1 Aydaad 11 - NABUWWA KEE MALIKWA

DAWUD INKIH TAN ISRAAYILIK MALIK YEKKE

¹ Israayil mari yakkeemiik Cebron deqsitta magaala fan Dawudul yemeeten. Kaak iyyeenimih, «Nanu ku qabalaay, ku cadoyta kinnino.

² Duma Saawul malikih suge saaku kinni way, gaadi faxxiima saaku foocat nek gacca 'teh carbi booxa fanah nee beyak sugtem koo. YALLAY ku Dagelta kinni, isi marak miraac akkettooh ken xiinisa num koo abeleemih qahdi koh culem nanu naaxigeh» axcuk kaal yemeeten.

³ Israayilik saqoltih yan mari toh axcuk Cebroonul kaal yemeete saaku, Dawud kee Israayil ummatak saqoltih yen mari YALLIH foocal xagana tittah culen. Sarrak Dawud yuskuteeniih; usuk tohuk wadir Israayil malik yekke. YALLI dumaak Samuwelik elle iyyeh suge'nnal, Dawud too saaku malik yekke.

YARUSALAAM TINTIXIBBIXE

⁴ Ayrok teena Malik Dawud kee inkih tan Israayil ummatta, Yarusalaam magaalat qeebi abta'gidih gexxe. Too saaku Yabuusa akak axcuk yenen kedoh yooboke mari woo magaalal dabaaqah yeneeh; magaala kaadu migaaqah Yaabus deqsitak ten. Yabuusâ mari woo baaxol naharak nooke marak ten.

⁵ Too mari Dawuduk, «A magaala faxem takke way cultu madudda» iyyen. Dawuduh tu gactek, Siyon qalel sugte megdebwa keenik raaqiseeh, tohuk wadir migaaqah Dawud-Magaala deqsitte.

⁶ Too qeebi aben saaku, Dawud, «Yabuusah yooboke num naharal qidinnaan num inkih tan qaskarih abbah akkele» 'yaanam iyyeh suge. Yowab deqsita numuy Xaruya deqsitta barrak baxah yenehiyya gaaduk foocat gacca 'yeh miraaciseeh, qaskar abbootan gee.

⁷ Dawud woo qalel sugte megdebwa le aracal buxah yeneeh; tonna-leemiik too aracak ‹Dawud Magaala› 'yaanam iyyen.

⁸ Dawud, naharak ayrô-mawqa le kabut raqta baaxoy ramma luk sugte missoysak baahak, woo qalel sugte megdebwa le arac dariifal magaala xise. Magaalak wohuk raqte exxa Yowab, akah sugte innal, nammayhaak xise.

⁹ YALLAY Nabaamak Nabahiyya Dawud lih yeneeh; tonna-leemik Dawud qandeh ayrook ayro aysuk yeyse.

DAWUDUK AGIIRAH TAN QASKAR

¹⁰ Dawud agiirah tan qaskar luk yeneeh; too qaskar Israayil ummatta lih gacca 'teh, YALLI elle iyye'nnal, Dawud malik yakke'gidih, cato kaah yekken. Kay dardaarinna maqar bahsiisen.

¹¹ Too agiirak numuk teeni Yaasobqam deqsita agiruy Cakmoon deqsita gulubuh yoobokehiyyak teneeh; too agirii, ‹Yaaxigen Sidoc› deqsitta buttak abbah yen. Ayrok teena sidooca bool yakke mara lih, inki macaxut qeebi abeeh; too sidooca booluk inkih qeebil iissaay sella ken hee.

¹² Kay lakal ‹Yaaxigen Sidocuk› ciggiila saqalah tenem, Doodó-Alqedar deqsita agiruk ten. Too agirii, Acowi deqsita gulubut raaqak yen.

¹³ Filistiin-mari qeebih Fas-Dammim deqsita aracal gaaboowe saaku, Alqedar Dawud xaquuk qeebi abe. Gabru deqsitta daro elle toobokeh ten buqre ten. Israayil mari Filistiin marak awyah baaxo cabe waqdi,

¹⁴ kaa kee Dawud too buqrel qeebi abak elle raqte. Oson Filistiin marak gudel gacca 'yeenih qeebi keenit abak raaqeenih ken qiden. Too saaku too qeebil YALLI kaxxa nasri keenih yecee.

¹⁵ Ayrok teena «Yaaxigen Soddom» deqsita agiirak sidooca num Dawud fan yemeeten. Dawud too saaku Qadullam rasul tan gablah garil tan kaxxa xaal suge. Filistiin mari kaadu Refaayim Golo deqsitta golol yifdigeenih yenen.

¹⁶ Too saaku Dawud amô-reebu le aracay uqurah meqehiyyal sugeeh; Filistiin mari kaadu Beetlacam magaala yibbixeh yen.

¹⁷ Sarrak Dawud isi baaxoh lee kassa heeh, too waqdi iyyeemih, «Beetlacam magaalah afal yan qeelih lee yoh baaha num genniyooy faxe raareh an» iyye.

¹⁸ Too waqdi too sidooca agiri Filistiin-mari elle yan aracak adda-adda gacca 'yeenih too qeelak lee qulla heenih Dawuduh baahen. Dawuduh tu gactek, too leek maaqabinnay, YALLIH sadgatah baaxot tet caxe.

¹⁹ Sarrak iyyemii, «Yalli yol yascarramay! A lee aaqubem yol matan. A lee a sidiica numuy isi roocih meysite'kah a marak adda gacca 'yeh a lee baahehiyyah qabala yaaqubeenimih bis le» iyye. Tohuk gexxaamah too lee maaqubinna. Woo sidooca numuh tu gactek, agiirinni keenik too bis luk yen.

²⁰ Yowabak toobokoytah yen Abiisay «Yaaxigen Soddom» deqsita soddomuk abbah yen. Ayrok teena inki macaxu luk sidooca bool yakke marat qeebi abeeh too marak inkih yeyseh ken qideh.

²¹ Tonna-leemiik too Soddomih addat yimixxige agiruh raaqeeh, abba keenik yekke. Takkay immay «Yaaxigen Sidocih» inna migaq-gexxoh luk mananna.

²² Yoyadáq-Banaaya kaadu kaak kaxxih yamixxige agiruk ten. Banaaya elle yoobokem, Kabxaqel deqsitta magaalak ten. Banaaya abinnaan taamal qangik ten. Mooyab marak namma agiru qide. Ayrok teena arroqle le rob radak sugeeh; too ayro Banaaya boodoh adda cule waqdi lubak kaah sugeeh; too lubak qideh.

²³ Tohuk kalah kaadu, kaxxam masu naba Masri-num qide. Too num xexxaarah namma mitrik amo gexak yeneeh, silaacah kaxxa masu le macaxu luk yen. Banaaya naharak gabah caxxat kaa yoogoreeh, sarrak gabat luk suge macaxu gabak kaak bukkussa heeh, woo macaxut kaa qide.

^24-25 Toh, agiruh yan Banaaya abe taama. Banaaya «Yaaxigen Soddomih» adoytak ten. A Soddomih addat migaaqat akak yabba yan numuk tene'mmay, «Yaaxigen Sidoc» gide migaq-gexxoh luk mananna. Dawud isit dacayrih tan qaskarak abba kaa abe.

^26-30 Tohuk kalah ten labhay qaskariinol timixxigehiyya ten. Yowab toobokoytah yen Qasahel kee Beetlacam magaalal yooboke Doodóh-Elcanan kee Carod magaalal yooboke Sammot kee Felon magaalal yooboke Celex kee Takooqa deqsitta magaalal yooboke Qikkés-Qiira kee Qanatot magaalal yooboke Abiqeder kee Cuusâ magaalal yooboke Sibkay kee Acowi-magaalal yooboke Qilay kee Netoofâ magaalal yooboke Mahray kee tonnah kaadu Netoofâ magaalal yooboke Baqná-Celed kee

^31-35 Benyam rasul geytimta Gibqah magaalal yooboke Riibáy-Itay kee Firqaton magaalal yooboke Banaaya kee Gaqas deqsitta magaalah xaqul tan goloolah addal yooboke Curay kee Arbatal yooboke Abiiyel kee Bacurimil yooboke Qadmawet kee Saqalbonul yooboke Elyacba deqsita num kee Gixonul yooboke Hasem deqsita numih xaylo kee Haraaral yooboke Sagée-Yonataan kee Haraaral yooboke Sakár-Aciyam kee Ur baxi Alifal kee

^36-40 Makeeral yooboke Ceefar kee Felon magaalal yooboke Aciiya kee Karmelil yooboke Cesro kee Edbay baxi Naqray kee Naatan toobokoytah yen Ayyuqel kee Hagrí-Mibcar kee Qammon-marah yooboke Xelek kee migaaqah Nacaray deqsitaah, ubka Beerotul abe numuy Yowab-silac akkuquk yenehiyya kee Yitra deqsita gulubuh tooboke Qiira kee Gareeb deqsitta labhah nammey kee

^41-43 Ciitâ-marah yooboke Uriyya kee Aclay baxi Dabad kee Siidá-Qadiina deqsita qaskariitay Ruuben deqsitta kedoh aabakuk yenehiyyay wakalih soddom qaskariita is lih abbaxuk yenehiyya kee Maqká-Cannan kee Mitan magaalal yooboke Yosafat kee

^44-47 Qastarot magaalal yooboke Quddiya kee Cootam deqsita numih xayloy Samma kee Yaqiiyal migaq luk teneeh ubka Qarooqer magaalal abtehiyya kee Simrí-Yadiqeel kee kay toobokoytah yen Yoocay Tiixil yoobokehiyya kee Macwal yooboke Alyel kee Elnaqam deqsita numih xayloh nammayay migaaqah Yaribay kee Yosawya kee Mooyab-marah yooboke Yitma kee Alyel kee Yoobad kee, Xoobal yooboke Yaqsiyel deqsita numuk ten.