1 Aydaad 15 - NABUWWA KEE MALIKWA

QAHDÎ-SANDUG YARUSALAAM FAN BAAHE MARA

¹ Dawud isi magaalay Dawud-Magaala akak iyyaanahiyyal qarwa xise. Too qarwak kalah kaadu, Yallih Qahdih Sandug edde daanisan Siraq soolise.

² Tohuk lakal usuk iyyeemih, «Qahdi Sandug Leewih yaabuke mari yakkuqay. Macaay inteenik, YALLI iyyeemih, ‹A Sandug yakkuqeenim kee, daayiman yoo yakdumeenimih taamah doorem, keeni› » 'yaanam iyye.

³ Sarrî-saaku Dawud inkih yan Israayil marah Yarusalaam magaala yamaateenimih farmo ruube. Woo farmo akah keenih ruubem, Qahdi-Sandug Yarusalaam magaala fanah baahaana'gidik ten.

⁴ Sarrak kaadu Leewih yooboke marah seeco abe. Tonnah kaadu Haaruunuk rade marah seeco abe. Gaaboowen waqdi,

⁵ Leewî-kedok Kohat deqsita gulubuk abbah yen Uriyel deqsita num kee, kaa'lih bool kee labaatanni numuy kay gulubut raqtahiyya temeete.

⁶ Maraari deqsita gulubuk abbah yen Qasaaya deqsita num kee, kaa'lih namma bool kee labaatanni num temeete.

⁷ Gerson-gulubuk abbah yen Ayyuqel deqsita num kee, kaa'lih bool kee soddom num temeete.

⁸ Alixafan-gulubuk kaadu Samaqya deqsita num yemeete. Kaa'lih usuk abbah akak yan marak namma boolih num temeete.

⁹ Cebron-gulubuk kaadu Alyel deqsita num yemeete. Too num lih usuk abbah akak yan bacra-tabanih num temeete.

¹⁰ Quddiyeel-gulubuk Qamnadab deqsita num yemeete. Kaa'lih usuk abbah akak yan bool kee taban kee namma num temeete.

¹¹ Dawud sek Saaduk kee Abiyataar kee, tonnah kaadu, too Leewih yooboke laca numuy migaaqah Uriyel kee Qasaayaay, Ayyuqel kee Samaqyaay, Alyel kee Qamnadab akak axcuk yeneenihiyya is fanah seece.

¹² Too mari kaal yemeete waqdi keenik iyyeemih, «Isin Leewih marak saqoltih tantoonuuh; tonna-leemiik isinni kee isinni kedoh xayloh taahirik gactaanama. Tohuk gaba kalla haytan waqdi, YALLAY Israayil doore Dagelta kinnihiyyah Qahdih Sandug elle yani'kkek gexxeenih anu akah bicse siraq fanah baahetton.

¹³ A saaku ah siinik akah axcemii, ahak duma a Sandug bahnam fanxe waqdi, isin masuginnitoonuuy; Yallih assanabbiyyah nek faxxintam elle abna'nna maaxaginninooy; tonna-leemiik YALLAY ni Dageltah yanihiyyah digaala nee maadde» 'yaanam keenik iyye.

¹⁴ Dawud toh keenik iyyek wadiril, seeka kee Leewih yooboke mari, YALLAY Israayil doore Dagelta kinnihiyyah Qahdih Sandug Yarusalaam fan baahaana'gidih, taahirik gacen.

¹⁵ Leewi-mari Yalli Muusah-afat ken elle amrise'nnal, too Sandug wassaakâ-gurral Sandug elle yakkuqen cooxul sunkul hayya heenih been.

¹⁶ Dawud kaadu Leewih abbobtih amri yeceeh iyyeemih, «Leewih yooboke marak Yallih saare abu waa mara ixiga. Tonnah kaadu, *begena kee *kiraraay giyaagib tassa axcuk yaaguru waa mara ixiga» 'yaanamih amri yecee.

^17-21 Saare abak yen marak nacaasak bicsen giyaagib yaagureeni'gidih dooreenim: Ayyuqél-Heeman deqsita num kee, kaah ramad luk Barkiyyah-Asaf deqsita num kee, Kusayaahúh-Etan deqsita numuk ten. Etan, Maraari deqsita gulubuh yooboke. Too marih catohuu, Leewih marak kurrubaaheh anay le xongolot kirar nagay yaagure mara dooren. Tohumuu, Zakariyya kee Yaqdiyel kee Samiraamot kee Yaciyel kee Qunni kee Aliyab kee Maqseyaahu kee Banaaya deqsita num dooren. Begenah inin xongoloh anayat yaagure maray kaadu Leewih yoobokehiyya dooren. Tohumuu, Mattitya kee Alifleehu kee Mikneya kee Qadadyaahu kee, Qibaadâ-Qarit dacayrih ten Yoobad-Edom kee Yaqiiyal deqsitta labhak ten.

²² Kananya deqsita num, saare elle aban inna ixxiga kaxxam luk yeneeh; tonna-leemiik a marak inkih abba kaa aben.

^23-24 Barkiyya kee Elkaana deqsitta namma num, Yoobad-Edom kee Yaciiya deqsitta namma num lih gacca 'yeenih Qahdi-Sandug dacrisaanamih taama keenih yeceen. Seekah yooboke maray migaaqah Sabanya kee Yosafat kee Netanel kee Qamaasay kee Zakariyya kee Banaaya kee Elqeeder deqsitak yeneenihiyya, Qahdi-Sandugih foocal *baanta yaagureenim taamah luk yenen.

QAHDÎ-SANDUG YARUSALAAM FAN BAAHEN

²⁵ Tohuk gaba kalla heen waqdi, Dawud kee Israayil abbobti kee qaskar-abbobti YALLIH Qahdih Sandug baahaana'gidih, Yoobad-Edom deqsita numih buxay woo Sandug elle yanihiyya fanah gexen. Too ayro kaxxa qaffayda kee farcat aben.

²⁶ Leewih yooboke maray a Sandug baahehiyyal Yallih cato geenimih sabbatah, sadgatah malcina awur kee malcina maruw yusguuden.

²⁷ Dawud nabam xagar meqe *baftak bicsen sartanat gaceeh; Leewih yooboke maray Sandug akkuquk yenehiyya kaak kaxxih, too bis le sartanat gacen. Tonnah kaadu, saare abak yen mara kee, keenik abbah yen Kananya too xaqan le sartanat gacen. Dawud too sartanak kalah *baftak bicsen saroy rikeek tanihiyya isit heeh yen.

²⁸ Tonnal Israayil ummatta takkeemiik, YALLIH Qahdih-Sandug too bical baaheeniih, Yarusalaam guffa haam fanah qililisakaay, baanta kee gaysaay giyaagib kee begenaay kirar aagaruk afracuk baahen.

²⁹ Sandug Yarusalaam magaala culsan waqdi, Saawuluk raqte baxáy migaaqah Miikala deqsitak teneeh Dawud abbaxuk yenehiyya taagatak afah wagga hayte. Too waqdi tet baqalay YALLIH massakaxxah wonnak annah farcatah yargideeh gubak falita tuble. Toh tuble waqdi, «Ah tu'numuk tanih matan!» 'yaanam niyal hayteeh kaa burutteh.