1 Aydaad 14 - NABUWWA KEE MALIKWA

DAWUD-BUXA

¹ Malik Curam deqsita malikiy Suur magaalal malikih yenehiyya doolat abbobti Dawud fan ruube. Woo mara luk, qarwa edde xisan sariidâ-coox kee, xeetik qarwa elle bicsa'nna yaaxige mara kee, cooxuk duyye elle bicsa'nna yaaxige mara kaah ruube. Too mara kaah akah ruubem, kay qari kaah xisaana'gidik ten.

² Too saaku Dawud YALLI Israayil-malik kaa abeh yanim yismiteeh; Israayil ummattah taagah, YALLI kay dardaarinna fayya heem yeexegeh.

³ Yarusalaam magaalal suge saaku, duma luk suge agabuk kalah abite agabut say-xaylo kee lab-xaylo xale.

⁴ Yarusalaam magaalal xale xayloh migaq ah kaana: Sammuqa kee Soobab kee Naatan kee Suleeman kee

⁵ Yibcar kee Alisuwaq kee Elfalet kee

⁶ Nooga kee Nefeg kee Yafiyaq kee

⁷ Alisamaq kee Balyadaq kee Elifalat deqsitak yenen.

FILISTIIN MARAK QEEBIL YEYSEN

⁸ *Filistiin-mari Dawud inkih yan Israayil rasul malik yekke 'yaanam yoobben waqdi, kaa yabbixeeni'gidih gaaden. Dawud toh yoobbe waqdi, qeebih gital keenih matra'gidih gexe.

⁹ Filistiin-mari Refaayim Golo deqsitta golo gufen waqdi, ummatta buubaanam qimbisen.

¹⁰ Dawud Yallal fayu essereeh iyyemii, «Yi Dageltaw, Filistiin marat qeebi maay aboo? Qeebi keenit abek, nasri yoh maay acee litoo?» axcuk Yallal essero essere. YALLI kaal gacseemih «Yeeyik, keenik koo aysiiseyyok, gexay qeebi keenit ab» 'yaanam kaal gacse.

¹¹ Yallak too gacsa gee waqdi, Baqal-Faraadim deqsita aracal qeebi keenit abeeh keenik yeyseh. Keenik yeyse waqdi, «Yalli yi naqboytit weeqi innah yi duufut bayse» 'yaanam iyye. Too aracak Baqal-Faraadim akah iyyeenim tohu.

¹² Filistiin-mari kude waqdi Yallih aftok aqbuduk sugen duyye elle cabeenih kuden. Sarrak Dawud, «A duyye cararisa» iyyeh; carariseenih.

¹³ Filistiin mari kibu suge'kal, taaxige golo fanah qagteeniih, tokkel suge marih duyye buuben.

¹⁴ Dawud kaadu qagteh, Yallal fayu essere. Too saaku Yalli kaak iyyeemih, «Akkel qeebi keenit maabinay; gexxa xicaay woo coox elle yani'kke gufta waqdi, qeebih bical gac.

¹⁵ Tokkek coox amook ibi maaqattah anay kol radu waa waqdi, qeebih gaba qid. Macaay intek, Filistiin-marak tayse'gidih, foocat anu kok gaceyyo» 'yaanam kaal gacse.

¹⁶ Dawud Yalli kaak elle inxicca 'ye innal abeeh; tohuk gexxaamah, Filistiin-mara Gibqon-magaalak xabba haanamaay Geser-magaalah amma 'yaanam salafak xiiriyak been.

¹⁷ Dawud migaq kulli baaxol yontoobbeeh; YALLIH fayxi edde teneemih taagah, kulli doolat kaak meysitak xinte.