1 Aydaad 16 - NABUWWA KEE MALIKWA

¹ Sandug magaala maadisen waqdi, Dawud Sandug elle hoonuh sooliseh suge siraqih addal heen. Tohuk wadir Yallih-sadgatah cado akak carrisan saq qideeniih, kaadu amaanah xiinaanam taybulle asta takke'gidih Yallah sadgat aben.

² Dawud sadgatak gaba kalla hee waqdi, YALLIH migaaqal tokkel suge marah inkih dooqa abe.

³ Sarrak Israayil marak lab-mara kee say marah inkih, gaqamboh ikke kee solal alaysen cadoh ikke kee, kafsen qinab-xaylok tu'baxa takkem keenih keefe.

⁴ Leewih yooboke marak garabak Dawud iyyeemih, «Qahdi-Sandugih foocal, ummat YALLAY Israayil doore Dagelta kinnihiyya taqbude waqdi, isin dooqa abak, YALLA saarisakaay kaa faylisak foocat gacaay; tahak wadir sin taama tohu» keenik iyye.

⁵ Tohuk abbah Asaf heeh kay gubal Zakariyya hee. Yaqiiyal kee Samiraamot kee Yaciyel kee Mattitya kee Aliyab kee Banaaya kee Yoobad-Edom kee Yaqiiyal *begena kee kirar yaagureenimih taama keenih yecee. Asaf kaadu giyaagib yaagureenim taamah luk yen.

⁶ Tohuk kalah kaadu namma seekiy Banaaya kee Yacadiyel deqsittahiyya kulli way *baanta yaagureenim taamah luk yenen. A baanta elle yaagureenim Yallih-Qahdih-Sandugih foocak ten.

⁷ Dawud, Asaf kee kaa'lih yen Leewih yooboke mari saare abem naharaak taama keenih yeceem, too ayrok ten.

FAYLAH ABEN SAARE

⁸ Saareh iyyeenimii, YALLAH candu gacisay kaak cato esserak kaa fan deerisa. Kay nabna sinaamah warisa; usuk abem sahdah warisa.

⁹ YALLAH fayla aba; usuk abe qajaaqibatat yaaba.

¹⁰ Kay migaaqay *kudduusuk yanit ruffu xica; YALLA faxa mari baguuk ruffu iyyay.

¹¹ YALLAL cato essera; qande siinit haa'gidih, hangi kaah ucuyay; kabba kaat inxicay.

^12-13 Isin, Israayiliy kay naqasuh yenek rade maraw, isin, Yaqkuubuy usuk dooritek rade maraw, YALLI abe ablewaynu kassa haa; usuk yecee cokmi kassita.

¹⁴ YALLI ni Dagelta kinni. Usuk amri elle lem, kulli baaxo.

¹⁵ Kay qahdi kulli way kassita; usuk adok ado alfih amma 'tam fan cule xagna kassita.

¹⁶ Abraahimih cule qahdi kassita; Iscaakak, «Ku abba luk cule qahdi abeyyo» axcuk xiibite.

^17-18 Yalli, Yaqkuub lih woo qahdiy baye waahiyya diggoyse; kaak iyyemii, «Kanqaan baaxo ku gabal heeyyo; woo baaxo kum akkele» 'yaanam kaak iyye.

¹⁹ Woo saaku Israayil mari, Kanqaan baaxol daguk yeneeh; woo baaxol qibinah yenen.

²⁰ Oson baaxook baaxo safarah gexen; malikwaak malikwa fan gexen.

²¹ Yalli num keenit xukkute kaleeh; isih ken dacrisa'gidih, malikwa keenih yessecekke.

²² «Yi ummatay anu doorel umam mabaahina; yi nabuwwa maxagina» keenik iyye.

²³ Ummatey inkih, YALLA saarisa. Nee waddem kaak, ummatah warisa; nee wadem kulli saaku warisa.

²⁴ Usuk le nabnat yaabay warisa. Kay kaxxa abto kulli marat qida.

²⁵ YALLI nabaah, naba fayla lem kaa. Sinam uqbudda haytaamak inkih fuli meysi akah taguudem YALLA.

²⁶ Kaak sa gersiimih qibaada foyya. Qaraanal geytimtem gintem YALLA.

²⁷ YALLI nabna leeh, misliino luk yan. Kay aracal tanim, qandeey farci.

²⁸ Addunyal enna 'ta kedooda inkih YALLIH nabna kee qande saarissay.

²⁹ YALLIH-migaaqay nabna let yaaba. Sadgat baahay, YALLIH-qarih ama. Kudduusuk yan YALLI yambullee way, kaa essekexxeyay gommoh kaah rada.

³⁰ Kaak cunxitaay, ummatey, meysita. Baaxo daabinteh angoyya mabta.

³¹ Qaran kee baaxoy ifric; tassa xic! YALLI malik kinnim baxxaqisaay, kulli baaxol yan marah warisa.

³² Bad kee rooci leemiy badal tanik, ifrica isin, qililisa farcih. Buqre-aba buqre elle abtah tan baaxooy tet bagul geytintaamak kaadu inkih, isin tassa xicaay ruffa xica.

³³ YALLI baad xiinisuh amaatele. Xiinisa'gidih yamaatu waa ayro, garbo kee coox inkih qililsele.

³⁴ YALLI maqaane lek, candu kaah gacisa! YALLIH-kacni mayambaxak, tohul candu kaah gacisa.

³⁵ «Yallaw, ni Wadeenaw, nee cat. Candu koh akah gacisnaah, ku migaaqay *kudduusuk yanihiyya faylisna'gidih, a aki marih addak nee gacisaay keenik nee wadey» dooqah kaak intaama.

³⁶ YALLAY Israayil doore Dagelta kinnihiyya faylisa. Away kaa faylisa; daayiman kaa saarisa. Too saarek gaba kalla heen waqdi, sugga inte ummatta «Aamiin, aamiin! YALLA fayla taafay!» axcuk yukkuqeenih.

³⁷ Dawud, Asaf kee kay wadayah yen Leewih yooboke mara YALLIH Qahdih-Sandug elle tani'kkel aban dooqak abbobtih ken hee. Oson too aracal kulli saaku Yallih taama abaanam taamah luk yenen.

³⁸ Yedutun baxay Yoobad-Edom deqsita kee lactam kee bacra numuy usuk akah yooboke kedok kay gulubut raaqak tenehiyya a taamal Asaf-gubal kaa catak yenen. Coosa kee Yoobad-Edom kaadu Qibaadâ-Qarih-afoofi dacrisak yenen.

³⁹ Sek Saaduk kee kaah ramad le seekah tu gactek, Gibqon magaalal, YALLIH qibaada elle takke siraqih addal, abbootan luk yenen.

⁴⁰ Maaci elle maacisinnaanimil, bari elle akinnaanimil, YALLI Israayil-ummattal ruube kitaabal elle tani'nnal, sadgat elle cararisan mansafal YALLIH migaaqal inkitanuuk cado akak cararisan sadgat aben.

⁴¹ Oson toh aban waqdi, Heeman kee Yedutun deqsitta namma num kee ken lih yeexegen maray YALLA saarisaana'gidih dooreenihiyya tokkel too saare abak ten. YALLIH kacanuy waarahiyya faylisak yenen.

⁴² A namma num, ahak kalah kaadu, Yallih saare aban waqdi baanta kee giyaagib kee wohuk kalah tan duyyeeyay Yallih saareh yaagureenihiyyah abbootan luk yen. Yedutunuk lab-xaylo Qibaadâ-Qarih-afoofi dacrisak ten.

⁴³ Tohuk wadir kulli num isi buxa fanah yuduure. Dawud kaadu isi buxah marah dooqa aba'gidih, isi buxah yuduure.