagelta kinni faylisa» iyye. Too waqdi suggu 'ye mari, YALLAY oson akak raden ken kaxxa abbobti doorehiyya fayliseenih. Qununna 'yeenih, baaxol gommoh radeenih, YALLA yessekexxeeniih; isinni malik kaadu yessekexxen.

²¹ Nammeyhaytoh ayro YALLIH sadgatah saqa yusguuden. Awurwak alfi yusguudeeniih; marwak alfi yusguudeeniih; anaaqek kaadu alfi yusguuden. Too saqih cado inkih sadgat elle aban mansafih bagul cararisen. Qinabak bicsen kamrih sadgat kaadu baahen. Tohuk kalah kaadu, YALLIH sadgatah mango saqa yusguudeeniih; too saqih cado ummatah inkih keefen.

²² Tohuk gexxaamah, uqubba heeniih, maaqo akamuk, farcatat YALLIH qiidih asen. Dawud baxa Suleeman nammeyhaak malik aben. Too saaku YALLIH migaq edde xagak, malik yakke'gidih kaa yuskuteeniih isinni malik kaa aben. Kaxxa-seekih kaadu Saaduk yuskuten.

SULEEMAN MALIK YAKKE'GIDIH KAA YUSKUTEN

²³ Tonnal Suleeman, isi abbah aracay YALLI keenih yeceehiyyal, malik yekke. Suleeman malik yekkek wadiril, abinnaanim gabal kaak bicteeh, Israayil mari kaadu kaah rammitakaay amri kaak oggolak yenen.

²⁴ Doolat abbobti kee qaskar kee kay toobokoh agantah, «Malik Suleeman nek aba axcinnaanim abennooh, kaal mamakna» 'yaanam axcuk xiibiten.

²⁵ YALLI, inkih tan ummat akak cunxitta numuy hayba le kaa abe. Israayilil dardaare marak, Yalli Suleeman gide nabna kee haybak akah yecee malik mananna.

²⁶ Kay abba Yiisâ-baxa Dawud inkih tan Israayil ummatak malikih suge.

²⁷ Morootom sanatih gide malikih sugeeh; too morootomuk Cebron magaalal malcina sanat malikih sugeeh; wohuk raaqa soddom kee sidooca sanat Yarusalaam magaalal malikih suge.

²⁸ Barak nagay idaltuh yan saaku rabe. Yanim fanah gaddaliino kee caddi wee'kal rabe. Kay lakal kay aracal kay baxi Suleeman malik yekke.

²⁹ Kay aydaadak qimbooy ellecabo Samuwel kee Naatan kee Gaad deqsita sidooca nabih aydaadi elle yan kitoobal geytinta.

³⁰ Too kitoobal tanim macaay inteenik, usuk ummat elle xiinisak suge inna kee, usuk qandek luk yene inna kee, kaa kee Israayil ummat kee kay dariifal ten doolatwat tikka 'tem inkih, too kitoobal geytinta.