1 Aydaad 12 - NABUWWA KEE MALIKWA

XIKLAGAL YEN SAAKU DAWUDUL TEMEETE QASKARA

¹ Dawud Xiklag deqsitta magaalal Saawuluk megloh yen saaku, mango qaskaray qeebi ixxiga kee labhaytinaane luk tenehiyyat yengele.

² Too mari akah yoobokem, Benyam kedoy Saawul akah yoobokehiyyak ten. Guri gaba kee migdi gabah inkih gaysê-baxa elle qidan gura kee wanxefit xeet elle qidan inna nagay aaxaguk yenen.

³ Gibqâ-magaalal yooboke Samaaqa deqsita numih xayloy migaaqah Aciiqeder kee Yooqas deqsittahiyya qaskar abbobtih keenik ten. A qaskarih migooqa ah teeti: Qadmawet deqsita numih xayloy Yadyel kee Felet deqsittahiyya kee Qanatot magaalal tooboke namma qaskariitay Beraaka kee Yaahu deqsitak tenehiyya kee

⁴ Gibqon magaalal yooboke Yismaqyaahu deqsita qaskariitay yimixxige agiruk yeneeh Yaaxigen Soddomuk numuk teenah yenehiyya kee Gadeera magaalal tooboke qaskaray Ermiyaas kee Yacadiyel kee Yocanan kee Yoodabad migaq luk tenehiyya kee

⁵ Carif magaalal tooboke qaskaray migaaqah Elquday kee Yarimot kee Balya kee Samarya kee Safatya deqsitak tenehiyya kee

⁶ Korac deqsita gulubut raqta qaskaray Elkaana kee Yissiya kee Qadaral kee Yoqeder kee Yaasobqam migaq luk tenehiyya kee

⁷ Gador magaalal yooboke Yaroocam deqsita numih xayloy Yoqela kee Dabadya deqsittahiyyak ten.

AMÔ-REEBU LE ARACAL YEN SAAKU DAWUDUL TEMEETE QASKARA

⁸ Dawud bacarih tan baaxok amô-reebu le aracay uqurah meqehiyyal yen saaku, Gaad kedoh tooboke qaskaray qeebil kulsa lehiyya Dawud abe qeebit kaa'lih sugte. Too qaskar gob kee macaxut aban qeebil fula luk yeneeniih, lubak innah inti-qasin agiirak yeneeniih, sissikaaneh qaleelah amol qarkuumud innah gexak yenen.

^9-13 Too qaskarih migooqa ah teeti: Keenik abbah yen Qader deqsita num kee kaak gubal yen Qobadyaay; ken lakal Aliyab yeneeh, kay lakal Mismanna yeneeh, kay lakal Ermiyaas yeneeh, kay lakal Qattay yeneeh, kay lakal Alyel yeneeh, kay lakal kaadu Yocanan yeneeh, kay lakal Eldabad yeneeh, kay lakal kaadu Ermiyaas yeneeh, kay lakal Makbannay deqsita num yen. Sittat taban kee inki num akkuk yenen.

¹⁴ A maray Gaadah yooboke inkih, qaskar abbobtik teneeh; keenik gacca 'ya num bool numuk yeyseh yeneeh, keenik cayla le num, alfi numuk yeyseh yen.

¹⁵ Sanatak inikhaytoh alsay Ordon weeqayti emegga 'yeh aruk amo korak yenehiyyat, too weeqaytuk tabba 'yeeniih, elle taben ikkel weeqaytuk ayrô-mawqa kee ayrô-culma le kabul suge mara inkih xiiriyeenih.

¹⁶ Benyam kee Yuudâ kedoh yooboke marak garab Dawud elle yan aracay amô-reebu lehiyya yemeeten waqdi,

¹⁷ Dawud kaa gufaanam afal garayya keenih iyyeh, «Qeebil yoo cata'gidih yemeete mara tekkeenik arciba. Takkay immay yoo ganuh yemeete maray yi naqboytih gabal yoo haa'gidih yemeetehiyya tekkeenik, Yallay ni kaxxa abbobti elle aamanuk sugtehiyya sin ableleeh sin akah digaalele» 'yaanam keenik iyye.

¹⁸ «Yaaxigen Soddomuk» qaskar abba yakku waa numuy Qamaasay deqsitahiyya too marak numuk teenak ten. Too waqdi Yallih *Roocaaniyya kaal obteeh, isi milkih kaa hayte. Too num too waqdi anay fayya haak yaabeeh, «Yiisâ-baxa Dawudow, nanu ku mara kinninoh, ko'lih nan. Yalla kinni ku Dagelti ku qaxat yaniih; amaan kee wagari ko'lih yanay. Qeebil koo cata mari nasri geyay» iyye. Too waqdi Dawud ken arcibiseeh isi qaskarak abbobtih ken hee.

¹⁹ Tohuk kalah kaadu, Manasseh yooboke marak garab, Dawud kee Saawul toome saaku, Dawud qaxat gace. Too saaku Dawud Saawulut qeebi aba'gidih Filistiin mara lih Saawul gaaduh gexe. Takkay immay Filistiin mari woo gaadul Dawud maamaninnoonuuy; akah kaa aamine weenim, «Duma kay amoytah suge Saawul yabalu waa waqdi, nee cabba heeh kaa fan nek korek, bayenno» 'yaanamak ten. Tonna-leemiik, «Atu ahaksa Xiklag fan uttuduur» kaak iyyen. Tonna-leemiik too gaaduh ken lih magexinnay Xiklag magaala fanah yuduure.

²⁰ Too saaku Manasseh yooboke marak tu takkem kaa'lih tuduure. Too marih migaq Qadna kee Yoodabad kee Yadiqeel kee Mikaayil kee Yoodabad kee Aliihu kee Xillatay deqsitak yen. Kulli num keenik alfi takke qaskaray Manasseh yoobokehiyyak abbah yen.

²¹ Ta labha nagay yan gidmi le labhak teneeh, Dawud-mara meqe'nnal cateeniih; tonna-leemiik Dawud qaskar abbobtih ken abbaxuk yen.

²² Kaa cataana'gidih, Dawud qaskarat kulli saaku qusba mari culak yeneeh; tonna-leemiik mangah amagguk yemeggen.

ISRAAYIL MALIK YEKKE SAAKU DAWUDUL YEMEETE MARA

²³ Dawud Cebron magaalal yen saaku, carbil nagay tan ixxiga le qaskar, dumaak luk suge qaskarat tengele. Too mari, Saawul luk suge dardaarinna Dawud elle geya'nnah, cato kaah aben. Toh dumaak Yalli Dawuduh qahdi akah culeh suge qaadak ten. Ta qaskarak loowo ah kaana:

²⁴ Yuudâ-kedok lica alfi kee bacra boolih qaskariitay silacat tikyah leeh, gob kee macaxut axawah tanihiyya kaal yemeeten.

²⁵ Simqaan-kedok kaadu malcina alfi kee bool qaskariitay qeebil agiirak tenehiyya kaal temeete.

²⁶ Leewî-kedok tonnah kaadu affara alfi kee lica boolih num kee,

²⁷ Haaruunuk rade marak abbah yen Yoyadaq deqsita num kee katatta qaskarak sidiica alfi kee malcina boolih num kee,

²⁸ Saaduk deqsita furraynuy carbil qangih yenehiyya kee kaah mare luk ten qaskarih abbobtik labaatanna kee namma num kaal temeete.

²⁹ Benyam-kedok sidiica alfih qaskariita kaal temeete. Saawul akah yoobokem, Benyam kedok teneeh; tonna-leemiik too ayro fanah, too qaskarak mango mari Saawul-xinto luk sugen.

³⁰ Efrayim-kedok labaatanni alfi kee bacra boolih qaskariitay kedoh addal kaxxa ossobba lehiyya edde ten.

³¹ Ayrô-culma le kabut raqta Manassê-kedoh yooboke marak taban kee bacra alfih qaskariita kaal temeete. Too mari inkih, Dawud malik abaana'gidih doorimeenih yenen.

³² Issakar-kedok namma boolih numuy qaskar abbobtih tenehiyya kee oson abbah akak yanin qaskar kaal temeete. Ta maray abbobtih yenehiyyaa, Israayil rasul abaanam faxxintam kee edde abeh meqe wakti yaaxige marak ten.

³³ Dablon-kedok kontom alfi qaskariitay kulsa leeh, qeebih bical tanihiyya agaagul sinnuk, baguuk kaa cataana'gidih, kaal yemeeten. Ta mari, tohuk kalah kaadu, silaacat carbi elle aban inna nagay barte marak ten.

³⁴ Naftaalî-kedok kaadu alfi numuy qaskar abbobtih tanihiyya kee soddom kee malcina alfih qaskariitay gob kee macaxut axawah gexxahiyya kaal yemeeten.

³⁵ Daan-kedok kaadu labaatanna kee bacra alfi kee lica boolih qaskariitay qaskariinô-baritto lehiyya kaal temeete.

³⁶ Aaser-kedok kaadu morootom alfih qaskariitay kulsa leeh, qeebih bical tanihiyya kaal temeete.

³⁷ Ordon weeqaytuk ayrô-mawqa le kabut raaqa rakaakayal tan Ruuben kee Gaad kee ayrô-mawqa le kabut raqta Manasseh kedoh yooboke marak tittat bool kee labaatanni alfih qaskariitay kulli qaynatih silac gabat lehiyya kaal temeete.

³⁸ Ta axxul le qaskaray qeebih bical tanihiyya Dawud Israayil-malik abaana'gidih, Cebron magaala fanah gexen. Too qaskarak kalah kaadu raqqa 'ye Israayil mari yakkeenimik Dawud malik abaanamal titta geenih yenen.

³⁹ Tokkel Dawud lih sidooca ayro aseeniih, ken toobokoy baaxo ken lih lehiyya qibnaytiinoh keenih bicisse leek-maaqo adoobitak sugen.

⁴⁰ Kilbat le kabut raqta baaxoy Issakar kee Dablon kee Naftaali kedo elle tanihiyyay Cebroonuk xeeruk raqtahiyyaak, danoona kee gaala kee baakil kee awurwal, riyen bulul kee sublâ-xayloy kafseenihiyya kee kafsen qinab-xaylo kee qinabak bicsen kamri kee caxâ xaylok bicsen *zeyti (saliid) eerra heenih tokke baahen. Tohuk kalah kaadu, laa kee illiy yasguudoonu waanahiyya baahen. Ta axxul le bica kee mattacoy ummatta bahtehiyya Dawud dardaareemih fayxih farcatah aben.