1 Aydaad 28 - NABUWWA KEE MALIKWA

DAWUD ISI MARA FARRIIME

¹ Malik Dawud inkih tan Israayil abbobtih seeco abe. Keenih akah seecem, Yarusalaam magaalal gaaboowaana'gidik ten. Too seecol kedoh abbobti kee, kay dardaarinni maadda haa baaxol doolat abbobtih yan mara kee, gulub-gulubuk abbobtih yan mara kee, malik kee kaak lab-xaylo edderra hayte midirik amo wagitak yan mara kee, kay qaril abbootan luk yan mara kee, qaskarak foocat tan qaskar kee, wohuk kalah yan maray muxxo lehiyyak num maraaqinnay, inkih Yarusalaam magaalal gaaboowen.

² Too mari inkih elle gaaboowe ikkel, Dawud foocal keenik solla iyyeh ken lih yaabe. Keenik iyyeemih, «Yi baaxoh ummatey, siinik axcem yok oobbeya. YALLIH Qahdih-Sanduguy kay ibih mattaaqatta kinnihiyya elle hayna'gidih, Qibaadâ-Qari xisam faxak suge. Inni Dageltah nabnah, kay Qibaadah-Qarih cato, bica naharal elle abeh suge.

³ Takkay immay xisam faxak suge waqdi, Yalli, ‹Atu qaskariita kinnitooh, mango qabal caxxe ikkal, yi Qibaadah Qari xisi koo mahaa› 'yaanam yok iyyeeh xise yoo kaleh.

⁴ Tonna'mmay YALLAY Israayil doore Dagelta kinnihiyya yi abbah buxak Israayil dardaarah gaca'gidih yoo dooreeh; yi durruyyatih reeda baxak baxal tabe leemih, YALLI qahdi neh culeh yan. Dardaarinna Yuudâ-kedoh yeceeh, Yuuda addak kaadu yi buxah marah dardaarinna geyaanamih nasiib yecee. Yi buxah marak addak kaadu yoo doorru heeh, inkih tan Israayil ummatih amoyta yoo abe.

⁵ Lab-xaylok mangom yoh yecee. Xalla hee xalaayak addak kaadu yi lakal Israayil ummatih amoytiinuh Suleeman doore. Isih, abbah akak yan Israayil-ummattal yi lakal malikih Suleeman hee leemih, xagana yoh culeh yan.

⁶ «YALLI yok iyyeemih, ‹Yoo elle yaqbudoonu waan Qari kee daaroota xissu waytam, ku baxa Suleemana. Baxa yoh yakke'gidih kaa dooreh an. Anu kaadu abba kaah akkeyyo.

⁷ Taway akah aba'nnah, anu ruube amri xagureeh, too amri iyyaamak tu cabe'kal duudusek, tonnal kay dardaarinni way akah baye waa'nnah abeyyo› 'yaanam yok iyye.

⁸ «Hay taway, yi ummatey, ni Dagelti yoo elle yaabbeeh, siiniy YALLIH ummat kinnihiyya yoo elle tablen ikkel, yaabah aniih; YALLAY ni Dageltah yani nee amrissa heem cubbusak abtaanam siinil cabah an. Tah duudussa hayteenik, ta baaxoy usuk siinih yeceehiyya sin ikoyta akkeleeh; baxak baxal ikoytah siinik raaqele» 'yaanam iyye.

⁹ Too waqdi Suleemanak iyyemii, «Yi baxaw, atu kaadu isi abba aqbuduk suge Dagelta taaxigeemiiy namma kalbi aalle'kal kaah taamittaamih fayxi taalleemi. Kaak kalih imih taamittam cabba hayteh dibuk kay taamat gactaama. YALLI nanu nacsubem kee niyatnam nek yaaxigeh. Niya kaa fanah haytek, kaa gee lito. Takkay immay darre kaat cabtek, darre kot cabeleeh; way kol mayaduura.

¹⁰ YALLI isi Qibaadah-Qarih xissa'gidih koo doorem kassa haay mahawweenin. Tahaysa kay qarih xisnet cultaamaay gaba kalla haytam fanah, fanat akak aade waytaama» 'yaanam kaak iyye.

¹¹ Dawud, Qibaadâ-Qari elle xisu waa gurra Suleemanah yescesse. Qibaadâ-Qari akak culan arac kee, Qibaadâ-Qarih addal duyye elle daanisoonu waan golitte kee, Kulliimik-Taahiriinoh-Yayse-Goliy dambi-cabsuh culaanahiyya elle xisu waa inna kaah yescesseeh, tohuk kalah tan golittey raqqa 'tehiyya elle xisu waa innih gurra kaah yescesse.

¹² Tohuk kalah kaadu, YALLIH Qibaadah-Qarih daaroota kee, woo daarootah dariifal faxxinta qarwa elle xiseh meqe innih tiyakaa, isit cella haytam inkih kaah yescesse. Qibaadâ-Qarih duyye edde haan golitte kee ummatta Yallih sadgatah bahta duyye elle haan golitte elle xisan innak isit celtam kaadu kaah warse.

¹³ Tohuk kalah kaah warsem macaay inteenik, seeka kee Leewih yooboke mara exxa-exxal akah kurra hee innaay; YALLIH Qibaadah-Qaril keenil tan taama akah aban innaay; wohuk kalah kaadu, Qibaadâ-Qarih addal Yallih sadgat wagga hayta taama edde aban mingilwa kee duyyeeyah amo akah wagtan innah ken missoysaanaah bical haanamih tiyak kaadu isit celtam kaah warse.

¹⁴ Too duyye kee mingilwa edde bicsaana'gidih, dahabak faxxintah gide kee lakqok faxxintah gide kaah warse.

¹⁵ Tohum, dahabak bicsen faanuswa kee, faanuswa elle haan mansafitteey, lakqok bicsen faanuswa kee, faanuswa elle haan mansafitteey,

¹⁶ dahabak bicsen miizway Yallih sadgatah baahen gaqambo elle haanahiyya kee, lakqok bicsen miizwaay;

¹⁷ wohuk kalah kaadu, dahabak bicsen feeraari le malaakiq kee sacnitte kee gaanitte kee daasatwâ bicsah faxxiima dahab kee lakqok ten. Ta duyyeeyah-bicsah inkih, dahab kee lakqok faxxintah gide kaah warse.

¹⁸ Tohuk kalah kaadu, qaydarus elle ruuban mansafih bicsah saafih yan dahabak faxxintah gide kee, dahabak bicsan gaariy galwa leemiy YALLIH Qahdih Sanduguk daga raqtahiyya kinni akah bicsan gurra kaah yescesse.

¹⁹ Tohuk lakal kaak iyyeemihii, «Taway koh warisak sugga excem inkih, ta qarih xisne kee teetih faxxinta duyye elle bicsan gurraay, taham yoh warissem YALLAAY; usuk yok aba elle iyye'nnal tunkuttubeh tan» kaak iyye.

²⁰ Tohuk gaba kale waqdi kaak iyyeemih, «Tahaysa, yi baxaw, niya haysitaay abtaamak agaagul cabba haay digga 'xic. YALLIH Qibaadah-Qarih-taama qimbisaay, faxem takkeemih fanat akak maadayin. Dageltah yan YALLAY yi Dagelta kinni koo elle catele. A taamak gaba kalla haytam fan kol macabay koo elle catak sugele.

²¹ Qibaadâ-Qari xissu wayta saaku, seeka kee Leewih yooboke mari kaadu addal akak aboonu waan taamah bical yanin. Gabâ naggaarinna elle haah taamah ixxiga elli haa mari a taamal cataanamih fayxih qambaxxaagitak yanin. Wohuk raqqa 'te ummat kee ken abbobti a taamal atu ken akah amrisinnaanim abelon» 'yaanam kaak iyye.