1 Aydaad 21 - NABUWWA KEE MALIKWA

DAWUD ISRAAYIL UMMATTAT ABE LOOWO

¹ Seetan Israayil ummatah bala baaham faxeeh; toh, Dawud Israayil ummatih loowo abaamat asise.

² Too waqdi Dawud, Yowab kee qaskar abbobtih yen marak iyyeemih, «Israayil mari elle eneyya 'ya ikke gexay, yakkeenih gide keenik looway am. Qadad keenik aaxigem faxak» iyye.

³ Yowab kaak iyyeemih, «YALLI isi mara away yakkeenih gidek bool adda ken yaymaggay. Tonna'mmay, yi malikow, taway ta loowot akah cultaah, ummat qellat le mara akah abtam macaa? Israayil mari ku maraay; koo yakdume marah yanin» kaak iyye.

⁴ Takkay immay Malik Dawud, «Anu siinik axcem aba» kaak iyye. Sarrak Yowab sinam loowa'gidih, inkih tan Israayil ummatih adda gexeeh, yakkeenih gide lowwa keenik heeh, Yarusalaam fan yuduure.

⁵ Sarrak Yowab Dawuduk, «Israayil-rasul qaskarat gacu duuda marih loowo inki malyoon kee bool alfih num tekkeeh; Yuudâ-rasuluuy, affara bool kee malcina-tabanih alfih num yekken» iyye.

⁶ Yowab a loowo faxe cineh sugeeh; tonna-leemiik abeh yen loowot Leewi kee Benyam mara edde masgallinna.

TOH ABEEMIH TEKKE DIGAALA

⁷ Yalli a loowo tekkem mafaxinna. Tonna-leemiik Israayil mara akah digaale.

⁸ Sarrak Dawud abeemit isik radeeh; tonna-leemiik, «Yi Dageltaw, kaxxa dambi lem baaheh aniih, duqur edde ase waamat aseh anik, qafu yoh ab» iyye.

⁹ Tohuk lakal YALLI, Gaad deqsita nabiy Dawuduh Yallih farmo baahak yenehiyyak iyyeemih,

¹⁰ «Gexay Dawuduk intaamah, ‹Sidoocaamak taysem dooritaay; atu doorittem abeyyo› kaak inxic» iyyeeh; a sidoocam a nabih warissa heeh ruube.

¹¹ Sarrak a nabi Dawudul yemeeteeh YALLI kaah ruube farmo kaah warse.

¹² Kaak iyyeemih, «YALLI, ‹Sidooca sanat qulul siinil ruubam kee, sidooca alsih gide naqboytit kok yan mari koo ayradduk sugam kee, wonna hinnay, kaadu sidooca ayro YALLI qeebi isi siinit abaah, isi malaykattih gabat inkih yan rasul sinam qidda dalka siinit ruubaamak koh tayse tiya dooritay yol rub› 'yaanam kok iyyek, YALLAL maca gacisuu?» 'yaanam kaak iyye.

¹³ Too waqdi Dawud iyyeemih, «Anu taway tu edde ceda caalatat anih maana'mmay, sahda yoo digaaltaamak YALLI isi gabat yoo digalsitay. Toh akah axcem, kaxxa racmatta le Dagelta kinnim kaak aaxigeemih axce» iyye.

¹⁴ Tohuk wadir YALLI Israayil rasul dalka ruubeeh; too dalkat Israayil ummatak malcina-tabanih alfi rabe.

¹⁵ Yarusalaam magaala bayisu waa malaykattu ruubeeh; sarrak fanaak, abeyyo iyyeh suge baatik qaadeeh, malaykattuk «Ahaysa idiy. Abtem duddahak» iyye. Woo malaykatti woo waqdi Ornan deqsita numuy kedok Yabuusa deqsita marah yoobokehiyyah aracay darok caffa elle kalaanahiyyah garil soolak suge.

¹⁶ Dawud YALLIH malaykattuy qaran kee baaxok fanat gabat seef luk soolahiyya yuble. Malaykatti too waqdi Yarusalaam magaala baysam faxak yen. Dawud a malaykattu yuble waqdi, kaa kee Israayil makaabon xagaral *qabuudut gacca 'yeenih baaxok bagul qansa baaxo keenik xagtam fanah gommoh raden.

¹⁷ Dawud too waqdi dooqah iyyeemih, «Yi Dageltaw, a qellatat assem yoo ikkal num hinna. ‹Sinam loowa› inteeh loowo absissem yoo kinni way a masaakiina maca bahte? YALLAW, yi Dageltaw, a qellatah yoo kee yi buxah mara digaalitaay ku masaakiina maqidin» iyye.

DAWUD SADGAT ELLE ABAN ARAC BICSE

¹⁸ Too waqdi YALLIH malaykatti Gaadak iyyeemih, «Dawuduk intaamah: ‹Ugutay, Ornan-le-aracay daro caffak elle baxsaanahiyyal, YALLAH sadgat elle abtu wayta arac bicis› kaak inxic» kaak iyye.

¹⁹ Dawud YALLI ab kaak iyyem oggoleh, Gaad kaak gexa iyye ikke gexe.

²⁰ Tokkel daro caffak elle baxsan aracal, Ornan kee kay lab-xayloh ferey kamadik caffa anfiyak sugeeniih; sarrak a malaykattu yublen waqdi, kay xaylo kuddeeh tombooqoreh.

²¹ Ornan, Dawud kaa fanah yamaatem yuble waqdi, daro caffak elle baxisak suge aracaak kaa fan yemeeteeh, kay massakaxxah qansa baaxo kaak xagga haytam fanah qununna 'ye.

²² Too waqdi Dawud Ornanak iyyeemih, «A lakimay sahda selahiyya nek gexa'gidih, ama daro caffa elle baxissa aracal, YALLIH sadgat elle aboonu waan arac elle haam faxak, yol xaam; dudda le limo koh edde abeyyok» kaak iyye.

²³ Ornan kaal gacseemih, «Yi amoytaw, beetek maca le! Beetay isih faxxem elle abbaasit» kaak iyye. Kaadu qagseh iyyemii, «Sadgatah tasguudu wayta awurwa ah kaanaay; daro caffak edde baxisak suge coox kaadu cado Yallih sadgatah akak cararissa sadgat elle alaysettok, kaadu bet. A kamadi kaadu Yallih sadgatah aceettok bet» kaak iyye.

²⁴ Too tiyak malik kaal gacseemih, «Aleey, ku ikoyta foyyah kok mabeyaay, kok xaameyyo. Dudda le limo koh elle abeyyo. Tu edde ecee wee duyyet, sadgat YALLAH maaba» iyye.

²⁵ Sarrak too aracal dahab-garsik laca bool kaah elle yecee.

²⁶ Tohuk wadir YALLAH sadgat elle abu waa arac tokkel xiseeh; cado akak carrisan sadgat kee amaanah xiinaana'gidih aban sadgat too aracal YALLAH abe. Too sadgatah saqa usgudda hee waqdi dooqa abe. YALLI too dooqa kaak raabiteeh, yusguude saqih cado elle alaytu wayta gira qaraanak ruube.

²⁷ Sarra YALLI, malaykattul amri oobiseeh kaak iyyeemih, «Ama gabat tabbixe seef sibat gacis» kaak iyye. Malaykatti toh oggoleh.

^28-30 Dawud toh yuble waqdi, YALLI, abe dooqa kaak oggolem yeexegeh, Yallah sadgat abe. Too dabaanal, YALLIH Nabnah-Siraqay duma Muusa bacarih tan baaxol yen saaku bicseh sugehiyya kee, carrisan sadgat elle aban mansaf Gibqon magaalal elle yen. Tonna'mmay Dawud, YALLIH malaykattih seefik abeh yan meysik gexxaamah, Yallal tuk teena essera'gidih too arac gexak maraaqinna. Tohuk lakal Ornan darok caffa elle baxisak suge aracal, Yallah sadgat elle aba'gidih hee aracal, Yallah sadgat abak suge.