1 Aydaad 20 - NABUWWA KEE MALIKWA

RABBA DEQSITTA MAGAALA YIBBIXEN

¹ Ciggiila sugumih adday dardorti xeflih qeebih edde gexxahiyyat Yowab qaskarak foocat gacca 'yeh Qammon marih rasuh gaaduh gexeeh yibbixeh. Too gaaduh Malik Dawud magexinnaay, Yarusalaamal elle raaqe. Yowab abbah akak yan qaskar, Rabba deqsitta magaalay keenik inaytâ-magaalah tenehiyyat maro heeniih; sarrak tet yibbixeeniih tet bayseenih.

² Qammon-mari yalla iyyeh aqbuduk suge Milkom deqsitta ceeloh amot suge dahabak bicsen kalabta bee. Too kalabta miizaanal heen waqdi, qilsah soddom kee affara kiilo tekkeh ten. Woo kalabtah bagul bilqah qax-meqe xaa teneeh; Dawud too xaa beyya heeh isi kalabtah addat hee. Tohuk kalah woo magaalak mango duyye dannabah orbise.

³ Magaalal suge mara yeyyeeqeeh, sarra miisaar kee maataka kee godmat aban taamat ken tamsiisak yen. Too marak kalah kaadu, Qammon magaalooliy yibbixeenihiyyal suge marak kaadu toh abe. Tohuk gaba kalla hee waqdi, Dawud kee kay mara Yarusalaam fan tuduure.

FILISTIIN-MARAT ABEN QEEBI

⁴ Sarrî-dabaanal Filistiin kee ken fanal qeebi qagte. Qeebi elle qagtem, Geser deqsitta magaalak ten. Too qeebil Sibkay deqsita numuy Cuusâ-magaalal yoobokehiyya, migaaqah Siffay akak iyyan numuy kaxxa masu luk yenehiyya qide. Tonnal Israayil-mari qeebil Filistiin-marak yeyse.

⁵ Tohuk kalah kaadu Filistiin mara kee ken fanal kaxxa carbi rade. Too qeebil Israayilih yooboke Yaaqír-Elcanan deqsita numu, Gat magaalal yooboke Golyaadak toobokoytah yen numuy Lacmi deqsita qide. Too numih macaxi kaxxa masu luk yen.

⁶ Gat-magaalal kaadu gersi qeebi radeeh; too qeebit kaxxam masu le num suge. Gabak kulli gabat laca feera luk yeneeh, namma ibak kulli ibat laca feera luk yen. Usuk akak radem, dumî-daban suge maray kaxxam xagar masu luk yenehiyyah samadak ten.

⁷ Too num Israayil ummatta kaxxam bursute. Sarra Dawuduk saqalah yen Samma baxay Yonaatan akak axcuk yeneenihiyya kaa qide.

⁸ Ta sidooca numuy Dawud kee Dawud qaskarih gabat rabtehiyya, Gat deqsitta magaalal yooboke marak teneeh; masi nabna lagok luk yenen.