1 Aydaad 22 - NABUWWA KEE MALIKWA

¹ Tohuk gexxaamah Dawud iyyemii, «Dageltah yan YALLIH Qibaadah-Qari elle xissiimu waam akke. Israayil ummat cado akak carrisan saq sadgatah elle yasgaadoonu waanam ta araca» 'yaanam iyye.

DAWUD YALLIH QARI AKAK XISEN DUYYE BICSIISE

² Ayrok teena Malik Dawud allî-baaxoh maray Israayil addal yanihiyya inki aracal gaaboyseeh, aboonu waan taama keenil yecee. Too marak garab Yallih Qibaadah-Qari edde xisoonu waan xeetih bicat hee.

³ Dawud isih, bisaamir kee alifu tabbixe duyye edde bicsaana'gidih, mango biriita keenih yecee. Toh akah abem, Qibaadâ-Qarih-afoofi edde bicsaana'gidik ten. Tohuk kalah nacaasak loowo sinnim yecee.

⁴ Tohuk kalah kaadu, Suur kee Saydah magaalah mari mango *sariidâ-coox kaah baahaana'gidih, bica ken lih haysite.

⁵ Dawud isi niyal heemih, «Yi baxi Suleeman xisu waa Yallih Qibaadah-Qari kaxxam meqeeh addunyal edde yabba 'yan qari yakkeemi» 'yaanam niyat heeh yen. «Yi baxi ahayduma qunxa numuy taama elle aban inna aaxige waahiyya kinnuk, anu naharal bica kaah abeh sugam tayse» 'yaanam yucsubeh yeneeh; a bica naharal akah abem tohuk ten. Tohuk gexxaamah rabaamak dumal, Qari-bicsah faxxinta duyyek mangom aracal heeh suge.

DAWUD ISI BAXAK, QIBAADÂ-QARI XIS IYYE

⁶ Sarra isi baxah farmo ruubeeh, «YALLAY Israayil doore Dagelta kinnihiyyah Qibaadâ-Qari xis» 'yaanam kaak iyye.

⁷ Too farmol kaak iyyeemih, «Yi baxaw, YALLAY yi Dagelta kinnihiyyah nabnah, Qibaadâ-Qari kaah xisam faxak suge.

⁸ Takkay immay YALLI yok iyyeemih, ‹Atu mango mara qiddeeh, mango carbit asseeh; tonna-leemiik too qabalay atu caxxehiyyah sabbatah, yi Qibaadah Qari xisi koo mahaa.›

⁹ Takkay immay toh iyyeemih qahdi yoh culeeh yok iyyeemih, ‹Lab-baxay baaxo amaanah xiinisu waahiyya xalettooh; too amaan anu innih kaah aceeyyo. Naqaboytiitik amaanah kaa xiiniseyyo. Migaq kaak Suleeman deqsitele. Kay dabaanal Israayil ummat carbi matablaay amaanah xiinele.

¹⁰ Yoh Qibaadâ-Qari xissu waytam, ku xaylok too baxa. Usuk baxa yoh akkeleeh; anu abba kaah akkeyyo. Kay reeda Israayil rasul baxak baxal raaqele› 'yaanam yok iyyeh yan» kaak iyye.

¹¹ Qagissa heeh kaak iyyeemih, «Tonna'mmay, yi baxaw, YALLAY ku Dagelta kinnihiyya isih xagana akah culla 'ye'nnah, kay Qibaadah-Qarih-xisne ku gabat bicsa'gidih, ko'lih yanay.

¹² Israayil ummat kay xinto elle inta'nnal akah xiinissa'nnah, YALLAY ku Dagelta kinnihiyya bagi cubbi kee kas koh yacaay.

¹³ YALLI, Israayil ummatah Muusal ruube xinto duudussek, tonnal, yi baxaw, kullim gabal kok bicele. A taamal digga xicay agaagul akak cab; tuk mameysitinaay, niya kok baxqe waytay.

¹⁴ Qibaadâ-Qarih xisneh tiyakaa, innih akah taqabba exceh; a qaril haytu wayta dahabak sidiica malyoonih kiilok fula yakke dahab kee, soddom malyoonih kiilok fula takke lakqo gaabossa heeh cabeh an. Tohuk kalah kaadu, loowo sinni nacaas kee biriita a qarih xisneh gaaboyseh an. Tonnah kaadu xisnê-coox kee xeetik mangom gaaboyseh ani'mmay ahak raqtam atu isih edde osissaama.

¹⁵ Atu taamâ-marak mangom lito. Xeet yayyaaqe mara rikeek lito; xeetik qari bicsa mara kaadu kibuk lito. Cooxuk kaadu qari xisa coox bicsa mara rikeek lito. Tonnah kaadu, gabâ-naggarinna le mango maray

¹⁶ dahab kee lakqo kee nacaas kee birtak mansafwâ-bicsa yaaxigehiyya kaadu lito. Tahak wadir taama qimbissaamaay, YALLI koo elle catay» kaak iyye.

¹⁷ Tohuk lakal Israayil makaabonuk, «Suleeman cata» 'yaanam iyye.

¹⁸ Too makaabonuk iyyeemih, «YALLAY sin Dagelta kinni aham fanah sin lih yaniih, kulli kabuk inkih amaanah sin yabbixe. A baaxol suggu 'ye marak yoo yiysiiseeh; too mari ta saaku YALLA kee sin gubat yan.

¹⁹ Tohuk gexxaamah, taway YALLAY sin Dagelta kinnihiyyal isinni afqado kee niyaak taduureenimi. YALLIH Qahdih-Sandug kee Yallih qibaadah nabbixe duyyey taahirik tanihiyya addal akak haytaana'gidih, Dageltah yan YALLIH nabnah Qibaadâ-Qari xisa» 'yaanam keenik iyye.