1 Aydaad 23 - NABUWWA KEE MALIKWA

LEEWIH YOOBOKE MARI TAAMA ELLE ABE'NNA

¹ Dawud idooliteeh, qumrik kaxxa caddo gufe saaku, isi baxa Suleeman Israayil rasul reediseeh malik kaa abe.

² Dawud, Israayil makaabon kee seeka kee Leewih yooboke marah seeco abeeh ken bahsiiseh.

³ Sarrakaa, Leewih yooboke marak labhak qumri akak soddom kee wohuk fula mara lowsiise. Too marak loowo soddom kee bacra alfi tekke.

⁴ Too waqdi Dawud iyyemii, «Too marak labaatanna kee affara alfih num taamah yaallu waam, YALLIH Qibaadah-Qarih addal tan taamaay; kaadu too soddom kee bacra alfi yekke marak laca alfih num taamah yaallu waam, qaada yaktubeenim kee ummatta cakki tittak wayta waqdi, ken kuraanama.

⁵ Kaadu too soddom kee bacra alfik affara alfih num taamah yaallu waam, Qibaadâ-Qarih afah dacayri kee, affara alfih num kaadu YALLA saarisu waa mara akkele. Kaa saarisan waqdi, yaaguren duyyey anu keenih bicsehiyya aagaruk abelon» iyye.

⁶ Dawud Leewih yooboke mara gulub-gulubuh sidooca ikkel kure. Tohumuu, Gerson kee Kohat kee Maraari deqsita sidooca gulubuk ten.

⁷ Gerson lab-xaylok nammay luk yen. Migaaqah Laqdan kee Simqi deqsitak yenen.

⁸ Laqdan kaadu lab-xaylok sidoc luk yen. Oson migaaqah Yaciyel kee Deetan kee Ayyuqel deqsitak yen. Yaqiyal barah inkih afat keenik yen.

⁹ Simqi lab-xayloh sidoc luk yen; migaaqah Seloomot kee Cadiyel kee Caaran deqsitak yenen. Too mari inkih Laqdan-migaaqal-aaxaguk-yenen-gulub akak rade marak ten.

¹⁰ Simqi kaadu lab-xayloh ferey luk yen. Migaaqah Yacat kee Diida kee Yaqus kee Beriiqa deqsitak yenen.

¹¹ Yacat naharsi-saqalah keenik yeneeh; kay lakal Diida ciggiilak yen. Diidâ lakal Yaqus anuk yeneeh, Yaqus lakal kaadu Beriiqa yen. Yaqus kee Beriiqak rade mari daguk yeneeh, tonna-leemiik inki gulubuh loowimak yenen.

¹² Kohat lab-xayloh fereey xale. Migaaqah Qamram kee Yixhar kee Cebron kee Quddiyeel deqsitak yenen.

¹³ Naharsi-baxi kaak Qamram deqsitak yeneeh; Haaruun kee Muusa xaltem kaak ten. Haaruun kee kaak rade mari seekay dibuk Yallih taamat tanihiyya yakkeeni'gidiiy, Yallih duyyey taahirik enna 'tahiyyah abbootan daayiman yaalleeni'gidih, zeytik (saliidik) yuskuten. Tonnal, YALLIH qibaadat yanin waqdi, qaydarus qeerisaanam kee, kay taamat gacaanam kee, kay migaaqal ummatah «YALLI maqaane siinit haay» axcuk dooqa abaanamih caddi geen. Too taama baxak baxal raaqele.

¹⁴ Muusay Yallih naqasuh yenehiyyah xayloh tu gactek, gersi maray Leewih yooboke migaaqal loowime.

¹⁵ Muusâ-xaylo nammay akkuk teneeh; migaaqah Gersom kee Elqeeder deqsitak yenen.

¹⁶ Gersom xale xaylok saqalay foocat yanih tenem, Sabuuwel deqsita baxak ten.

¹⁷ Elqeederih tu gactek, dibuk inki lab-baxa luk yen. Migaaqah Recabya deqsitak yen. Takkay immay Recabya mango durruyyat cabe.

¹⁸ Kohat xale lab-xaylok nammayhaytô-baxay migaaqah Yixhar deqsitak yenehiyya lab-baxa luk yeneeh; too baxi isi gulubuk saqalay foocat yanihiyyah yen. Migaq kaak Seloomitik ten.

¹⁹ Kohatak sidochaytô-baxi kaadu Cebron deqsitak yeneeh; lab-xaylok fereey luk yen. Migaaqah Yeriyaahu kee Amarya kee Yacadiyel kee Yekamqam deqsitak yenen.

²⁰ Kohatak fereyhaytô-baxay Quddiyeel deqsitak yene kaadu lab-xaylok nammay luk yeneeh; migaaqah Miika kee Yissiya deqsitak yenen.

²¹ Maraari lab-xaylok nammay luk yen. Migaaqah Macli kee Muusi deqsitak yenen. Macli lab-xayloh nammay luk yen. Migaq keenik Alqedar kee Keesik ten.

²² Alqedar say-xaylok sah, lab-xaylo xale'kal rabe. Say-xaylo kaak abittem qammih xaylok ten. Kees xayloh rihimih ken aben.

²³ Maraari xaylok nammayhaytô-baxay migaaqah Muusi deqsitak yenehiyya lab-xayloh sidoc xale. Too urri migaaqah Macli kee Qeeder kee Yerimot deqsitak yenen.

²⁴ Leewî-kedok yen mari ta marak yeneeh; kulli numuk keenik buxâ-mari yakkeh gide kee edde raaqan gulub yunkuttubeh keenik yen. Ta marak radda 'ye numuy qumrik labaatannaak daga lehiyya YALLIH Qibaadah-Qaril isi taama luk yen.

²⁵ Dawud iyyeemih, «YALLAY Israayil doore Dagelta kinnihiyya isi marah amaan yaceeh yaniih; YALLI Yarusalaamal isi marih addal isih ken lih anele.

²⁶ Tohuk gexxaamah, tahak wadir Leewih yooboke mari, Yallih Nabnah-Siraq kee tet duyyeh quukat magacan» 'yaanam iyye.

²⁷ Dawud ken elle farrimma hee'nnal, tohuk wadir Leewih mari qumrik labaatanna guffa haa saaku, Yallih Qibaadah-Qarih-taamat akah gacan innah, migaq isinnik aktubuk yenen.

²⁸ Taamah keenih yeceenim: Qibaadâ-Qaril YALLIH qibaada aban waqdi, Haaruunuk rade maray seekâ-lago lehiyya faxxinta taamal cataanam kee, Qibaadâ-Qarih daaratwa kee qunxa qarwa dacrisaanam kee, taahirik enna 'ta duyyey Qibaadâ-Qaril tanihiyya saytunusaanam kee, raqqa 'ta taamay Yallih Qibaadah-Qarih addal faxximma 'tahiyya abaanam kee,

²⁹ Yallih sadgatah xayyoosen gaqamboh amo wagtaanam kee, tonnah kaadu, Yallih sadgatah baahan bululih amo wagtaanamih taama keenih yeceen. Tonnah kaadu, kamiir maleh alaysen gasiita kee saliidit yesgellen bulul kee alaysen gaqamboy Yallih sadgatah baahaanahiyyah abbootan ken gabal heen. Qibaadâ-Qaril aban sadgatih duyye miizaanal haanam kee,

^30-31 saaku-saaku kee bar-baraay sabti ayro YALLIH sadgatah yusguuden saqih cado carrisan waqdi kee, alsih biloh aban sadgat kee, wohuk kalah tan ayrooray kaadu qiidih asaanahiyya, YALLA faylisaanaah, kay migaaqay nabna le saarisaanamih qaada kaadu ken gabal heen. Yallih qibaada aban waqdi, oson ta taama elle aboonu waan inna kee, abu waa marih loowo yakku waah gide keenih warseeniih; too qaada wagittam elle aboonu waan madqa keenih yeyyeeqen.

³² Tonnal Yallih Nabnah-Siraq kee, qibaada edde aban duyyey taahirik tanihiyyah amo wagtaanaah dacrisaanam keenil caben. Tohuk kalah kaadu, Haaruunuk radde seekay keenih ramad luk tenehiyya YALLIH Qibaadah-Qarih addal abtah tan Yallih taamal ken cataanamih tiya kaadu ken wagitak ten.