1 Aydaad 26 - NABUWWA KEE MALIKWA

QIBAADÂ-QARI DACRISAK YEN MARA

¹ Leewih yooboke maray Yallih Qibaadah-Qari dacrisahiyya heen. Too dacayrit tenem, Korac deqsita gulubuk Koré-Maselemya deqsita num yen. Kaxxa abba kaak Asaf deqsita numu.

² Maselemya lab-xaylok malciin luk yen. A malciinik barah afat tenem Zakariyya deqsita numu. Kay lakal Yadiqeel ciggiilak yen. Yadiqeel lakal Dabadya ciggiilak yen. Kay lakal Yatniyel ciggiilak yen. Yatniyel lakal

³ Qeelam yen. Qeelam lakal Yahoocanan yen. Yahoocanan lakal Elyahoqeenay yen.

⁴ Too dacayrit kaadu tenem, Yoobad-Edom deqsita numu. Yalli lab-xaylok bacaar kaah yeceeh yen. Too xaylok barah afat tenem, Samaqya deqsita numuk ten. Kay lakal ciggiltem, Yahodbad deqsita baxak ten. Kay lakal tenem, Yowac deqsita baxak ten. Kay lakal kaadu Sakar deqsita baxi yen. Sakar lakal Netanel yen.

⁵ Netanel lakal Qammiyel yen. Qammiyel lakal Issakar yen. Issakar lakal Faqultay yen. Toh akah tekkem, Yallak mango xaylo xalaamih barkat geemih taagak ten.

^6-7 Yoobad-Edomuk naharsi-baxay migaaqah Samaqya akak axcuk yeneenihiyya lab-xaylok laceey luk yen. Migaaqah Qotni kee Rafaayil kee Yoobad kee Eldabad kee Eliihu kee Samakyaahu deqsitak yenen. A mari, isinni gulubih addat loonuh yan ixxigak gexxaamah, fula le marak ten. Eddeey edde Eliihu kee Samakyaahu edde yabba yan ixxiga kee bagi cubbi luk yenen.

⁸ Yoobad-Edom buxah mari, Qibaadâ-Qarih-dacayri abu waa maray dudda lehiyyak lactam kee namma num yekken.

⁹ Maselemyâ-buxah mari kaadu dudda le marak taban kee bacra num yekke.

¹⁰ Maraari gulubuk Coosa yen. Usuk lab-xaylok ferey luk yen. Too fereeyih abba Simri deqsita baxa foocat yan saqal abe. Barah toobokok inkih saqalah mananna'mmay, abba saqalah kaa akah heemi.

¹¹ Raqte xayloh migaq Cilkiyya kee Tabalyaahu kee Zakariyya deqsitak yen. Coosâ-marak Yallih Qibaadah-Qarih dacayrit tenem, tittat taban kee sidooca numuk ten.

¹² Qibaadâ-Qarit dacayrih yan mara gulub-gulubul kurra heenih; mariiy isi gulubih saqoolinna keenik luk yen. Gersi Leewih yooboke marak kaxxih, Qibaadâ-Qaril aboonu waan taama keenih yeexegeenih yenen.

¹³ Gulub-gulubul kurrumma iyyan waqdi, Qibaadâ-Qari fan akak culan mango afak dacayrih elle gacoonu waan afal, saami caxxa keenih qidak yenen.

¹⁴ Selemyal saami caxxah ayrô-mawqa le kabut raqta afa tewqe. Kay baxay migaaqah Zakariyya deqsitak yeney meqe fayu sinaamah yeceehiyyal kaadu kilbat le kabut raqta afa tewqe.

¹⁵ Yoobad-Edomul gabbi-qaxat raqta afa tewqe. Kaak lab-xaylol kaadu Qibaadâ-Qarih makaadan dacrisaana'gidih saami caxxi keenil yewqe.

¹⁶ Suffim kee Coosa kaadu ayrô-culma le kabut raqta afa dacrisaanamih saami caxxi keenil yewqe. Tohuk kalah kaadu, Salleket deqsitta afay Qibaadâ-Qarik daga raaqa gitat fan afkunuk raqtahiyyah dacayrih kaadu saami caxxi keenil yewqe. Ta mari dacayrih tokket gacak yeneenim, hununuh keenih yeexegen waktik ten. Naharsi numuh yeexegen wakti gaba kala waqdi, woo numul gersi num ciggiilak, tonnal kulli numuuy isih heen waktil dacayrih edde gacak yen.

¹⁷ Ayrô-mawqa le kabut raqta afat kulli ayro laca num dacayrih gacak ten. Kilbat le kabut raqta afat affara num dacayrih gacak ten. Gabbi-qaxat kaadu affara num dacayrih gacak ten. Qibaadâ-Qarih makaadanat kulli ayro affara num gacak teneeh; too fereeyik nammayaay waqdi makaadanat keenik gacak yenen.

¹⁸ Ayrô-culma le kabut raaqa daaratat affara numuy giti xaqut raqtahiyya dacayrih gacak ten. Namma num kaadu woo daaratih addat dacayrih gacak ten.

¹⁹ Korac kee Maraari deqsita gulubut raaqak yen mari, Yallih Qibaadah-Qarih dacayri elle abak yeneenim, tama gurrak ten.

RAQTE TAAMAY QIBAADÂ-QARIL ABEENI

²⁰ A marak kalih maray kaadu Leewih yoobokehiyyah, Qibaadâ-Qarih-duyye kee Yallih sadgatah baahan duyye elle haan makaadan-abbootan keenih yeceen.

^21-22 Yaciyelik lab-xayloh nammayay migaaqah Deetam kee Ayyuqel deqsitak tenehiyya, YALLIH Qibaadah-Qarik duyye elle daanisan golitteh abbootan luk yenen. Yaciyel akak radem, Laqdan deqsita numuy Gerson deqsita numuk baxah yenehiyya. Isi gulubuk abbah yan numuk ten.

²³ Tonnah kaadu, Qamram kee Yixhar kee Cebron kee Quddiyeel deqsita marak rade marah, aboonu waanaah edde gacoonu waan taama yeexegen.

²⁴ Sabuuwel Yallih Qibaadah-Qarih mattacoh yeceen duyye elle haan qarik tu edde taade saqalah yen. Sabuuwel Gersom kedoh aabakuk yen. Gersom Muusak baxah yen.

²⁵ Gersom, Elqeederak toobokoytak ten. Seloomit keenik rade marak ten. Elqeedar Recabya xale. Recabya Yasaqya xale. Yasaqya kaadu Yooram xale. Yooram kaadu Dikri xale. Dikri kaadu Seloomit xale.

²⁶ Seloomitiy Elqeedar samadah yenehiyya kee kay gulubut raqqa 'ye mari, Yallih sadgatah Qibaadâ-Qari baahan duyyeh abbootan luk yenen. Too duyye teceem, Malik Dawud kee kedoh abbobti kee gulub-gulubuk abbobtih yan mara kee qaskar abbobtih yan mara.

²⁷ Woo mari qeebik dannabah orbisen duyyek garab beyya heeniih, YALLIH Qibaadah-Qarih addal woo qari edde bicsaana'gidih heen.

²⁸ Wohuk kalah kaadu, nabi Samuwel kee Kées-Saawul kee Nér-Abner kee Xaruya deqsitta barrah baxay migaaqah Yowab deqsitahiyya, Yallih migaaqal bahha haan duyyeeyak inkih abbah tenem, Seloomit kee kay buxah marak ten. Seloomit kee kay buxah mari, Yallih Qibaadah-Qari Yallih migaaqal bahha haan duyyek inkih abbootan gabat luk yenen.

LEEWIH YOOBOKE MARI IROL ABE TAAMA

²⁹ Yixharak rade marak Kananya kee kay xayloh addak, Qibaadâ-Qari hinna'mmay, xinto wagitta qaadoodi gabal akak heen mari yen. Too mari Israayil ummattak xintô saqoolinna kee, ummat fanat takke umaane bicsoonuh doorimen.

³⁰ Cebron deqsita numuk rade marak, Casabaya kee kaah ramad le marak alfi kee malcina boolih numuy nagay tan ixxiga kee cubbi lehiyyah kaadu edde gacoonu waan taama yeexegen. Toh macâ-taamaay inteenik, Ordon weeqaytuk ayrô-culma le kabut raqqa 'ta Israayil ummatah diini wagitta qaadoodi kee, xinto wagga haytaamih qaada keenih abaana'gidi kee, keenih yableenimih tiyat ken heen.

³¹ Yeriyaahu deqsita num kaadu Cebroonuk radda 'ye marih abbootan kee saqoolinna luk yen. Dawud malik edde yekke morootomhaytô sanatat, Cebroonuk rade marih qaadak adda wagita mara heen. Too numih durruyyat elle tani'nna yaaxigeeni'gidih aben kusaaqisiyyal, Yaqder deqsitta magaalay Gilqad deqsitta baaxol geytintahiyyal, kaxxa ixxiga kee cubbi le maray Cebroonuk raddehiyya yanim geytinte.

³² Malik Dawud, namma alfi kee malcina boolih numuy Yeriyaahuh ramad luk yenehiyya, Israayil kedoodak Ruuben kee Gaad kee Manassek-garab guubuh elle tan rasul, diini kee xinto wagitta tiya woo marah abaana'gidih, abbootan ken gabal hee. Yeriyaahuh ramad luk yen mari inkih, buxâ-marak abbobtih yan maray ixxiga kee bagi cubbi lek ten.